611323兄我諗大家對佢既頭象都唔陌生, 大大隻QUAD, 好明顯就話比大家聽, 佢係一位不折不扣既 QUAD FANS, 係呢日, 我地一行三人有 “小瑟, 245141525(祺哥), rlwk2009(九爺)”, 就係收工之後, 由祺哥呢位隱形車手, 一車就車左我地入將軍澳呢個咁靚仔既私人屋苑, 等我地可以輕輕鬆鬆就去到 611323兄(ROY兄)既屋企勒.
依家 私人屋苑, 個個都有個平台花園, 小瑟去到係呢個平台花苑等亞 ROY哥, 真係零舍精神, 一來平台上, 真係鳥語花香, 二來人潔地靈, 聽 ROY兄提及, 佢呢個屋企, 有不小名人居住, 好似鍾嘉欣呀, 廖碧兒呀, 都係呢個居苑既居民, 係度住, 真係好似感覺高人一等咁架……………死……點解講講下好似賣樓盤廣告咁既….~_~(事關小瑟真係好恨可以住入呢D咁正既私人屋苑呢!!!!)
好, 入正題, 入屋勒, 我地一入到去, 二個字講哂, “整齊”, 如果比多二個字我講, 我都只可以係講”整潔”, 我地睇得出 Roy兄係一位對住屋環境非常之有要求的人, 白色的地磚, 白色的地櫃, 白色的牆身, 每件器材都安放得非常之整齊, 企企理理, 活像就是一個岩岩搬入冇耐的安樂蝸, 我相信J2的節目上來ROY兄屋企家訪, 一定大把野講呢~~~哈哈!!!
先整個ROY哥當日比我地家訪時, 客廳既器材一覽表大家睇下先!!!^^”
MAG PLASMA TV
Yamaha RX-V765
NAD 326BEE
Cayin CDT17A
PS3
Quad12L2
B&W HTM62
Mirage Nanosat
M&K KX12/SFH-PX
大家睇ROY兄頭像都知道, 佢係QUAD既FANS來, 而呢對前置+2CH既書架喇叭, 就係ROY哥每晚收工時, 係屋企休息時候同佢渡過左好多個漫漫長夜既 Quad12L2, 配搭起 NAD 326BEE 同 Cayin CDT17A CD機, 聽歌的確係比AV AMP來得更好享受呢!!
B&W HTM62 的中置喇叭, 我諗都唔洗我多介紹, 大家都知佢有幾正呢!!!!
而電影既藍光部份一就交由PS3負責勒!
而負責ROY兄既家庭影院心臟的, 就是這部 Yamaha RX-V765 AV擴音機勒, 而 NAD 326BEE 就係負責 PRE-IN 由AV AMP提供既前置信號, 去完成呢個半影音分家呢個任務的!
而SUB仔方面, ROY兄就係用左出哂名既 M&K KX12 SUB仔, 大家都知道, SUB仔SIZE真係一吋長, 一吋強, 而呢隻12″既M&K就絕對係M&K系列來講, C/P 值極高既型號之一.
好勒, 介紹完影音方面, 係時間同大家介紹一下2CH 系統勒, 呢部 CD PLAYER Cayin CDT-17A, 我諗有留意開 2CH既朋友都知道, 呢部17A係以真空管作模擬輸出, 仲係有真平衡 OUTOUT的高質CD PLAYER來的, 而售價都算係非常之平易近人(街價好似5-6K左右), 我地今次有幸可以係家訪當中, 一試呢部有極高評價既 CD PLAYER, 真係不往此行呢!!^^”
下面大家見到既就係 2CH既 INT.AMP, NAD 326BEE, 而下面既, 就係SAMSUNG 既DVD PLAYER, 嫻時ROY兄其實已經極小開佢架勒, 放係度只係因為…………….念舊既呢~~XDDDDDDD
高清電視接收器, 就係由HKBN香港寬頻提供既, 當日本來想試一試畫質的, 不過唔知係電視的問題還是呢個解碼器既問題, 最終都未能順利開到………@@!
