上次小瑟就問 Pioneer 借左部 LX800 4k jb藍光影碟機來左個開箱快試 (🎥詳情可點我睇片), 講講下原來都成三個月前了. 不過上次的試玩, 已經足以另小瑟心痕不止, 而且試玩時間真係太短, 得果幾日又要返工, 邊有時間試足部 LX800 真身呢…….所以一不做, 二不休, 部機反正都可能係4K世代的最後一部旗艦, 所以直接入手一部可以慢慢玩, 都唔算太過份呢, 尤其近日已經聽講有………JB, 就係咁, 同大家來個 Pioneer UDP-LX800 開箱文啦!
開箱實測Pioneer LX800 4k 藍光 jb 強功之處
UDP-LX800 貴 LX500 一倍有多, 究竟入面有咩唔同呢??? 首先最明顯一定係重量, UDP-LX800 淨重達 13.8kg(30.4磅), 而 UDP-LX500 則重 10.3kg(22.7磅), 差唔多達10磅咁重, 唔好睇小呢10磅8磅, 事關唔係打舊鐵入去咁簡單, 而係由電源開始, UDP-LX800 由開關式電源升級至 EI 變壓器，而用於供電、碟盤/數碼處理及模擬音訊既線路板都被劃分為三份不同組件, 用來消除線路板之間的電磁氣干擾。而且更加係分區之間設置高剛性橫樑，可以進一步穩定內部結構，內部佈局亦針對減少振動及訊號流失作最佳化設計。加上擁有名車級精密避震及聲畫分家的高端特性, 其特製金屬殼的用料特性和其接近 “零諧振” 的光碟播放理念, 都一一加進 UDP-LX800 當中。
ES9026PRO 旗艦晶片再加入 Transport Mode堅正
今次開箱發現Pionner UDP-LX800 今代4k 藍光 jb用上兩枚 32bit ESS Sabre ES9026PRO 解碼晶片, 左右每聲道各使用一粒, 而且都會用盡 ES9026PRO 內置的 8 聲道解碼功能為訊源做解碼, 而且除了 Direct Mode 可以關掉數碼線路之外, 仲加入 Transport Mode 呢個另 AV友興奮的功能, 絕對係AV發燒友必用的, 事關一直以來我們玩4K機都好小可以關去模擬部份, 反而用部 4K機來聽歌關去數碼部份就比較常見, 今次 UDP-LX800 竟然可以將模擬部份關掉, 讓 LX800 真正變成一部只可以睇 4K UDP的訊源, 係畫汁同聲音的穩定度上絕對係正呀!!
- Direct 模式即關閉數碼音頻及視頻輸出，從而對模擬線路有干擾的可能性減低。
- Transport 模式即關掉模擬音頻部份輸出，從而對數碼線路有干擾的可能性減低。
剛性底盤實現高剛性及低重心
UDP-LX800 用料的確係對得住其身價的, 點解咁多人都會鐘情於日本製的器材, 相信唔洗開箱，只要大家了解過佢地對細節的造功, 就會明白點解Pionner LX8004k 藍光 jb會值呢個價錢. LX800 用上 1.6mm 厚底層機殼以及 3mm 厚不鏽鋼板加固。呢種雙層機殼結構可以提供低重心及加強機器總體的高剛性, 對於防止外來震動轉往至內部機箱非常有用, 因為所有的器材最怕其實就係”震”, 尤其係物理光頭需要做光碟讀取的就非常明顯呢。
玩得 Pioneer 又點可以唔提 Bitstream PQLS 呢????
玩得 Pioneer 如果你係好似小瑟咁, 用埋佢地既 AV 擴音機, 咁 PQLS 絕對係一定要試的, 因為呢個 PQLS 功能絕對係 Pioneer 影音系統的一大王牌, 呢個由 Pioneer 獨家研發的 『PQLS精準石英鎖定系統』, 配合返自家AV擴音機同藍光機例如，SC-LX901 及 SC-LX701(AV擴音機), UDP-LX500及 UDP-LX800(4K藍光機), 都可以對應. 而且仲係簡單地透過 HDMI 以 Bitstream 形式將全無抖動的多聲道聲頻資料, 由『訊源』交到『擴音機』解碼, 對音色既完整度會大大提升呢。所以如果大家都係 Pioneer 西裝的用家, 就記得在 HDMI Control 內設定為 “AUTO”, 而藍光機都係 “AUTO”, 咁二部機就可以對應到 PQLS 呢個模式, 再爆起機上黎, 你就會知道準確同穩定的音效係咩一回事呢.😎
一開機最好全部設定成 Auto 先
著左機之後, 又同大家分享一下小瑟基本的設定先, 小瑟係用雙 HDMI 輸出 Sony A1 同 Pioneer SC-LX901, 一般好多野小瑟都會先以 Auto 的方式去讓幾部不同的器材自己做個對接了, 確定所有器材都正常使用, 同埋玩在器材因為已經行HDMI的關係, 其實大家都會互相交換 “情報” 對上或對下係什麼機, 咩牌子, 支援什麼基本上器材間都會溝通的, 呢個就係好多朋友成日講的 EDID, 有左呢個EDID 幾方 “握好手” 之後就可以正常睇戲架勒. 當然大家都仲要自己開返 HDR, Dolby Vision, HDMI Control 之類的個別功能來用盡部機呢.
