*以下內容涉及劇透
關於今次嘅《殭屍》影評，查實@肥狗仔@心情係非常複雜。一黎本人好怕睇鬼片，細老哥時代睇鬼片，@肥狗仔@大部份時間都雙手掩眼以過濾驚嚇情節，套戲講咩自然唔太清楚。二黎，80年代大熱嘅《殭屍先生》系列年紀俾我還要大，因此對相關類型電影的熱衷程度當然及不上70,80後嘅觀眾。然而懷著如斯心情步入戲院，卻換黎唔少意外驚喜。
《殭屍》係麥浚龍(Juno)的轉型處女作，與其他新晉導演不同，單單係”麥浚龍執導彊屍片”已經有當相嘅號招力，不出所料，電影上映一星期左右已經冠絕本土票房。要知道喺如今喪屍電影大行其道嘅市場下，貿貿然走去拍一部復古殭屍，寫個服字之餘，亦睇得出Juno對80年代殭屍片的熱愛。但電影上映前，一張張充滿血腥及壓迫感的劇照，都曾經令本人質疑哩部《殭屍》終究仲存唔存在我地熟悉嘅影子。事實上，《殭屍》的背後意義唔靜止係向老牌殭屍電影致敬，仲有向”失去”的存在價值進行一次粗略考究。
《殭屍》一片始於演員小豪的黃金時期即殭屍電影盛行的80年代。當年小豪因《殭屍先生》而大紅大紫，並經歷過與螢幕拍擋演出殭屍電影的精彩歲月﹑擁有過兒子對自己信任與愛惜的幸福時光。
時至今日殭屍片已經幾近絕跡，小豪風光不再，故結束其演藝生涯。雖然小豪仍對上述的一切念念不忘，但無奈時間就好似一把刀，喜歡在人的身體上刺上無法止血的傷口。現在的殭屍片已成為歷史，惜日戰友林正英及許冠英一一離世，而最難忍受係兒子隨著成長而逐漸與之疏離。種種轉變令小豪失去所有人生目標，繼而入住凶宅打算上吊結束生命。而《殭屍》一片的觸發點就正好出現於小豪死前的掙扎。雖然表面上去意已決，但實際上小豪仍然對當年的一切極為留戀，因此將自己的死與殭屍電影情節融為一體，幻想出阿友這名捉妖天師出手相救，再將左鄰右里的處境黎個大逆轉:
楊鳳活喺丈夫暴行兼慘死的陰影下，帶著兒子小白瘋癲度日; 梅姨不甘丈夫冬叔離逝，所以請教邪派導士阿九借屍還魂。再加上小豪在這個幻想世界入面的”靈異經歷”，三人仿佛與命運交戰，為的就係唔好俾現實搶走唯一的心靈寄託。若果我地將港產殭屍電影的盛衰，與上述三人的人情世故拉上關係的話，小豪吊頸不單止係佢個人的憤世嫉俗，仲係殭屍電影的一次咆哮。哩一下咆哮喚起觀眾對嗰啲，因社會/個人發展而被遺忘的人和物重新關注。而本片所帶出的關鍵在於，哩一種關注最終亦會隨著時間流逝而淡出，成為回憶，繼而寫入歷史。本片嘗試將”遺忘”定為份母，將”殭屍”納入份子，以產生一種帶有血腥味道的時代回憶錄。就內涵而言@肥狗仔@係十分欣賞，不過當中對電影所產生的化學作用就冇想像中的大。
首先《殭屍》一片既包含傳統的殭屍片元素，同時又加插唔少現代元素與拍攝手法。特別係電影往往會刻意省略對殭屍的特性解釋，例如吸血﹑涉取陽氣﹑傻仔跳，還有見光死等一系列耳熟能詳嘅殭屍橋段雖然充斥著於片中，對白上的解釋卻一句都冇。哩種單靠視覺主題來解釋行為的手法相比起以往已經叫人厭倦的口傳心授，過中的違和感或者更能引起觀眾共嗚。另外電影雖則以《殭屍》為名，但實際上殭屍的出場時間與一隻最終BOSS不相伯仲。反之，全片前半部份集中描寫孿生女鬼及養鬼仔，睇落有點掛羊頭賣狗肉之嫌。不過考慮到”殭屍”兩字喺本片仲有另一層意義，加上傳統殭屍片本身就係”屍魂不分”，相信今次編劇就”鬼”在片中戲份的安排還算合理。
除咗上述的傳統要素之外，本片亦加入一啲觀眾比較陌生的現代視覺效果。《殭屍》由日本恐怖大師清水祟合力監督，若果你冇睇過《咒怨》，咁對於戲中女鬼的表現，還有CG特效都可能帶俾你唔少新鮮。至於另一驚喜係電影充斥著異常血腥的場面。上至殭屍吸血﹑下至純粹劏雞，印在周遭的大偏血跡都表現神秘和駭人的壓迫感，與以往最多幫條頸打兩個洞的傳統殭屍片大相逕庭。感覺上就係結合埋西方吸血鬼的暴力美學。
叫人可惜係《殭屍》貌似太著重打造一套賦時代感的傳統殭屍片，卻忽略咗有關片種的基本特質: “驚”。 一般鬼怪電影裡面，殭屍又好鬼又好，對於凡人角色其實都一樣嚇人。這種凡人角色的本能反應亦正好反映於觀眾的心理反應之中。所以觀眾睇鬼片的代入程度除咗有賴於鬼怪的可怕，戲中角色的表現亦應記一功。而本片的失敗之處，係一眾角色有如得道大師，早已接受神鬼之說。凡事只要避忌就當冇事發生。特別係電影一開始小豪由”唔信邪”，到之後面對牛頭馬面的忌諱﹑對殭屍的奮力抵抗，中間除咗被鬼上身之外，就搵唔到任何導致此等轉變的觸發點。
