本身係想入手一個普通的智能磅，測下體脂，磅下重就算了。點知搵搵下見到呢個磅好勁，我地以前想知自己體脂、心電圖或者血管狀況，一係就去醫院做體檢，一係就去 Gym 借佢地D專業器材用。但呢部 Withings Body Scan 原來都可以係屋企玩到，雖然貴，但見佢又係法國公司，又有APP支援。就膽粗粗入手一部，順便同大家開箱。
首款分段測量肌肉同脂肪分佈嘅智能磅
一拆盒見到個「手柄」，就知 Withings Body Scan 唔係普通磅咁簡單。佢標榜係全球首款可以分段測量肌肉同脂肪分佈嘅智能磅，仲可以做埋 6 導程心電圖同神經健康評分。
三千幾蚊買個磅，聽落好似好奢侈？但諗深一層，如果每日朝早企上去 90 秒，就可以由心臟、血管到神經系統睇到晒自己嘅健康趨勢，呢種「預警系統」對我哋呢啲開始關注自己健康既朋友來講，其實可以話係「貴買平用」，可以接受呢。
獨家「伸縮手柄」：實現分段式身體成分分析
一般智能磅只靠雙腳測量，而 Body Scan 配備咗一個收納式手柄（內置 4 個電極）。透過手柄同磅面合共 8 個電極，利用多頻生物電阻抗分析（BIA），可以將身體分成 5 個特定區域（軀幹、左右手、左右腳）分別測量脂肪同肌肉含量。呢點對健身或者想針對性修身嘅朋友非常有幫助。
實測連接：極簡法式 App 體驗，數據一目了然
買得呢類頂級健康 Gadget，最怕就係設定麻煩。Body Scan 支援 Wi-Fi 同藍牙雙連接，小瑟實測過，只要喺手機裝好《Withings》App，開住藍牙，佢就會自動搵到部機。最正嘅係佢行 Wi-Fi 傳輸，即係你平時磅重唔使特登攞住部手機喺身，數據會自動「SYNC」上雲端，你遲啲開 App 慢慢睇返都得。
旗艦級數據：唔止磅重，仲係你嘅「家用醫療檢查站」
呢部 Body Scan 之所以稱得上係「磅王」，係因為佢整合咗多項專業級健康監測功能。首先，佢配備咗醫療級 6 導程心電圖（6-lead ECG），每次磅重都能同步偵測心房顫動（AFib），對於壓力大嘅香港人嚟講係極佳嘅心臟保安；配合血管健康監測，透過脈搏波傳導速度（PWV）算出「血管年齡」，幫你預警動脈硬化風險。
更厲害嘅係佢全球首創嘅「神經健康評分」，透過測量腳底汗腺反應，評估自主神經系統狀態，提早發現因生活習慣引起嘅神經病變跡象。
佢支援多達 8 位使用者自動識別，仲有針對運動員、孕婦，配合 USB-C 充電一次用足一年 嘅強勁續航，呢部 Body Scan 簡直係將一間小型診所搬咗入屋企個廁所！
🙋♂️用法好簡單，大家只要好似下圖咁，赤腳企上磅—＞雙手緊握「伸縮手柄」，Body Scan就會用大既３０秒時間逐步測量。
進階玩法：Withings+ 增值服務
如果大家想有個更深入既玩法，大家仲可以加入埋佢地既收費服務叫 Withings+ (以前叫 Health Mate+)。簡單嚟講，Body Scan 本身啲硬件數據（重量、心電圖、體脂、神經評分）係免費睇嘅，但如果你想部機變成一個「私人教練」或者「健康顧問」，就要靠呢個 Subscription。
如果你只係想精準監測數據，免費版嘅 App 其實已經好夠用（所有主要指標都可以睇返）。但如果你係想有人「鞭策」你，或者想更專業咁解讀啲報告，Withings+ 先至係完整體。
年年驗身之外，日常保健都係值得投資的玩具之一！
呢部機賣成三千幾蚊（建議零售價 HK$3,458），雖然比起普通智能磅貴一截，但佢整合咗 6 導程心電圖、血管年齡同神經評分，其實可以想像成係買緊一部「家用健康檢查站」。對於我哋呢啲想隨時掌握自己身體數據、簡單快捷了解健康狀況嘅朋友嚟講，的確係可以更方便、更深入咁睇到好多隱藏指標。
但當然，呢部機係絕對唔可以完全代替去醫院抽血、照超聲波嗰類詳細嘅身體檢查。所以我建議大家將呢部 Withings Body Scan 視為一個專業嘅「智能家居健康守護者」，用嚟做日常數據監測同預警。以呢個角度去睇，呢三千幾蚊都算對自己同屋企人值得嘅健康投資！