好勒, 去到呢度, 我地都介紹得咁上下, 而ROY兄就介紹左我地呢度靚聲CD, 呢部好野原來係ROY兄既精選中既精選, 一張大陸的女聲發燒錄音 – “Semmy呼吸我”, 我地見到有D咁既好野, 當然係二話不說地叫ROY兄開比我地好好欣賞一番呢~~~~~^^”
當日我都不太記得聽左邊一首章節了, 只係記得音樂同人聲來得非常之舒服, 女主音唱歌的味道厚聲得來非常之有感情, 而音樂的伴奏溫暖非常, 大家熄哂燈去欣賞, 再配合ROY兄呢個咁有品味的聆聽環境, 小瑟同九爺, 祺哥三個人, 簡直就係好似進入左一個清新無淨的世界內…..WOW………..好感性呀~~XDDDDDDD
大家睇下祺哥……幾陶醉………熄哂機都仲未返到來呢~XDDDDDD
好勒, 我地享受完一輪之後, 係時間搵D野爆爆佢勒, 呢次我地就搵左呢幾套戲來, 為 ROY兄套機, 熱身一番呢~~~~
我同九爺一般都會先聽聽本身已經設定好哂既環境, 先了解一下玩時既效果, 再同ROY兄傾傾有咩特別覺得想再好D既地方, 好, 我地一於試聽一陣先!!!^.^
之後就開始用返最基本既步驟去為整套系統還完返最基本的設定先, 好多朋友係SET機既過程中, 都會SET多好多味精類既野, 好似EQ啦, 音壓啦, 喇叭既距離啦, 有好多時大家玩玩下, 越攪套機越唔滿意, 最後攪攪下, 好似連自己都攪到老鼠拉龜, 冇定埋手咁, 其實好多時大家都會跟隨好多科林上既師兄弟既建議做一些設定, 但好夕時, 其實大家都未必明白固中的道理, 最終就會變得弄巧反拙, 其實 SET機既野, 大致都係萬變不離其中, 不過就係呢個”萬變”, 往往都係要經驗同實戰得出黎既理論, 先可以好好咁控制到依家設定中既系統, 究竟口味同聲向偏左向那一個方向, 當然, 最緊要都係首先要先了解哂自己想要D咩先, 始終, 玩HIF又好, 玩影音都係, 都可以係非常之個人既野, 雖然 THX 的規定上, 係有一系列的規定及建議, 但大家又有冇留意, THX 永遠都唔會講什麼音色, 什麼高中低頻之取向, 因為聽音樂會同睇戲, 就好似大家睇女仔, 睇男仔咁, 各花入各眼, 人人都唔同口味, 冇話一定人人都鐘意李嘉欣呢XDDDD, 好似小瑟咁, 我就比較鐘意關芝林都冇話唔得架麻, RIGHT!!!^^”
其實 SET機呢個步驟都真係幾好玩的, 因為可以一路SET, 一路同九爺交流一下, 大家又可能係唔同既設定經驗上, 分享到唔同既心得, 所以我同九爺二個都好喜歡家訪就係咁解呢, 最緊要好玩丫麻~~XDDDDDD
小瑟到依家都係最鐘意用呢個 “Radio Shack 數字版音壓計” 始終, 睇數字都一定準過枝針FING 來FING去, 正正係75就75, 一定冇錯~~~
其間, 小瑟都有同 ROY兄傾下計, 主要都係要毒下佢換野啦………就好似ROY兄依家服役緊既 MAG PLASMA TV咁, 只係720面板, HD READY, 老實說, 畫面的確係強差人意, 始終都係5-6年前既第一代產品, 仲想佢做到 D咩呢, 佢可以頂到依家, 其實已經好強啦, 真係難得ROY兄仲可以忍受佢………(不過原來佢係有原因可以頂咁耐的, 因為…………一陣後話再同大家講下, 個原因真係好攪野的 X_X!!!)
SUBWOOFER方面, 信號線同電源線都係用緊原裝/普通線材, 係效果上, 小瑟覺得仲有好大的進步空間呢~~~~
好勒, 之後就到PS3的調校, 我地今次難得可以請到一向都只睇唔落手既祺哥出手為 ROY兄的PS3作出調校, 相信 ROY兄一定非常滿意啦~~XDDDDDD
雖然係 720P PLASMA, 但我地都希望可以試試調校一下, 睇下可唔可以調出對比度同顏色可以更好的校果呢~~~
好勒, 終於都基本既設定做好左, 一於搵套戲來試試先, 就先搵套 MR & MRS. SMITH 港版藍光碟來試試先, 呢場我相信大家都記憶尤新的, 當中既爆炸, 飛車定位, 絕對非常好試的, 而我地初試彼發覺, 中置人聲同前置效果聲, 唔係好夾, 對上前置既效果唔係好夠, 好, 一於再作深入小小既調校先.
