Sun811 版友參加了編輯部既「1376醒醒你」遊戲 (重溫遊戲帖：按此，獲選文章：按此)，幸運地被選中了，獲得一碟難求既 Dobly Atmos Demo (Sept 2015) 非賣品展示碟，本來「遊戲一場」，結果「夢想成真」- 鴨毛入屋；係咪好鬼羨慕呢……
鴨毛入屋之路
從此始走上這條鴨毛之路，但當時小弟是沒有Atmos擴音機，縱使可以播到，但也不是味兒。而自己部Onkyo 5010都仲好地地，真是你想佢壞時佢遍遍唔壞比你睇，忽然想到既然自己的文章得奬，就對住老婆大人照稿讀啦，點知原來真是work，攞到批文後即刻去旺角地庫聽一聽什麼反射喇叭好，一定有師兄會問：吓！乜唔喺裝天花喇叭咩？爭好遠喎！我都知阿媽喺女人，但當時為免夜長夢多及不想大興土木，便選購了Kef R50及Onkyo 3030，這是最簡單快捷的方法便可以Atmos入屋。我相信每一位師兄第一次玩Atmos都會覺得好正，包括小弟在內，天花都有聲，你話幾正，加埋隻Atmos demo碟，我都唔記得自己睇過哩隻碟幾多次了。R50確實是一隻有質素的反射喇叭，但無奈地小弟的廳是長形，就算是加咗釘腳托高令反射角度加大，也只是改善了小許效果，再加上當小弟用投影機睇戲時，R50是會擋住隻幕的下面；既然洗濕咗個頭，就再問吓老婆可唔可以裝天花喇叭，點知唔問由自可，佢竟然話我當初都是話想裝天花喇叭，佢話無反對過喎，嘩！仲唔老婆萬歲！好，又上Post76吸吓毒先，在此要特別鳴謝一些師兄，排名不分先後，包括：wadee兄,MDLP兄,PAC兄, tangcoma兄。在這個討論過程當中，小弟獲益良多，許多師兄也給了小弟喇叭擺位的寶貴意見，但都要裝過上去才知實際效果，所以我都要改動了第二次才滿意，其實曾想過學MDLP兄咁行路軌，但因小弟玩四隻喇叭，額頭都唔想咁多路軌，何況個天花有四條路軌，幸好在第二次改動後都可以收貨。
好，都應該講一講賽後報告了，首先我想講的是，其他師兄也講到口都臭，就是玩Atmos最好裝天花喇叭，因為效果明顯，如果真的無可能裝天花喇叭，Kef R50都可有七至八成效果，而我是講緊用在我個14呎長的廳內，廳不太長的話我相信效果會更佳，第二，sofa貼牆的師兄可以玩兩隻天花喇叭，就算玩四隻的分別也不大，除非你玩全頻及六吋單元以上的喇叭，但我想補充，雖然我四隻MK M5不是全頻喇叭，但我覺得長形廳最好都是玩四隻，你會聽到有深度的分別及定位好Ｄ，但當然height 1 & 2排的喇叭要有一定距離才有這種效果，例如四方形擺法，這擺法將來也可以兼容DTS-X。
最後我想講的是，都是果句，盡可能的話玩atmos都是用天花喇叭，玩到兩隻喇叭在頭上安裝已有唔錯效果，但好多師兄話無可能裝天花，小弟可以給大家一個建議，先裝天花路軌射燈，既然裝到路軌，便可以吊多對喇叭上去啦！這是我的建議，Work唔Work請自行判斷。
延伸羨慕討論：http://goo.gl/Xr5hVo
