東九龍影迷準備！影藝戲院今個暑假放大招，正式殺回九龍區，帶來雙重驚喜！繼銅鑼灣JP同青衣城後，影藝再下一城，第三同第四間分店「CineArt Hollywood」同「CineArt MegaBox」即將喺鑽石山荷里活廣場同九龍灣MegaBox閃亮登場，暑假開幕即刻掀起電影熱潮！
CineArt MegaBox：7年後重返，IMAX with Laser震撼登場
「CineArt MegaBox」喺九龍灣宏照道38號10樓，係影藝自2018年告別九龍灣後，睽違7年嘅重磅回歸！呢間戲院有7個影廳，當中最搶眼係東九龍首塊、亦係區內唯一嘅IMAX with Laser巨幕！呢個頂級技術帶來超清晰畫質、更光亮同高對比度，色域表現應有大幅提升，畀到大家可以好好享受IMAX巨幕下嘅視覺衝擊！
CineArt Hollywood：東九龍最大型戲院，型格登場
率先開幕嘅「CineArt Hollywood」喺荷里活廣場3樓，佔地38,000平方呎，樓高兩層，設6大影廳同約1,600個座位，穩坐東九龍最大型戲院寶座！設計走簡約潮風，以影藝招牌薄荷綠為主調，購票大堂同檢票區寬敞舒適，長廊設計清新有格，畀影迷一入場就Feel到輕鬆Chill爆嘅電影氛圍，睇戲前已經心情靚晒！
影藝戲院一貫堅持搜羅全球精選電影，打造高質大銀幕體驗，務求將每間戲院化身社區文化地標，等影迷有個必去嘅電影聖地。票價同優惠詳情仲等緊公佈，記得Keep住留意！
CineArt Hollywood
📍 地址：鑽石山龍蟠街3號荷里活廣場3樓
CineArt MegaBox
📍 地址：九龍灣宏照道38號10樓
影迷們，依家有番2間戲院，記得多D去戲院睇戲呀！