之後我同九爺再入YAMAHA度作再三逐個SETTING入去再設定一次, 將前置同中置喇叭既分頻點同音壓作調校, 再試一次, 中置同前置終於都合返埋一齊了, 而上前置既效果亦都唔會特別標左出來了, 不過就始終 SUB仔既校果就係唔係太明顯, 奇怪………..~_~
之後我地再測試功夫熊貓既搶包包一段, 當中既筷子轉動, 同二師徒跳來跳去追逐時既定位, 整體音場, 係YAMAHA的處理上, 已經叫做得非常之好呀, 而聽歌方面, 我地四個都覺得聽歌效果的確係唔錯, 可能呢個就係居功於, 前置喇叭同中置喇叭都係屬於音樂類既喇叭, 所以係處理音樂時, 會顯得更得心應手, 處理洽當呢!!!!
係我地做完哂所有既調校時, 傾開計知道, ROY兄原來用PS3係有原因既, 因為佢都幾鐘意睇日本高清節目, 所以佢就會選用PS3來儲存哂佢既珍藏片刻, 而我地當然唔客氣, 叫ROY兄開返幾段比我地欣賞一下啦, 依家大家睇到既, 只係最普通既一段, ROY兄仲有好多好野………….既日本MTV, 我都冇一一影哂同大家分享呢~~~哈哈~~~ (大家係咪以後有咩好野呢~~XDDDDD)
連電源拖板都用上呢個咁好既收納器, 點可能唔再讚一讚ROY兄對家的要求, 係幾咁一絲不苟的呢!!!!^.^
我係主題都同大家講左, 611323(ROY兄)的設計之家, 大家可以睇到, 雖然可能 ROY兄的器材未係最新最強, 不過佢屋企既舒服程度, 絕對係最舒服同最美觀的, 每一樣野, 都顯出佢呢位設計師的風範, 而每一個細節, 都可以睇到佢同佢太太都係非常之愛整潔既人, 呢次我地有機會可以踩入佢屋企, 我相信真係絕無僅有, 可一不可再既一次家訪呢!!!!
如果唔係我地, 跟本就唔會出現呢個咁混亂既場面呢~~XDDDD
另外要多謝 ROY兄好客氣地, 請我地食左一餐好豐富既PIZZIA, 仲有小瑟最鐘意食既雞亦呢~~~哈哈!!!!
後記: 今次能夠有機會可以去到呢個咁新穎時尚既家庭影院, 作一個小家訪, 的確係非常之開心, 過程中, ROY兄其實已經密鑼緊鼓地, 準備升級手上好多既器材, 包括, 玩投射啦, 換藍光機啦, 換LCD TV啦, 好多好多不同既大計, 而就係我地家訪之後唔夠一個星期, 小瑟已經收到佢買左OPPO 93, 可以比佢方面出雙HDMI, 來迎接呢個投射機係佢屋企出現既日子, 不過, 當日, 我地大家都問, 佢其實真係有好多野可以升級, 但都未攪, 我地先知, 原來 ROY兄既房, 用緊既就係 40″既 SAMSUNG FULL HD LCD TV, 入面仲有一個部 PHILIP 7300既藍光碟機, 我地成班即時”扯聲四起, 估唔到, 全屋最好既野, 竟然係係哂房, 真係玩屎呢~~XDDDD
呢個家訪出街之日, 小瑟知道 ROY兄已經更換左好多好多野, 大家睇佢個簽名就知……………….
Panasonic AE4000/OS 80″/Pioneer LX-53/Yamaha 765/Marantz SR4600/NAD 326BEE/Cayin CDT17A/OPPO 93/Philips 7300/PS3/(F)Quad12L2/(C)B&W HTM62/(S,FH)Mirage Nanosat/(SW)M&K KX12/SFH-PX
小瑟就咁睇, 已經非常之想快D再上佢度玩玩, 二部AMP依家究竟係點安排呢?? 部93究竟係係廳定係係房呢??? 個OS 80″會唔會又係係房呢??? 好多好多既問號, 我都好希望可以再次上去親自驗證一下呢~~~~~~~^^”
.
.
.
歡迎進入我們的影音玩樂討論區發表意見.
http://www.post76.com/discuss/viewthread.php?tid=72039
*** 溫馨提示：想更緊貼更多影音界的最新資訊，請到 http://www.facebook.com/post76 的專頁內頭頂按「讚好」加入我們，每天就會收到全新的中文影音免費資訊呢!! ***
