一講槍戰，就會諗到 “B B 彈”、污糟、損傷、好唔就腳既地方…… 兩個月前，我同朋友發現，銅鑼灣有一間自稱以太空船為主題，用鐳射槍對戰既地方，見到咁得意，就梗係去玩吓啦。初初以為，間野開喺銅鑼灣，個場都應該唔會大得去邊，玩完就知當初咁諗，係好錯。
太空船內困獸鬥
對戰場地，都有大約2700尺，而且，個玩法同war game 有好大分別。war game 一般都係中彈嗌死，之後出去等end game，先開始新一個回合。而呢個鐳射槍對戰，係一節節咁玩，每節20分鐘，有8分鐘著裝備同briefing，教大家點去開槍、轉武器等等。淨低既12分鐘，就係對戰既時間。呢12分鐘，絕對係對體力既考驗，大家會以補血翻生既形式，持續地對戰。換言之，被擊中，唔洗嗌死，等補完血就可以繼續。每個遊戲，補血既時間都唔同，補血其間，身上既sensors同槍都唔會有反應，直到翻生為止。所以，要好好咁利用補血嗰幾秒，走去安全既地方，等翻生，繼續作戰。我同班朋友對戰既時候，場入面會充斥住叫聲同傻笑聲。因為入到對戰場地，黑到睇唔到對方個樣，只係靠睇住背心上，所顯示敵對既顏色去攻擊。而且，場內同時播放比較緊張既音樂，造就場內緊張又剌激既氣氛。或者，大家可以睇吓下面段片，去感受一下個氣氛：
感受完氣氛，就講下點解會推介大家去Lasermads玩：
由銅鑼灣地鐵站步行到Lasermads，5分鐘都唔洗。玩完之後，行去附近食個糖水或者宵夜，都好方便。而且，Lasermads除咗有鐳射槍對戰之外，都係一個識朋友既地方。由於每節遊戲既人數，上限係12人。如果大家walk in或者唔夠人數的話，有機會會同到其他唔識既人對戰。又有溝通，又有互動，咁又點會識唔到朋友呢？如果想挑下機既，可以問下職員，join 唔join，因為啲職員好勁。有得玩，有得識朋友，位置又就腳，點可以唔介紹比大家呢？
＊溫馨提示：帶條毛巾同帶多件衫去換。
遊戲暫時有3個：
－1 Shot : 話明1 shot，就梗係中一次槍就要補血，但等既時間就較短，大約4-5秒。射中sensor位攞分。
－3-4 Shots : 3-4個Shots 就中三至四次先要補血，但等既時間就較長，大約10-12秒。 射中sensor位攞分。
咁邊啲位係sensor位呢？背心上面，前、後各一個，左、右膊頭各一個，仲有一個就係槍頭，總共有五個。而啲分既分佈，就可以睇吓下圖：
Agent : 聽落複習，但其實好易玩。
首先，Agent唔係玩撕殺，因為，射人，只係得5分。而同隊，係唔可以射返同隊。真正攞分，就係做Agent。hold住Agent 個post，每5秒，就有50分。一開始，會有一至三個Agent (Red)。當Agent被平民(Blue)擊中之後，兩者身份就會交換。平民會即時變Agent, 但Agent就要4-5秒復活。所以，做Agent既朋友，記住要匿藏自己啦。Agent 既運動量會較前兩者大。前兩者，被擊中後，可以利用補血既時間，走去安全既地方，等到補血之後再作戰。但Agent，因為係即時轉換角色，同埋Agent愈hold得耐，分數會愈多，所以，玩Agent mode 就一定冇得企定定。用暫時去介紹game mode係因為，職員透露，去到十月尾，可能會推出第四個遊戲，十分期待!!!
講完遊戲，簡單講下把槍。把槍有兩種武器：
Phaser：可用作遠距離射擊，有紅外線去瞄個目標。
Blaster：”散彈”，同一時間擊中多個目標。
玩完之後，大家都會收都自己既成績表，裡面除左顯示個人同team既分數之外，仲有最佳射手、最高分係邊個。但最重要，係有顯示到，邊個射得自己最多，咁下次，就知道要搵邊個報仇。
比啲小Tips大家啦 🙂
＊Team就梗係要team work 啦，但都唔好企得太埋，因為Blaster係會同一時間擊中多個目標。
＊互相cover
＊左右咁攻上去
＊盡量唔好企喺場既中間
上面張相，可以見到剛剛介紹過既背心、槍之外，仲有Lasermads既設施：Locker、櫈、汽水機、Photobooth。要補充一句，呢張相唔係用photobooth影！
見到部Photobooth，我會用窩心同體貼去形容Lasermads。呢個Photobooth 係比大家自拍，一次過影三張，影完之後，可以Email 或者用Airdrop 比返自己。如果，已經lock左部手機，又想影相，但又唔想開番個locker既朋友，可以善用呢部Photobooth 啦。
價錢方面：
非會員：HKD $118 ／一節遊戲
會員： HKD $98 ／一節遊戲
HKD $158 ／兩節遊戲
每場上限：12人
點先會成為會員？
第一次去玩既朋友，只要去到填張表格，就可以即時入會，同攞到Member Card。 每次去玩，都記得要帶Member Card ，去紀錄自己既分數。 如果真係唔記得帶，就同職員講。
包場又點計呢？
星期一至四：＄3188 ／1小時
：＄6370 ／2小時
星期五至日、公眾假期及前夕：＄4388 ／1小時
：＄8370 ／2小時
如果人多，包場會抵玩啲。遊戲每節會係8分鐘，1小時會有5個遊戲。而且，亦都會送24張即影即有相。而呢24張即影即有，就係用剛剛講既Photobooth影。
預約方面：職員透露，現時full booking既時段，分別係星期六全日、星期日10pm前，星期一至五既5pm-6pm。而最佳預約時間，就係一星期前。
開放時間：星期一至日，12pm-12am
地址：銅鑼灣怡和街2-6號英光大廈11樓
11/F Ying Kong Mansion, 2–6 Yee Wo Street Causeway Bay Hong Kong
電話：(852) 2343-3033
網址：http://www.lasermads.com
