一個人的機遇是偶然 ● 兩個人的偶然是巧合 ● 我們有幸在時間中 聽見陳綺貞
2003年，陳老師出咗第一張獨立單曲「Sentimental Kills」，嚟到今日，已經係第七張，名為「偶然與巧合」。
有人認為，出獨立單曲好搵笨，但作為一個創作人，每日都有唔同嘅靈感，今日嘅感覺可能同聽日已經好唔同，獨立單曲比專輯更能為創作人帶出當時想講嘅嘢。而作為小粉絲，專輯與專輯之間，有呢啲安撫劑慰藉下其實都唔錯，所以呢種方式我自己本身都好buy嘅^^。
講返今次隻碟，全碟一歌、一淨音樂，採用一貫嘅紙套包裝，令人有一系列嘅感覺。首歌係現場演唱現場錄音，呢種方式陳老師之前都用過，不過今次移師台北捷運大安森林公園站，但一啲都唔影響錄音質素。
可能因為現場錄音，一開始，似乎刻意安排一段大堂廣播聲，一段吉他intro之後，隨之而來係陳老師招牌式嘅靚聲，一支吉他、一把靚聲，永遠都咁令人陶醉，所以，好快就好似置身其中一樣，忽然有個衝動，即刻衝落去捷運站見一見陳老師，定一定神，先發覺自己原來身處香港，果然，兩個人的偶然是要巧合的……(哭)。
緊接住第一首歌，第二首係一段海浪聲加上吉他聲，說不出的relax，兩分鐘，啱啱好，再長少少真係舒服到瞓著覺。
雖然係紙套包裝，但絕不馬虎，有齊歌詞紙、海報，仲送埋吉他譜添，可惜我唔識彈吉他啦……
今次除咗出碟，陳老師仲化身為作家，推出佢第一本散文集《不在他方》，收錄咗三十八篇散文、七封信件、三場對談同一段問答。
碟已經聽咗好多次，書就未有時間去買，幸好，買書唔需要偶然。
有興趣嘅朋友，可以到以下“本文章”連結討論分享
