距離上一次的 Demo 碟已經係 2016年九月份了, 而當時都仲係1080p的藍光格式, 二年之後的今日, 小瑟好開心收到由 Dolby 方面寄來的 2018 全新 Demo 碟, 仲要係 4K 版本, 今次呢隻碟係有哂 Dolby Vision 同 Dolby Atmos 係哂碟內, 唔講內容之前不如來睇下實物圖先啦.
畫面流量超勁但 Atmos 音效跟以往不同
大家最關心的Menu 終於來了, 今次冇得比大家選擇用那個格式, 但小瑟測試所得, 新碟 Atmos 竟然係用上 Dolby Digital Plus 編碼, 平均流量1.5MB左右, 比例平時用的 TrueHD 格式的 4-5MB左右為小,而且音壓非常之細, 小瑟開到 0 先叫開始有D感覺…….. 究竟點解會有呢個舉動呢??? 小瑟就同Dolby 方面了解中. 但碟中所有章節的畫面都有Dolby Vision, 平均流量40-50MB左右, 就小瑟以 Sony A1 OLED TV + OPPO UDP-205 +Pioneer SC-LX901呢個組合去試睇, 其畫面的顏色深度絕對係非常非常非常的超鮮艷, 小瑟就係一邊睇時, 需要即時一邊調校去將顏色減省先可以, 小瑟覺得呢個唔係碟的問題, 而係一直以來我地睇的都係電影, 而電影的中影像基本上唔會有太誇張的鮮明感的, 只係在Dolby自己的原創內容上先有呢個情況, 畢竟呢隻係一隻DV+DA的示範碟, 而DV的對像大多數都以 RETAIL 店為主, 呢個考慮小瑟都絕對明白的呢.
Conclustion：「世界大勢正在改變，今次會唔會係 Dolby 最後一隻實體示範碟呢？？」
事隔二年可以親手放隻碟入去 4K藍光機去播放 Dolby Demo 碟, 老實講, 真係百般感受的, 事關知道世界影音市場在急劇變化, 由今次呢隻碟的內容安排, 取材都看出 Dolby 對未來影音市場的睇法, 內容好明顯已經係電視為主, 所以其畫質的比重係比聲音的比重多好多, 呢排小瑟成日聽到好多同業都會講, 依家仲邊有人玩AV丫, 個個都話買唔到樓, 有樓又冇地方玩, 的確手機的出現真係改變左成個地球, 好多小瑟細個時好想要的東西, 例如係屋企可以睇戲, 可以炸機聽歌, 漸漸發展下去好似真係已經成為”發燒友”先會玩的玩意, 但其實在小瑟細個時, 同父母同住都好, 都會霸左屋企一個廳來買一部CRT大電視, 一部LD機, 一部牛肺AMP加一對喇叭去睇電影, T2, 演唱會, 有左AV之後, 就連睇悟空打斯路都覺得特別好睇的, 依家人人都話玩AV係發燒的玩意, 其實有需要咁定性嗎??? 小瑟都玩過 Philip 套裝 5.1系統, 仲玩左三年咁多, 為的都係好希望可以係屋企仲有一件玩具係自己喜歡的, 享受的………………….抱歉又同大家舒發心中情…..講返正題先. 今次呢隻碟比到小瑟的唔係什麼聲畫的感覺, 反而另小瑟心中暗驚, 呢隻 2018 Dolby示範碟會唔會係最後一隻示範碟呢? 未來究竟仲會唔會出呢D碟比我地玩呢??? 唔知, 但睇風向, 就好似真係了!!!!
番外篇 – 最絕的 Dolby 示範碟
話說呢隻碟到手之後, Hugo都有囉返屋企試下, 點知就出左以下畫面………原來唔支援 Dolby Vision 的系統係連畫面都唔會出到的, 即係如果大家想播呢隻碟的話, 就一定要成抽器材都係 Dolby Vision Ready先得的…….@@” 今早聽完 Hugo 囉隻碟返公司第一句就話………杜比最絕的示範碟, 聽完真係比佢笑死呢!!XDDD
……………………………….完!!
