成日都聽科林上好多師兄講換 Fuse, 小瑟不嬲都真係好小換機內的 Fuse, 就算換, 都係換英式插頭內的 13A Fuse, 因為簡單好多, 又唔洗拆機, 又唔洗理幾多A, 不過近年因為轉左美式插, 其實都好小用到英式頭了, 所以換Fuse呢個玩意都好耐冇玩。上次換左 Pioneer LX500 之後, 都試過下換左機內的 Fuse, 依家換左 LX800, 又點會唔試下呢??? LX800換 Fuse 就比較覆習, 冇 LX500 咁簡單了, 一拆一裝, 再裝返個機箱, 就攪掂, 所以今次小瑟就唔係屋企玩, 轉移陣地去左 HDAV 的試音室, 可以大炸特炸麻 !!😉
Pioneer LX500 示範拆機換條 Titan LX
究竟換機內 Fuse 難唔難的呢?? 其實一D都唔難, 大家只要有六角匙同一枝十字批就掂架勒, 就以 LX500 為例, 機身左右各有三粒六角匙的鏍絲, 大家只要找對2號的匙就可能輕易開到架勒! 最後再開埋機後的4粒十字鏍絲, 慢慢就可以將機箱打開架勒!!😍 但如果大家係要換 LX800 呢?? 咁就覆習好多了, 因為 LX800 同 LX500 的組件都非常唔同, 如果大家用緊 LX800又想換 Fuse 試下, 小瑟會係 Forum 討論帖上留返條片比大家了解一下呢。
LX500 開機寫真照 + Titan LX Fuse規格
開機箱之後, 不忘要影個全相比大家睇下啦, 機內光盤都有蜂巢式硬金屬機頂設計, 用來防止震盪, 左邊下方黑色的就係電源部份的底板, 今次要換的 3.15A Fuse就係呢粒呢! 再來就講下呢粒 Fuse 的規格先 : 『Titan lx 採用稀有金屬銀合金導體, 超高純銅 fuse cap, 水晶級石英管，獨特之處是管內藏有礦石粉末，其配方的主要化學成份是無機的硅鋁酸鹽，包括有十多種微量元素，礦石粉末體積非常幼細，能誘發遠紅外線及負離子能量，有效吸收保險絲管內的諧振，降低輸入電流內存的諧波失真，有效提升電源系數，確保更佳的電流穩定性及純潔度。』老實講, 呢炸規格如果唔係寫出來, 叫小瑟讀一次真係冇可能讀到呢!! 🤷♂️
任何電源性的東西都有方向性呀!
再換上同一規格的 Fuse 就可以了, 不過大家要留意的是, 一般來說都會有方向性的, 所以如果大家要入手同電源有關的補品時, 最好就係問一問電源的方向點插最好, 如果真係唔知, 就可能需要試下二個不同方向的聽感, 一般來講, 如果方向岩, 基本上音場的闊度都會寬廣一點的, 如果方向錯了的, 聲音都會有機會縮埋向後, 連音場都好似窄左咁, 聽落都會幾明顯的. 不過最慘一樣野就係, 好似我地呢D迷你影院玩家, 如果你要我來來回回試幾次開箱關箱去做測試, 真係會好想死的….所以最好真係買野時, 可以知道個方向性, 一野插入就岩就最好不過呢!!😎
Titan LX Fuse 的方向應該是什麼呢???
就以今次 3.15A 的 Titan Fuse 為例, 問過代理之後, 得知原來3.15A 的A字方向是需要向LX500的電源方向, 咁就已經可以得出最好的效果, 大家要留意一下勒!!
誠邀 HDAV 副編輯一同實試 Pioneer LX500 & LX800 效果
去得 HDAV 就一定會有 Luis 係度, Luis就係 HDAV 的副編輯了, 今次呢條 Fuse 我地試哂二個可同的 Pioneer 4K UHD 藍光機 LX500同 LX800, 咁難得既機會, 一定要搵埋 Luis 來同大家分享一下呢, 如果大家都想知究竟我地二個點睇呢條 Fuse, 唔好講咁多, 去片(Youtube影片)!!!!
Conclusion：「兩部都有提升….影音既野都係….一分錢一分貨啦!!!」
好多人都會好迷信地覺得, 換左條電源線, 換一粒 Fuse 會即時將一部 $5000 元的器材, 變成 $8000 元的器材, 如果咁樣諗的話, 相信你應該玩AV冇耐呢…^^”, 其實換左任何野都好, 提升可能都只係幾個 % 或者唔同左聲, 不過就係呢個改善, 大家都好希望可以更進一步而入手, 呢個就係毒海的威力呢~~XDDD 。 講返先, 換左呢條 Power House 的 Titan Fuse 落 LX500 之內, 其實係好明顯地部藍光機的聲底會唔同左, 畫面光位同黑位明顯地提升, 令畫面的立體感更進一步, 不過想話去到 LX800 的級數係未有可能, 而聲音方面的改變, 更加係要睇下大家自己喜歡的是什麼樣的東西, Titan會為藍光機的中高音突出左成個圈都有, 理論上可塑性是可以有更多的. 反觀 LX800 的提升就真係比較全面, 聲音同畫質都有好平均的升幅, 效果上性價比係幾唔錯的, 如果已有 LX800 的朋友, 都係值得一試的呢。
論壇試玩活動『返歸玩Fuse』名額兩個
依家小瑟手上都仲有二條全新的 Titan LX Fuse 可以比二位 Post76 的忠實版友借返去玩的, 如果大家都有 Pioneer LX500 或 L800 的話, 請係以下帖子回覆留言, 承諾借返左之後, 會係呢個帖子回覆分享返上手試玩左之後的感覺, 咁就可以借返去玩二個星期架勒。
會員借玩帖 : https://post76.hk/thread-290167-1-1.html
