繼玩轉「侏羅館」、惡搞「非常外父」後，喜劇巨星賓史迪拿 (Ben Stiller)再次變身扮嘢「索凸務」，2016年隆重出擊！今次賓史迪拿承接上集《非常索凸務》(Zoolander)風格，繼續親任監製、導演、編劇兼主演；《翻生侏羅館》(Night at the Museum)系列及「索凸務」好拍檔奧雲韋遜(Owen Wilson)亦會同賓史迪拿一齊喺《非常索凸務2》(Zoolander 2)笑住登場。此外系列中嘅超級奸人韋爾法路(Will Ferrell)，仍然會喺今集現身搞破壞。
除咗以上主力角色，新加入嘅強勁演出陣容更加吸睛！近年公認演技一流嘅《解碼遊戲》(The Imitation Game)型男班尼迪甘巴貝治(Benedict Cumberbatch)以“姣爆鏡”姿態助陣；兩大索女：《情迷巴塞隆拿》(Vicky Cristina Barcelona)彭妮露古絲(Penelope Cruz)及《火星任務》(The Martian)姬絲汀慧(Kristen Wiig)加入搞笑，仲有樂壇小天王Justin Bieber同搖滾公主Demi Lovato做串星，絕對令樂迷同影迷同樣驚喜！難得一眾紅星樂於奉陪玩到盡，觀眾點捨得唔捧場？
扮嘢招積 索住出擊 挑戰神秘殺手 展開瘋騷惡鬥
當年索倫達(賓史迪拿 飾)因被後起名模漢素(奧雲韋遜 飾)搶盡風頭，投靠時裝奸人麥加圖(韋爾法路 飾)，點知慘被洗腦仲幾乎捲入政治暗殺風暴。好彩最終化險為夷，仲同漢素化敵為友添。事隔多年，已經退隱嘅索倫達同漢素，竟然再度重出江湖！不過時移世易，佢哋已經俾人笑係老餅。事緣有神秘殺手宣稱要殺盡世上靚人，多位知名人士已經遇害。有感案情複雜，而且牽涉時裝界及名氣界，加上死者遇害時全都做出索倫達的招牌表情，因此國際刑警華倫天娜(彭妮露古絲 飾)決定請索倫達同漢素出山做無間道，希望可揪出冷血幕後真兇。警方預料殺手下個目標會係樂壇小天王Justin Bieber同搖滾公主Demi Lovato，究竟索倫達同漢素可唔可以及時幫手救返呢兩個靚人？
