生於古代的女性，可能連選擇自己人生的權利也沒有，就如楊貴妃，即使得到皇帝寵幸，享受榮華富貴，擁有世俗眼光所謂的「幸福」，但最終卻因紅顏禍國之罪名被賜死。
Connie 就話生於現代的女性，我們可以更獨立自主，自強不息，自由自在地做喜歡的事，最重要的是擁有選擇自己路向的權利，尋找自己的幸福，活出精彩人生，即使我們並非貴妃，但可以比貴妃更矜貴！
「非妃」的創作班底來自一個新團隊，是Connie首次加入古箏演奏家何瑩瑩團隊的第一首原創歌曲，由意念、創作、到執行，包括錄樂器、混音、MV構思等等，整個製作過程Connie都有很大的參與度，而這次再度與監製鄧洐輝合作，Connie上年推出的第一張HiFi大碟「Beloved Connie」當中有多首歌曲是由鄧洐輝所監製，包括「天下無雙」、「印象」等等，這次選擇重回錄製這張唱片的舊地「二樓後座錄音室」錄音，感覺特別親切。「非妃」結合了中樂及西樂，配合歌曲故事的古代及現代的元素，中西合璧，望樂迷會留下特別印象。
歌曲故事背景是借古代歷史人物楊貴妃的故事去與現代女性作一個對比，去啟發我們看待幸福的定義，究竟什麼是真正的幸福？在「非妃」 的MV中，結合了古代及現代的時空交錯，假若有平行時空，另一個你又會是怎樣生活？經過年代的轉變，我們慶幸生於現代， 能夠自由自在地享受海闊天空，做自己想做的事， 而MV當中的八位現代女性，積極地活出自己的人生，分享了她們對「幸福」的看法，反觀貴妃只能活在一個不見天日的房間，更突顯現代女性能掌握自己人生的重要性。
Connie分享一些點點滴滴
Connie：「非常榮幸得到古箏演奏家何瑩瑩團隊嘅邀請，可以主唱呢首咁好聽嘅歌，而且仲可以一齊創作，交流，我第一次聽呢首歌嘅demo已經好鐘意，好想演繹好呢首歌，所以由填詞到編曲，再到錄音，混音，都不斷同團隊溝通，改良，希望做得好啲。全首歌由零到正式出街大概三個幾月，所以整個製作過程都跟得好緊密，由零到第一步，一百步，到完成，就係因為咁，每個production嘅步驟都加深左認識，好興幸有呢個學習機會，可以令我就算係疫情底下冇工作都可以好充實，雖然我哋唔係咩大製作，但我哋好認真，每個schedule 都唔會甩，可能因為咁，感動到大家比我任碌人情卡唔嬲，好好彩真係遇到好多人幫我地，所以大家一定要留意credits出現嘅所以嘅人名，包括歌曲同MV，大家真係好有心，最重要係大家都參與得好開心，令我除咗好想唱歌之餘，下首歌都可以再跟埋個production，雖然係辛苦啲，但係好享受，好好玩，好有滿足感！首歌係講現代女仔係可以創作自己嘅幸福，而今次嘅創作機會令我覺得好幸福！希望大家感受到首歌嘅意義！
至於喺MV入面，我就好似一個現代人返咗去古代，見到憂鬱嘅楊貴妃，有種前世今生嘅感覺，感覺幾新鮮，雖然整體拍攝大致上好順利，但係其實每樣野都唔會一帆風順，我哋都發生咗件非常蝦碌嘅事，其中有一幕係要有個雀籠困住隻雀嚟拍攝，點知佢係studio飛咗出嚟，我哋已經捉唔番佢入去，工作人員要即刻去買返隻，雖然進度有少少受阻，但係後面都追得返，但係到咗戶外要拍另外一幕係放隻雀出嚟，但新買嗰隻雀，放極都唔走，放咗好多次先成功，所以現實係有好多嘢估唔到。而拍MV嗰日，前兩、三個禮拜幾乎日日都落雨，我哋都好擔心，唔想甩進度，因為牽涉外景，天氣先係最話事嗰個，好好彩我哋嗰日拍完外景先落大雨，仲要紅雨，好感恩可以順利完成。」
幸福掌握係你手上
另外，今次MV其中一個部份係八位現代女性分別係自己嘅工作環境工作，展示佢哋自信、美麗嘅一面，而拍攝佢哋嘅shot我每次都出席，全程係度，見到佢哋每位都有自己嘅個性，有佢哋嘅堅持，有好talent嘅，好有愛心嘅，好樂天嘅，好勇敢嘅等等，令我好佩服，「世上叻人何期多」每一次唔同人分享佢哋嘅故事，都比到我一啲啟發，即使叻人又好，唔叻又好，我相信佢哋背後都有佢哋嘅故事，所以每個人追求嘅嘢都唔同，想要嘅幸福都唔同。所以希望大家睇完呢個MV之後，會諗吓乜嘢係自己真正想要嘅幸福，希望大家都可以為幸福而努力，擁有幸福。
會員小遊戲
好多謝你地睇到最後，Connie想送一份小禮物俾Post76嘅朋友仔。只要大家喺下面答分享你最幸福嘅事，即刻有機會獲到「非妃」Single CD一張。名額得三個！千祈唔好錯過！Connie會係2月25日選出3名朋友仔獲得「非妃」Single CD一張。
Connie Hau 侯慧寧《非妃》Official MV
