剛過去的星期六(7月20日),小瑟又去亞博睇演唱會。今次係睇阿囡最喜愛的 Ian 陳卓賢嘅 solo con,而呢次小瑟就帶咗可以拍攝 4K/60p HDR 的 Sony Xperia 1 VI 手機,測試一下在演唱會中咁複雜的環境下可以如何處理。
其實小瑟睇好少演唱會的,因為一來平日比較忙,時間上安排有點難,二來買飛都的確係“非常非常非常的難”。而今次有機會可以睇到 Ian Chan 陳卓賢 的 TEARS IN MY SIGHT SOLO Concert 2024,可說是辛苦都係非常值得的。
一來可以同阿囡一起有個回憶啦,二來其實今次演唱會的 rundown 可以睇到陳仔在音樂、影像、劇情上真係好用心去讓大家進入佢嘅世界!首先,亞博真心講,小瑟非常唔鐘意,上次睇 Mirror 時已經睇到周身痛,因為唔可以直望,要長時間彎身去睇 show 係一件非常辛苦的事。
而今次 Ian 就非常好將舞台用鯨魚般設計去讓佢可以有少少“四面台”的效果。另外就係用上大量管弦樂樂手去將陳仔嘅歌雖然唔洗大改編曲之下就已經可以有一個幾耳目一新的感覺。可見佢係可以為咗讓樂迷同觀眾感受到對音樂的熱誠而不惜成本去做一個佢的個人音樂會回饋樂迷!
燈光亦都一絕,今次小瑟坐係地下位,直望向上見到好大個 LED 四方盒,入面的影像夾埋音樂、燈光。曾經有些時間小瑟感覺到有睇哥哥(張國榮)的“紅”演唱會的感覺,意境同藝術氣氛好重,睇得非常投入。而講開投入不得不提“《另一個諾貝爾》及《仍在》的章節”,劇情及歌曲之感染力可以感動到身邊有不少 fans 都眼濕濕。而陳仔之後的一番話亦說出今次演唱會的主題“TEARS IN MY SIGHT”中的淚可以有好多不同的原因,不同的淚水,亦都希望大家可以藉由陳仔帶比大家嘅音樂好好舒發大家日常的情緒!非常有意思。
今次小瑟睇的是第二場,我地準時 10:59 分就完場。雖然冇之後場次的 encore 部份,不過已經可以好好咁享受到一個超高質又流暢的個人音樂會。好鐘意佢用咁多管弦樂去豐富佢嘅歌曲,歌曲編排好滿足到忠粉/喜歡佢音樂的樂迷。(佢有《二期大樓》同《鯨落》就好好了,如果可以有埋《背伴》同《蝸牛》就更正了)。
小瑟雖然睇 show 比較少,不過呢次的滿足度係完 show 之後,有一個“如果可以有 4K UHD 藍光碟推出比大家收藏就太好了!”雖然香港可以製作出一個“藝術與娛樂”成份並重的高質演唱會唔係咁多歌手做到,今次陳仔做到了!而且佢又係現今香港流行樂壇中新一代唱作音樂人,人氣同吸金力應該都不成問題。問題只係佢公司有冇呢個心,有冇呢個遠見可以幫佢做好個人音樂之路。點解咁講?以 Ian 陳卓賢依家嘅歌曲數目,要出個人大碟其實都冇咩難度,但到今時今日就係冇可知一二!!
@iancychan 努力做好音樂。全部人都係用耳聽歌的!一定會聽到你帶比大家的訊息的!
![](https://news.post76.hk/wp-content/uploads/2024/07/20240720_190310765-copy.jpg)
![](https://news.post76.hk/wp-content/uploads/2024/07/vlcsnap-2024-07-23-13h49m26s032-1.png)
![](https://news.post76.hk/wp-content/uploads/2024/07/vlcsnap-2024-07-23-14h49m55s029-1.png)
![](https://news.post76.hk/wp-content/uploads/2024/07/20240720_223152734-1.jpg)