【家訪】Hiromichi兄第一個的家庭影院

在12月頭, 小瑟同九爺(rlwk2009)應我地一位版友Hiromichi兄既邀請, 去左佢既屋企為佢最新建立好既人生中第一個家庭影院作出家訪, 而 Hiromichi兄本身都係屬於初入毒門, 所以佢對音響既認識唔算多, 而現有組合都係係 76 搵料之後搵埋朋友一齊去買既, 但因為身邊都冇咩朋友對音響熱衷, 所以買左機返去之後, 基本上都冇咩點SET 過機, 所以呢日小瑟同九爺就踩上Hiromichi兄屋企, 實行好似占SIR咁, “踩場”呀~~哈哈.

我地先黎睇睇依家Hiromichi兄用緊既器材有D咩先丫!

LCD電視: SANYO LCD TV (720P)
AV擴音器 : Pioneer VSX-1020-K
藍光影碟機: Pioneer BDP-320
前中置喇叭 :Monitor Audio BX2,BX Centre
後置喇叭:MirageOS3
超低音:Velodyne CHT-8Q
卡拉OK系統: Marantz Karaoke Digital Amplfier MZK58

同 Hiromichi兄傾開, 先知道原來佢本來只係卡啦OK發燒友, 所以大家都可以見到Hiromichi兄除左電視機側邊既同前面既三隻前中後置喇叭之外, 係左右牆角上既一對, 比BIG EHCO更勁既一對掛牆喇叭, 呢對喇叭係由 SALES所推介既, 不過牌子就不詳勒, 而小瑟同九爺亦都因為時間既關係, 都冇機會開聲試試, 不過就以Hiromichi兄既電腦打碟卡啦OK系統, 就知道 Hiromichi兄對唱歌係幾咁把炮啦!!! 哈哈~~^_^

咁究竟咩原因會另 Hiromichi兄中左AV毒呢?? 又有D咩另 Hiromichi兄進入呢個萬劫不復既AV毒海呢??? 原來係因為 Hiromichi兄買左佢第一部 Pioneer BDP-320既藍光機, 就係因為睇得高清碟多, 自己慢慢咁中左毒都唔知, 日復日咁, 最後就係大家依家見到既一套齊全既家庭影阮組合勒.

上文都提及過, Hiromichi兄因為身邊冇朋友對AV影音有認識, 所以今次小瑟同九爺上到去, 經Hiromichi兄同佢媽媽熱情既款待之後, 當然就正式開始啦, 首先我地先聽聽 Hiromichi兄平時聽開既野先, 睇睇問題係邊度先!!

我地首先以亞凡達來作個標準, 就以野獸追殺一段作開始, 空間感同包圍感明顯不足, 每隻喇叭都爆得十分行但冇哂音樂中應有既質感, 有小小什亂無章既感覺, 而音牆亦有”宿”左入去既感覺, 5隻喇叭既整體配合唔係幾好, 連貫性亦不夠, 照計 Monitor呢隻新型號應該唔會咁差架喎……..奇怪…! 而低音方面就不俗, 不過低頻就過大, 妹仔大過主人婆既情況都幾嚴重, 如是者, 係聽完一節片段之後, 小瑟同九爺眼神對望一下之後, 大家都似有了默契, 即時拿拿林動手勒!!!^^”

首先, 九爺就將 Hiromichi兄既喇叭位置墊高(因為未有合適既釘腳, 所以先以鼓油碟作腳XDDD), 將高音既單元指向人耳水平高度, 再將左右喇叭盡量拉出, 之後, 再用音壓計將5隻喇叭既聲壓, 調至 75db水平, 而當小瑟進入 Pioneer 1020既設定主頁一睇, 原來 Hiromichi兄真係完全未作過任何設定, 連接 1020既5隻喇叭既音壓都係調至最高, 怪不得之岩岩試聽時5隻喇叭出既聲會咁爆同不連貫呢. 係做完一輪基本動作, 量距離, 調音壓, 設定喇叭之後, 我地就再囉返同一段既亞凡達來聽下勒!!!

今次我地再聽返同一段既片段, 好明顯連貫性同包圍感都好返好多, 起碼左右前後既音牆已經明顯有返應有既現場環境既感覺, 不過高音始終都係比較”標”呢個應該係 Pioneer同 Monitor喇叭本身性格既關係, 再加上所以既喇叭同線材都係新機冇耐, 應該都係未煲夠火喉, 所以小瑟就係 SETTING內既EQ 對喇叭既高頻作出小小調校, 以改善高頻既問題.

係經過反覆修正, 喇叭調校, SUB仔配合, 我地再三睇返亞凡達既同一段, 效果已經明顯好轉, 不過當然仲有好多可以提升既空間啦, 就以 Hiromichi兄佢自己都講, 佢都好想快快手咁將手上既所以線材都來個大升值, 事關, 現在 Hiromichi兄既所以機都仲係用緊跟機既原裝電線, 所以九爺同小瑟都提議佢先換左 AMP同 SUB仔既電源線先, 之後就再換埋 SUB仔既信號線, 相信, 提升既變化都會比較明顯呢. 而當然, 係擺位上, 九爺都係極力建議 Hiromichi兄先將所有喇叭落哂釘腳先, 因為此舉一定係最簡單又快捷可以得到提升既方法呢!!!^.^