首先要多謝Post 76同各版管又一次帶俾我地版友一個令人眼(耳)界大開的好節目，仲邀請到耳機達人Cato Mak講解左咁多有關耳機o既知識，等我地可以做一個精明的影音玩家。
更加令人高興o既就係，我有幸可以贏到呢對由日本著名耳機品牌Final Audio Design出品o既Piano Forte II。經過幾日o既試聽後，我當然要發揮76精神同大家分享下聽後感啦。

Final Audio Design呢個牌子來頭原來認真唔少，本身係生產號角喇叭的專家，亦係好多著名日本品牌的代工生產商。佢o既耳塞旗艦型號Piano Forte VIII, IX, X以原粒不鏽鋼，黃銅和鉻銅鑄造，價值逾兩萬港元，而我手中這枚Piano Forte II係呢個系列o既入門版，設計o既概念同高階型號如出一轍，只因製造物料由原粒鑄造金屬改為ABS塑膠，因此生產成本大幅降低，等用家可以幾百元o既價錢就可體驗到呢個設計理念。

外型及佩戴舒適度

先講外型，此耳機係主流的開放式耳塞，十分輕巧。上網查過，分別有藍色同啡色兩種顏色，而我手上的亦係我較喜歡的啡色。雖然耳塞本身物料為ABS塑料，但因為佢外層塗料係金屬塗料，因此呢對所謂啡色的耳機看上去其實都散發著銅的質感，十分高貴同討好。

耳機本身設計並沒有耳膠和耳棉包裹，我估係為左避免耳膠同耳棉對聲音做成干擾，等聲音可以直接由耳機本體傳遞到耳道吧。此外，比較特別的設計係耳塞部分不是如一般設計般整個耳塞都是發聲單元，而只是由一個突出的短少管道部分將聲音集中傳導到耳道。不過，由於沒有耳膠同耳棉包裹，佩戴一段時間後的確會有一點不舒適。

聲音特性

由於入手時間不久而我又急住同大家分享，所以煲練o既時間不是太久，只有約20小時，不過總體而言，我相信為大家簡介呢個耳機o既特性還是可以的。

基本上，我係聽玉置浩二《酒紅色的心》HQCD、Olivia Ong 《Fall in Love With》、胡琳《Bianca Live》、Diana Krall《Live in Paris》、Michael Buble 《It’s Time》同Michael Jackson《The One》呢幾隻碟後得出以下聽感的。我本身出街無玩開耳機，用o既只係跟機耳機，屋企就有個AKG K702耳筒，所以我會以佢地黎做比較。

我覺得呢個耳塞本身特色應係著重聲音o既線條及結像，著重分析力同輪廓。人聲表現亦不俗，係提供到不錯o既空間感之餘，人聲又俾到埋身o既感覺。基本黎講，我覺得呢個耳機係適合聽一啲Acoustic類型o既歌曲，因為佢表現到比較寛闊o既音場，樂器與樂器之間亦表現出清晰o既分離度，而人聲亦不會太過有距離。不過，不知是否耳機未run-in o既關係，我認為人聲好似收得過急，稍欠感情，而且低音似乎稍有不足，量不夠之餘亦潛得不深，喜愛聽Rock同Bass o既玩家就未必啱口味了。

驅動條件

驅動方面，我試過用手機同前級去聽，用前級時表現係夠優越，音場較闊，但又未至於係差別好大，所以我相信一般來講，淨用手機或I-pod等裝置去推動是很足夠了。

總括來說，以幾百蚊價值來講，我覺得對入門用家會是一個不錯選擇。

圖＞

圖／文：batbat

＞

歡迎進入我們的影音玩樂討論區發表意見.
http://www.post76.com/discuss/viewthread.php?tid=121210

*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***