三個月後的煲機之成果…..
由開箱至今三個月，其實睇左既戲真係唔算太多, 不過Pionner LX800 4k 藍光 jb有好多位都真係比到小瑟幾唔錯的新鮮感. 今次會試的都係一些比較舊的4K影碟, 因為呢D戲小瑟成日播, 而且新喇叭都需要一點時間煲的, 所以今次同大家分享就係以下幾隻電影同兩隻近排成日都會聽的唱片.
實試4K UHD電影 : 《The Greatest Showman – 大娛樂家》
呢套戲可以話係 2018 年最好試器材的一套音樂電影, 首先畫面顏色舒服自然, 而且音效有 Atmos 的加持下, 有好多首歌曲的效果都另你過足『Surround』引. 唔係D聲飛來飛去果隻喎, 而係比音樂緊緊地包圍果重感覺喎. 小瑟一開始一定係先試第一章, 曉治積曼開首的一場, 雖然短短地, 但每一下的低頻夾雜腳步聲, 如果器材分析力差一點, 其實都會有一陣陣模糊感. 而加入 UDP-LX800 的加持之下, 每個細節的重點都可以聽得到, 包圍感好好, 好舒服, 完全可以將電影內的環境帶進小瑟的腦內, 尤其係低頻的清脆感, 感覺又再圓滿多一點, 呢個同之前 UDP-LX500 有一點點不同的是, LX500 好爽快, 每件事物都好精準, 玩 Surround 係非常之正的, 但埋身感就冇咁近, 而 LX800 就可以滿足埋呢點之餘, 最緊要係畫面的立體感同睇既野可以多左, 仔細左, 不過原裝預設的畫面比較暗, 小瑟需要在 Video 設定上做一點調校去就返小瑟 OLED 的畫面會更好。本片中很高對比度的場景亦都係非常好試的, 如 Jenny Lind 首次開金口 Solo 一幕, 如果大家記得, 當幕起之後的一幕大光燈射出來的光環, 在 LX800 上可以話係順滑不得了, 而且皮膚紋理、衣物層次，都相當逼真，極富現場感覺。值得一提既係, 大家可以試下開/關 Transport 模式試下, 無論係聲音的立體感同通透度都會好左, 唔信又試下哩!!!^^”
實試入門 TaraLabs RCA M3 聽歌 : 《Adele 21》
小瑟連 Hi-Fi 友都講不上, 因為家中位置有限, 只可擺到一套機, 二者取其一之下就用玩了家庭影院, 雖然係咁, 但有時都希望可以好好地咁聽下歌, 享受下音樂咁. 所以一直以來都係CHEAP CHEAP地咁聽歌的, 以前就 OPPO UDP-205 咁 RCA去 Pioneer 聽歌, 之後換左 UDP-LX500 一排直頭冇聽過歌咁滯. 依家換上 UDP-LX800, 就係櫃囉返條 Taralabs RCA M3 來插返上去試下吧. 睇戲會用 Transport 模式, 聽歌用 Direct 模式去聽, Cut 哂所以數碼野之後, 難得係小瑟呢套咁唔似樣的器材上都可以有一點點溫暖的音樂感, 尤其係聽《If it Hadn’t Been For Love》時, 結他的聚焦力同弦聲的餘韻聽得都幾開心架.
Conclusion：「下集就要講下開箱三個月點樣”釋放” Pioneer UDP-LX800 4k 藍光 jb 的可玩性勒!」
其實玩AV真係好抵玩的事情, 大家可以諗下, 一部萬多元的4K UHD藍光碟機已經係頂級旗艦型號, 入手埋之後已經去到最盡, 當然大家都仲可以改下電源, 換下電源線, 玩下 Fuse 咁. 但最主要的 “機頭” 就已經唔洗再頭痛了, 比起玩兩聲道動輒數萬什至數十萬先叫入門, 玩AV係咪明顯抵玩先.😁 講到呢度, 其實有留意的朋友都知道 P 記近日都係國內推出左最新的 JB 版本, 之前小瑟都一直唔敢出手, 因為聽講又話要開機箱, 又話會變磚, 又話返唔到轉頭, 冇左保養等等……但大家可以放心了, 因為小瑟已經同部 UDP-LX800 Flash左呢個由國內『高清先生』親手製作的 Pioneer UDP-LX500 & UDP-LX800 破解版本軟件, 下星期就同大家分享點樣 “釋放” P仔的可玩性, 同埋過程係點呢, 記得留意勒~😉😁
