行街街消噪入手 – Philips NC1 開箱測試

一年容易又到聖誕新年，大家都知道呢個係全年最有Mood購物既季節，呢兩/三年我由擁有X1到X2，對飛記fidelio呢個名確係幾有信心，無論定位，設計，造工，性價比，以至最緊要既音質質素都比到我，咁我見佢又有新野出，就送自己一份聖誕禮物過下節，一年到晚咁辛苦點都要比自己開心下，就係NC-1，一隻封閉式既耳筒，點解叫NC，因為佢最大賣點係可以主動消噪，Noise Canceling，點解叫1，大佬咪叫呀一囉！

入手前做下功課先

比錢前當然要先做下功課先，呢隻耳筒分別搭載兩隻Feedbackward 及 兩隻Feedforward一共四個收音咪，佢地分別負責偵測周圍既低頻及中高頻，經過耳筒內驅動器演算後發出相應聲波去達至消噪效果，既然有收音咪，隻耳筒一定要用電，官方話可以差一次用三十個鐘，頭一次差5個鐘可差滿，之後只需要2個半鍾就得，我無認真去計，不過聽咗成個禮拜都未洗再差，同埋差頭係Micro USB, 相信梗有一條喺大家左近。消噪功能係可以自己決定去開啟或者關閉，關閉咗消噪功能就係正常一隻封閉式耳筒。而接線方面採用分離式，仲要係同同廠X2一樣用上OFC低抗阻接線確保發揮到隻耳筒既小宇宙，而且有更加有線控控制比你駁手機聽歌既時候唔駛”抆”線，都幾細心周到。仲有比埋個飛機轉頭比你，出Trip或者去旅行都用到，讚！

最正係個”記憶棉耳墊”

而家興叫乜都叫Air，飛記可以考慮下將NC-1改名叫NC-1Air，因為佢只係得195g,可摺疊及伸縮設計增加便㩗性，手工方面毋須懷疑，鋁合金外殼配炭黑色，Head Band下又有軟墊，只嫌Head Room對我黎講啱啱好，可以多一點就更好，而鬆緊程度就剛剛好，成隻耳筒硬件方面最正就係個記憶棉耳墊，軟得黎個回彈力可以更貼耳，真係幾舒服，不過長時間載住仍然有少少熱，如果將來科技可以將耳棉調教溫度就好，始終冷熱感覺都係好主觀，亦都視乎平時使用習慣。

NC1性格

唔好睇佢雖然佢比x2細同埋輕咁多，不過佢既釹合金單元都有成40mm，只係比x2既50mm單元少五分之一，聲音傾向同廠既x1同x2相似，細緻，傳真度高，高中低頻夠平衡，而呢隻耳筒最大賣點係消噪，我分別試過係巴士，地鐵及平時行街用NC-1，比較我平時出街用開既IE80(已用Comply棉)，聽到外面聲音既改善真係唔少，我唔可以講佢完全100%對外界滅聲，尤其歌與歌之間靜止位，但係比我用一隻入耳式耳機IE80好上不少，真正去享受音樂，要一個寧靜無干擾既環境好重要，有好聲音，但係周圍環境干擾到你聽歌既興致，咁就大剎風景了。

出街組合

既然用得消噪耳筒，咁一定係出街用，所以基本上我全程都用上ADL cruise去推呢隻NC-1，雖然單元成40mm但都唔算大食，cruise都可以應付到遊刃有餘，唔雖要擔心低頻出得唔夠啦。

實試NC1真章

去聽一d錄音比較好既歌會容易試到NC-1既真章，近排胡琳隻《the fifth season》係我既至愛，上面我講過飛記耳筒傳真度高，平衡好，聽呢隻碟就真正反映出黎，要甜人聲有，背景音樂 &樂器分離度非常清晰，拜高分析力所賜。聽”金色之夏”d敲擊爽而有力，聽”春眠不覺曉”主音與和音好清晰分離到，”冬至” 憂鬱 Mood又出到哂，最正係唔需要係屋企坐定定先可以呢D比較靜態既歌而無比外來聲音影響到。

結語

最後，我覺得 NC-1最適合係經常要坐長途車既人仕用，講真平時 行街用真係唔係太建議，除咗考慮安全性之外，行街腳步太急速都可能影響聽出黎既效果，總括隔音效果比入耳式耳機好，單元大一定比一般耳機低音黎得多而實淨，經常出街先有時間聽下歌既朋友可認真考慮下。