食好野系列今次同大家介紹近排分店開到周圍都係嘅【三多炸肶】！顧名思義，「三多」嘅主打係港式經典小食之一嘅「炸雞肶」，到目前為止喺全香港九龍新界，經已有11間分店，究竟係乜野令到佢哋賣炸肶都可以開到成行成市呢？
(互聯網圖片)
原來「三多」於2002年喺大埔起家，一間小店只係做街坊生意，冇任何宣傳，只係靠客人嘅口碑，一個傳一個。喺互聯網發展迅速下，「三多」呢個名亦開始多人認識。去年創辦人嘅兒子更加同朋友將「三多」 衝出大埔。除咗喺唔同地方開設分店之外，更加批出特許經營權，招兵買馬，將「三多」呢個品牌越做越大。單單喺旺角分店，就創出一日賣出400隻雞肶嘅紀錄，非常厲害！
講番隻炸雞肶究竟有咩咁好食呢？
三多嘅炸肶不單止係即叫即炸，而且仲係生炸。出面一般茶餐廳食開嘅都會係「先滷後炸」，即係隻雞肶係會先煮熟咗，然後有order時再炸， 因為冷縮熱脹嘅原理，口感同肉質都較「實」，識食嘅朋友好容易就食得出個分別。至於「生炸」就當然可以完全保留所有肉汁，肉質食落去亦會滑好多。不過一隻雞肶由「全生」炸到熟，一般都起碼需時15分鐘。喺香港呢個乜都要快嘅城市裏面，餐廳要做「生炸」 可以話係完全冇可能，皆因一般食客都需要快又唔想等，所以唯有偷雞用個快捷啲嘅方法。
(互聯網圖片)
三多嘅成功之處就係堅持生炸，唔怕要客人等，所以雞肶嘅質素得以保持。除此之外，佢哋會用一支竹籤穿起成隻雞肶，令到雞肶唔會曲埋一舊，炸嘅時候亦比較均勻同快捷 。雞皮用上麵包槺，非常脆口，仲可以選擇不同程度嘅辣。唯一問題就係皮太脆，好易會食到個口，特別係上顎損晒。
(互聯網圖片)
(互聯網圖片)
温馨提示：如果唔想等咁耐，可以好似筆者咁打定電話落定order，預返15分鐘左右，去到俾完錢就即刻有得攞。
