小瑟今年第一件換的新玩具就係呢套 Wharfedale D320 + D300C 前置同中置喇叭, 話說上次係東哥度聽完之後, 再係 DES 會場聽到佢出來的聲音, 比佢果份廣闊感所吸引, 而且呢三隻喇叭的價錢真係非常之抵玩, 就係身痕之下, 就迎左佢入宮呢。
香港最難玩得長久的『海綿邊』低音重現江湖
今次換上呢套 D320書架喇叭 + D300C中置, 4寸及5寸海綿邊低音單元小瑟覺得絕對係焦點所在, , 4Ω的阻抗, 65Hz-20kHz 加上靈敏度 86dB, 功率 20-60W, 其實係一般玩家庭影院的朋友已經夠用, 而且呢個規格支援好多入門級的 AV 擴音機都非常不錯, 而大家見到除左海綿邊之外, 低音單元用上 Kevlar物料, 呢個物料一般用於船身、飛機、頭盔和防彈衣上的合成纖維, 其實多年前已經開始用到係喇叭單元上, 評價非常不錯！海綿邊其實大家對佢都又愛又恨, 愛……是 因為那份剛柔並重既低頻, 打出來非常舒服, 而且低頻的質感有說不出的柔軟感, 非常討好, 不過最大問題就係香港的天氣, 潮濕的天氣另外好多單元都無法耐用. 而呢隻新型號 D300 系列就會塗上一種可以令海綿邊變得更耐用的塗層, 再配合代理做到五年的保用, 相信大家的信心都會即時大增吧!
WFR 軟膜高音單元及設計用心的聲箱
D300 系列用上廣闊響應頻率高音單元(Wide Frequency Response), 再加上非常多的組件拼合出來，兩個高音音圈推動一種特別物料軟膜產生出來的高音, 感覺開揚, 非常討好. 而音箱方面, 前面板 28mm厚，有利於擴散。而最過引的就是其底部有一個差唔多可以成隻手掌放入去的氣孔向下打, 非常適合我地屋企細細, 擔心後牆喇叭太近影響音效的玩家呢!^^”
小三元寫真照
講左咁耐, 小瑟都同三隻喇叭影左好多寫真照, 不如就同大家分享一下呢套喇叭的線節, 之後再同大家文字分享一下聽感, 如果大家都希望可以睇片, 亦都可以係本文最上找返小瑟開箱條片睇睇, 小瑟都會同大家即時分享返第一身試完的感受呢。
實試家庭影院第一感覺 : 《Ghost in the Shell – 攻殼機動隊》
首先要試的就一定係小瑟至愛試之一的《攻殼》, 爆玻璃一幕玻璃爆碎聲打埋身呢下其實真係好好試, Pioneer LX-901的音壓用上 -10 度, 開場的音樂已經比到一份新鮮的音樂感小瑟, 而去到戲肉爆玻璃一刻, 效果明顯比之前埋身了, 之前的包圍感比較遠一點, 這個埋身感覺有一點似小瑟上次試玩 Pionner LX800 時埋近場距離感覺, 但當然投入感同埋身的程度都仲換上 LX800 仲有一點點的距離, 但又咁講, 前面三隻小三元加埋索價只需五千幾蚊就有得玩, 可以比到呢個效果小瑟已經非常不錯呢。
PAT PAT痕 換隻腳仔玩下先!
小瑟試左一排, 原裝腳仔想加釘腳係有D難度, 因為小瑟本身粒釘都幾大粒, 所以要加腳就只可以將原裝的膠腳拆走先可以, 不過好彩一枝六角匙已經可以攪掂, 換左腳之後, 升返高小小隻喇叭, 感覺就更加開揚, 整個音場都可以升返高, 包圍感同立體感又好左, 正!!!
Conclusion : 「又一隻效果超出身價的入門抵玩喇叭!」
小瑟今次之所以會咁大膽又入手新喇叭, 最大主因都係因為價位同外觀都相當吸引, 所以就係新年前快手換左屋企對小三元, 希望可以係新年時可以毒下D親戚玩下家庭影院啦. 始終呢套喇叭 D320呢隻咁企理, 聲音質素又唔錯的書架加一隻D300C中置, 價錢只係 HKD$2980(D320 ) + HKD$2380(D300C), 為返都只係 HKD$5360就可以換哂前面三隻, 以性價比來講真係冇得輸, 而且對 D320 用來聽兩聲道的確係好正, 小瑟係屋企用部AV AMP聽歌時都發現, D320出的低音果份甜美, 層次分明, 係比到人好舒服享受音樂的一類, 所以無論大家係聽歌或睇戲為主的, 都絕對值得親身一試.
查詢：輝煌影音有限公司 (2137 5637)