上述問題亦某程度反映出本片的另一瑕疵: 劇情散亂。《殭屍》一片以小豪角度出發，再引申到鄰居的故事。不過@肥狗仔@好快發現小豪與這些鄰居的交感並不算多。其對手戲大部份時間都聚焦在友哥與楊鳳兩母子身上。至於其他角色就有如支線人物一樣。戲份重不特止，仲要各有各講，導致小豪被淪為配角般，中後期先走出黎做”歸納”。連貫性低之餘，相關情節亦十分空洞。
喺一系列的盲點下，用瑕瑜互見去形容《殭屍》的表現就最好不過。此因本片的攝影係非一般的出色。@肥狗仔@特別喜歡電影的動態攝影及構圖。以往我地只知道殭屍識得跳，而本片入面觀眾可通過各種鏡頭清楚地欣賞到殭屍”優雅”的姿勢與動作。部份描寫人物的場景，攝影師則利用細膩的鏡頭移動將有關角色的心理狀態如實反映，例如邪道士九哥癌症病發，邊吐血邊仆入祭壇，同時畫面開始旋轉，配合紅色畫面，此鏡頭將九哥腦海中的混亂與危機感具體地投射出黎。
除咗運鏡做得好，本片的CG特效亦恰到好處。無論係孿生女鬼定殭屍，其身體動作﹑髮絲還有其靈力所散發出的風起雲湧，在電腦特效修飾下皆極賦動感。加上香港獨有的舊式天井公廈，當有個full shot係講述孿生女鬼十指緊扣地並排於走廊中間嘅時候，我所見到嘅唔係《閃靈》入面嘅細路女，亦唔係電子遊戲《零》入面果對孿生姊妹，而係真真正正象徵著東西合壁 — 一個屬於香港鬼片的經典場面。
正如上面有提到，《殭屍》所描寫的主要角色唔單止小豪一個，仲有梅姨﹑冬叔﹑燕叔﹑楊鳳﹑友哥及九哥。整體而論所有演員都做得相當唔錯，所以@肥狗仔@就唔逐一詳述，就講吓自己比較深刻嘅演員啦。首先全片最耀眼的毫無疑問一定係飾演梅姨的鮑姐, 鮑起靜。想起ATV仲有劇拍嘅時候，鮑姐憑著登峰造極的演技，以及好媽媽形象深得民心。但不畢竟佢所演的好多時都係同類角色，觀眾自然冇唸過鮑姐仲有發展更廣戲路的潛力。黎到《殭屍》，就好似宿命一樣，鮑姐再次飾演和藹可親的好鄰居梅姨。唔同嘅係今次鮑姐除咗要幫鄰居車衫，仲要處理埋與丈夫冬叔(吳耀漢飾)嘅感情戲。 雖則兩人的對手戲勉強只係得兩場，但由一開始老夫老妻之間的閒話家常，到之後的陰陽相隔，鮑姐在神情變化的精確掌握已經去到出神入化的地步。而其後關於鮑姐對冬叔屍體自然自語一幕，當中對丈夫的思念逐漸渲染整個場景﹑感染所有觀眾。哩場戲以至鮑姐在片中的演技絕對係本片的一大亮點。
另一位要講講嘅當然係錢小豪。未入場前睇簡介知道本片實際上係小豪嘅半自傳，所以都有點期待小豪點樣演繹返自己。其實基於小豪以往所飾演嘅武者類角色，個人當然唔期望佢會突然黎個梁朝偉上身。而就錢小豪在片中有限的文戲戲份而論，其個人獨有的氣場及孤癖的表演已在開頭將戲中小豪的絕望無奈流露出黎(雖然話佢係東南亞殺手會更有說服力)。到之後被小白兩母子的遭遇所感動軟化，小豪開始對周遭環境及前路重拾衝勁。哩種衝勁即使並非明刀明槍地爆發出來，但對於一個岩岩由俗底被人所救的邊緣人士黎講，嗰種仿佛由裂縫滲出嘅熱血先係貼近角色性格的適當表達。可見錢小豪對自己戲中應有表現及用戲的掌握都頗為理想，亦為戲中”貧乏”的戲份挽回唔少掌聲。
睇完《殭屍》，本人就唸返起細個睇殭屍片嘅回憶，最後發現自己其實唔係記得返好多。每個人都會有屬於某一個年代的美好時光。不過無論幾唔捨得，總會有個限期去提醒我地要繼續前進。@肥狗仔@對本片印象最深嘅一句對白就係九道長的金句: “千奇唔好除咗個面罩!”。再回想起舊陣時嘅清裝殭屍用道符就可以將之封印，嗯…回憶又返黎喇…各位Post76嘅版友，你地睇完《殭屍》之後又會唔會勾起返某個時期的珍貴回憶? 定還是帶著無奈嘅心情離開戲院?
個人評分: 7.1/10
>
有你既支持，就係我地最好既推動力，齊齊參與
「有玩、有FUN … Post76.com」
<
歡迎進入我地論壇對本文章發表您的回覆啦^^”
http://www.post76.com/x2/forum.php?mod=viewthread&tid=173921&fromuid=16
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
