等左咁耐，Cowon嘅最新旗艦終於上市，鐘意韓「磚頭」嘅玩家又多一個選擇啦，筆者試玩時有「再會老朋友」嘅感覺，事關筆者第一次接觸數碼音樂，就係玩佢地嘅產品，我係由iAUDIO CW100時候開始玩起，係2000年檔期MP3機選擇唔多，大部份嘅人都係玩 iPod，小數追求音色嘅朋友就係用i Audio產品，至於點解識玩?咪就係多得一班好好嘅朋友lor。好聲就人所共知架啦，只係當時無諗過呢個牌子會越出越靚，仲可以越玩越「High」。近日，Cowon就出左一部叫 Plenue S嘅超級旗艦機，性能比以前我以前玩開嘅「D3」強勁好多? 點解差咁遠都拎黎講?因為D3係第一部 Cowon嘅 Android機嘛，如果無記錯亦應該係第 一部冠名叫 Plenue嘅機，所以對佢印象特別深。好啦，廢話少講，一齊睇睇 Plenue S有咩咁「超級」。
搭載 Burr-Brown PCM1792A 晶片，原生支持DSD 256(11.2MHZ)
Plenue S最大賣點除左係用Burr-Brown PCM1792A晶片次餘同時原生支持DSD 256(11.2MHZ)，目前市面上只有為數唔多嘅頂級播放器先會支援，Plenue S亦同時配有雙 TCXO Clock，即係「石英晶體振蕩器」，唔明係乜野黎唔緊要，因為呢樣野係數碼音響先會用到，作用係用黎產生原始嘅時鐘頻率，數碼傳送由電腦送到解碼,需要有一個準確時間速度。越準確嘅情況低下失真越低，可以控制Jitter。如果都仲係唔明亦唔緊要，你只要知道佢會幫到你提昇音質就OK啦。其次，Cowon機種必備嘅 JetEffect亦要一提，功能係EQ切換，除左系統預設50種效果俾大家玩之外，亦可以自已設定，可以除時因應唔同歌曲切換，唔講唔知，JetEffect已經去到第七代啦。
強勁硬件呈現細緻，音檔不足絲毫畢現
硬件方面 Plenue S屬於市場上最高規格產品，除左晶片靚，有強勁平衡輸出之外，亦有TCXO時鐘，原生支持DSD 256(11.2MHZ)之餘仲有Optical Out可以俾人當DAC用，有埋Cradle可以玩，咁勁硬件都只係204g重量，都算係咁啦。由於此機採用Linux系統，介面流暢完勝國磚，有指針顯示令發燒玩家感覺良好，3.7吋屏解像度雖然唔高，但顯示資訊清晰，唔會出現 Android系統機卡頓毛病。可能因為機身有時鐘處理平衡輸出亦有特別落功夫，所以幾乎聽唔到底噪，但 Plenue S對檔案好挑剔，如果RIP得唔好或只用網上檔案聽歌會將音軌上面嘅沙沙石石完全呈現，不過買得 Plenue S都應該係對音樂好有要求，RIP碟辛苦DD應該唔介意啦。任何產品都有優缺點，Plenue S對象似乎係終極發燒玩家，所以缺點係門檻比較高，除左售價較一般DAP貴之外，自訂EQ亦會考下用家音樂底，唔識玩 EQ買 Plenue S就限制左部機發揮，變相玩少左野，但它亦有多項預設的EQ可供大家使用，都算廠家細心。此外 Plenue S聲底比較傾向流行曲特化，動態同音牆未至於非常勁，所以聽交響樂會無咁豪邁奔放，當然打開 JetEffect又可以有改善。
∇ Plenue S採用一體式金屬機身，機身採用了CNC加工技術，十分堅固，機身正面寫有Plenue Logo。
∇ Technical Rounded開關掣置於機頂右方，屬於呼吸燈設計，機體運作時呼吸燈會閃爍。
∇ 機頂的插糟有兩個，分別是3.5mm的phone out及3.5mm Balance out，雖然3.5mm比較罕有，但此3.5mm卻是四極平衡輸出，宥助控制諧波失真。
∇ Control button位於機身右側，官方於按掣分隔及配置有下功夫，按起來相當順手。
∇ 機背掙用坑紋設計，有防滑效果。
∇ 側身圖，可見機身厚度，磚頭機來說也不算肥。
∇ 機體本身內置128GB容量，Micro SD卡插糟位於機身左方。
∇ 充電位置於機身下方，底部的接觸點另有用途。
∇ 是為了配合Cradle使用，Cradle可以作XLR輸出，擴充性較一般DAP豐富，但如果可以跟機附送就太好了。(發夢ING^^”)
∇ 同場加映兄弟機Plenue D，幾乎是市面上體積最細的DAP，圖中可見兩者身形。
音質及音色方面
初步測試時發現 Plenue S走分析力取向，聲音清徹，聽古巨基Guitar Fever《眼睛不能沒眼淚》時，結他撥弦的聲音非常清晰，每次撥弦也感受到彈跳力，音樂富立體感，每個音符清晰浮現，清爽乾淨，將 JetEffect切換至POP模式時，人聲更較出，人聲厚度同音牆都有所改善。接著試聽譚詠麟《霧之戀》，人聲非常立體通透，順滑細緻，惟小弟手上無CD版，無得比較MQS係咪比CD版突出，但用 Plenue S播放 MQS版效果相當唔錯。試聽之後發現 Plenue S最擅長中頻，聲底亦屬典型韓系聲底，分析力良好，聲音中正，人聲通透，密度良好，推力亦唔錯，雖然未至於極為力大無窮，亦推唔順超大食耳機，但推入耳式耳機亦合格有餘，而出名大食嘅 IE800 開八成聲就夠晒推，當然 IE800本身對推力都未算大食一類，但對機體控制力要比較高，亦可以感受到 Plenue S控制力唔錯，其次 Plenue S聲音幾中正，雖然第一下感受可能會覺得分析力充足但無咩色之處，但聽耐D會發現 Plenue S極之耐聽，唔似某D國磚開聲果下好刺激但聽耐D就會頭痛。其次Plenue S 嘅 JetEffect同自訂EQ百玩不厭，小弟用IE800同535、T5P甚至用電話跟機耳機去聽時，聲音亦都匹配，亂搭亦唔會肥腫，更唔會過於刺激，幾款耳機都可以有唔同發揮，當然以上幾隻耳機都有唔同特性，係呢度就唔花太多篇幅去講，然而可以咁百搭某程度亦拜 JetEffect所賜，聽唔同歌用唔同 Setting時可以令耳機優點更為突出，所以我試聽時都玩左好多Effect，同一首歌可以有唔同變化，新鮮感十足。
Conclusion : 「小巧聲靚，可塑性強」
見到網上好多人話部機唔值之類，小弟認為視乎大家負擔能力啦，畢竟音響野可能少少提昇就貴多D，始終 Hi-End 的發燒友，就是需要多一點，就是多一點，這個好視乎大家把尺點去度，小弟認為對於識玩又有要求嘅發燒友黎講 Plenue S不論制造工、技術、功能、擴充性，都非常豐富，如果錢唔係燒友們最大考慮，那不妨去馬，始終終極器材不是金錢可以去衡量的。至於同場加映嘅兄弟機 Plenue D呢，我己經入左一部用，當然聲同做工都及唔上 Plenue S，所以我送左俾女朋友做生日禮物，無他嘅，因為佢唔識用 iTune入歌，用電話聽歌又食電，Plenue D又靚仔又細部，都非常岩女仔使用，最緊要係佢隻耳仔都比我毒到燒燒地，所以佢要求都唔野少的。
