我地邀得新裝修不久, 有好多野想重點提升既 Eric 兄接受我地家訪。而今次家訪的焦點所在就落其影音安樂窩中一套 5.1.2 規格的播放組合上面。至於成個系統之中, 最令 Eric 兄頭痕的是, 就必定要數「開箱」不久的一隻 Earthquake 喇叭，在擺位、分頻以至相位方面的設定上都存有不少疑問, 十分希望小瑟及擁有「THX / HAA 雙認證」專家 剛哥為他家訪一下，希望可以更了解點玩得更好呢。Eric 兄雖自稱新手, 但憑喇叭擺放位置及布局考量都睇得出落左唔少心思, 相信 Eric 兄在建構這間影音安樂窩時必定曾有「高人」指點呢。
#∇即時去片
影院佈局細節盡見心思
非常識玩的 Eric 兄日睇戲都用投影機居多, 電視機則是用來招呼老婆同仔仔, 方便佢地睇電視節目及「投放」心水影片, 非常細心。比較有心思是 Eric 兄善用了沙發背後一幅牆, 除了用來掛上一對環繞聲喇叭及投影機外, 更以「美國隊長」盾牌最點綴, 使原本冷冰冰的白色牆瞬間帶點「Feature Wall」感覺, 令這個影音空間更富「電影」味道。置於是日家訪的焦點項目 : 低音喇叭, Eric 兄就用上 Earthquake Sound 的 FF-10 型號, 論量感論爆發力都足夠應付其客廳需要。
SUB仔的分頻點 + 音量應該點 Set !?
低音方面, Eric 最近就入手大地震 FF10 這隻人氣型號。此低音喇叭特色包括搭配 400w, A/B 類高效擴音器，有效分頻能在 40Hz 至 180Hz 範圍內自由調教。至於相位則可以在 0-180 度任意調教, 方便低音喇叭擺位及調節頻段上一致性。至於剛哥在家訪中亦表示坊間很多不同「門派」的低音喇叭擺放方法, 而他自己就比較喜好如 Eric 兄一樣擺中間, 對正皇帝位, 相位較易掌握之餘, Punch 位亦較容易掌握, 平衡度亦較好。至於剛哥在設定程序正式開始前, 非常認真地量度前置左右喇叭 / 中置喇叭與皇帝位距離絕對對稱, 確保影院內喇叭的佈局左右能盡量有一致性, 以便進行下仔 HAA調校。在喇叭擺位後, 作了一番初步測試, 發現低音喇叭原來在分頻點及音量設置上都還有問題, 最終需要將低音喇叭拉出來作一些調節, 最終剛哥將 FF10 的音量調到12點鐘的中位, 及將「分頻功能/ FILTER」調盡至最大位置(180Hz), 將分頻工作交由 AV 擴音機處理就可以了!!!
「THX / HAA 雙認證專員」出手 包圍感 + 細節層次即刻出返晒來
測試環節我地分為兩部分, 其一是 「THX / HAA 雙認證專員」剛哥再次利用《轟天勇將 : 戰海豪情》及《Dolby Atmos Demonstration Disc》兩張藍光碟辨識調試前後分別。就當日所感, Eric 兄一套 5.1.2 系統經剛哥近三個多小時的翻覆調試後, 喇叭整體銜接度都有明顯的提升, 而睇戲的重中之重 : 中置喇叭, 經剛哥微調後的對白清晰度、人聲質感 (特別是喉底聲部分) 都較之前突出。由於剛哥是利用儀器, 按量化數據為每個聲道作獨立調較, 令每隻喇叭聲壓更平均之餘, 其調校更可將每聲道的音色以EQ設成一致, 另系統中每隻喇叭的銜接表現更為自然, 投入感自然大增。就調試前後多次比較, Eric 兄一套系統在調試前的感覺是中置對白未夠突出, 面對一般以對白為主的場景尚算可以, 但當要應付大動態場面, 人聲就會稍稍被蓋過, 對白不夠清晰。至於 Eric 兄在調試前曾表示天空聲道喇叭效果唔明顯問題, 在校訂後亦得以改善。被問到為何揀《轟天猛將 : 戰海豪情》藍光碟做校準, 剛哥坦言大家只要揀選一套「聽慣聽熟」的電影作校訂前 / 後比較即可, 戲種新舊返而不太大問題。至於《轟天猛將 : 戰海豪情》一片對剛哥而言是欣賞佢電影開首部份, 音效在空間感方面的營造非常了得。如一切設定得宜, 聆聽環境內的四面牆真的會被「打破」, 將片中大海茫茫環境搬到家中。
試播 Netflix 效果不俗
由於 Eric 兄在平日多數以 Netflix 上的影片為素材為主, 當日的體驗環節選材就用上 Netflix 一套《雷霆救兵》做測試。至於播放機方面, 我地就用上 Eric 兄用來打機 + 睇 4K 碟用的 XBOX One 做訊源。就現場所感, Netflix 因頻寬所限, 音質會被打折扣, 整體音色比較單薄缺乏動態, 平均音量較細, 需要將音量推倒接近七成音量 (接近 0db) 位置處先可以反映到整套系統的真實效果。就調試所得, 經剛哥「處理」後聲音首個感覺是前置與後置喇叭的連貫感都有提升, 子彈灌穿感亦相當強烈。而天空聲道效果, 片中有幕海中浮沉一幕, 經 Upmixing 聲道擴充功能將 5.1 訊號升頻至 5.1.2 效果都算可以, 整個喇叭系統所營造的埋身感都有加持。至於小瑟同剛哥亦特意為 Eric 兄教路, 點樣善用 Dolby Surround / DTS Neural:X 兩大擴充功能。由於 Eric 兄在 X-Box One 上已強制將所有訊號轉換至 DTS。如下圖兩項聲道擴充功能都以 DTS Surround 做「膽」, 在配搭另外兩種昇頻配搭。
Conclusion : 「佈局細節見心思 簡易版家庭影院參考範例」
自命為新手 Eric 兄雖話自己是初試牛刀, 但在大裝修時已計畫好晒空間分配兼攞定批文, 一「著地」已開始玩座地喇叭及 5.1.2 規格, 為日後大升級鋪定伏線。至於以睇戲打機為「主糧」的他亦十分識揀地用上一 Set 同牌子 (JBL) 做配置。簡化校準工序的複雜性之餘, 聲底的一致性及連貫性亦相對較佳。至於小瑟認為 Eric 兄的一套 5.1.2 系統只是用來睇 Netflix 同打機未免有點浪費, 因此串流影片因頻寬所限,聲畫壓縮比較大, 未能將播放系統能力盡情發揮。坦言 Eric 兄其實可盡用 XBOX One 的 4K 藍光影碟播放功能, 多以實體 4K 碟做素材, 將系統終極潛力發揮到極限, 相信驚喜程度必定會更上一層落。
