每年這個時間, 小瑟都會睇返上年自己究竟寫左D乜. 從而了解一下自己呢一年之內做左D咩? 但今年好唔同, 現時的疫情其實比年頭一樣勁, 但好彩大家都終於都明白其實死守係冇可能的了, 所以由8月開始已經見到市面上的氣氛完全唔同了. 大家都希望在這個年尾時間補返年頭做唔到野的時間. 所以工作上的時間就會更緊張!! 而今年本來都希望好似2019年前的, 每年的12月2日我地都會找一個地方同一眾76的版友來個版聚, 見見面, 食個飯. 不過今年的”疫情”數字其實一直都係高居不下, 如果要大家出來一圍12人食一餐晚飯的話, 又應該會好多人都有D擔心. 種種原因之下, 今年我地20週年, 加上Youtube訂閱衝破10萬大關, 我地就決定係網上進行慶祝活動了!
黎緊2023年, 我地會一直在香港同大家報導同分享各式各樣的家庭影院, 音響, 玩樂的影音資訊, 而科林上我地依家都計劃緊會唔會有機會可以來一個更新, 大家又覺得科林大家想點玩可以增加到大家的參與度呢?? 不妨去返我地呢篇文的討論帖內分享一下丫!!
呢20週年其實都見證左小瑟由當年玩玩下, 開個SERVER仔做新聞組, 同網上岩傾的朋友吹水. 到今天幸運地成為左香港一個小小的影音社群, 讓有睇Youtube, 玩FACEBOOK & IG的朋友除左係以上幾個社交平台之外, 都可以有一個我地自己人任傾任講的影音討論區. 不受任何干擾, 不受演算法影響, 可以在論壇向大家請教. 就咁睇自家”討論區”呢家野好似已經 OUT左, 不過咁多年來小瑟一直堅持保留呢個地方, 就係希望就算有一天, 出面網上世界變成點都好, 我地都仲有一個自己的地方, 可以比會講中文的朋友, 可以有一個地方去自由地討論, 分享, 所以就算每年成本以5位數字的支出都好, 小瑟都依然要保留就係咁解!!! 希望每天都會入我地”科林”睇野, 傾野, 講野的版友, 都可以同小瑟一樣, 係度可以找到一個歸屬感, 一個自己人的天地!!!
祝大家事事順利, 身體健康!
小瑟
2022年12月02日
