繼上次試完左拳王《雷奧》之後, 小瑟又點會唔再下一城, 玩埋 SINE 其餘的電源處理系統呢?? 所以今次小瑟就一係唔借, 一借就借隻入肉D既, 整隻新野 S-60A 雙磁力導管電源處理器返屋企, 再整多條 Zunmu《神武》電源線來個玩電西裝先啦。穩定的爆發力 – 電源西裝 SINE S-60A雙磁力導管電處 + Zunmu神武電源線
先來個 SINE S-60A 開箱實物圖
小瑟都未試過開一個咁大個箱的電源處理器, 所以在開箱時就不忘影多幾張相比大家睇下啦!!!!^^”
雙磁力導管過濾電源同屋企電源洗白白!
SINE 有好多不同的電源處理器, S-60A對上仲有一個 Gateway2 (SAF-80A), 而對下就有 S-30A, 好多版友都入手左 S-30A, 咁究竟二者又有咩分別呢??? 相對 S-30A, S-60A 內置磁力導管, 而已比 S-30A 長約一倍有多.
S-60A 內的磁力導管管身更加升級用上 2mm 厚身純紫銅, 對屏閉效能官方說會有 60% 提升 . 至於管芯用上一種名為 Nano Crystalline Alloy (納米晶體合金) 的特殊合製金屬，能阻隔外來訊號干擾, 保持訊號原整性。
睇返 SINE 的官網講, S-60A 特製磁力導管可過濾電源中的訊染波段，至於平衡式線路設計能在先行為電源過濾(正極)，再在回路時作二次電源處理，將輸出的電源徹底淨化，使音色更細膩圓潤，整體的細節、動態層次和分析力都會有所提升。除磁力導管的用料升級，S-60A 還加入了三組獨立的電源補償及獨立接地，令供電更穩定，訊噪比效果更理想。值得強調的是其機箱內注入了天然礦石沙粒，能減弱機箱內諧震共鳴，使聲音背境安靜。
SINE 最耍家的「-196°C」 超低溫冷凍處理
S-60A 最大亮點之一是金屬導體經「-196°C」 超低溫冷凍處理，令導體 (包括接線) 能大幅提升過電量，減低電阻之餘亦有助優化訊噪比。內部機構方面，S-60A 採用螺旋式接線方法，有效緩解電流衝擊。至於其他 12AWG 單支線 (共 4 條) 也用上魚鈎式接法，令通電效果更佳。而其插座背面亦架設純銅屏蔽，大大防止電磁干擾。至於其機內升級加裝的保護線路也能有效導走瞬間通過高壓電流，以對抗特強電流或脈衝所導致的問題。
專登整條 Zunmu《神武》比部 205發揮一下
今次呢條《神武》就係上次小瑟試完《雷奧》之後, 一定要試埋的電源線, 因為上次都講過, 《Nidas HC 雷奧》主要係比到大電源通過既器材係最好的, 如果比訊源, 最好都係用埋佢大佬《神武》就一定冇死錯人勒, 就係咁, 上次講過會用條《Nidas HC 雷奧》插係隻 SUB 仔度, 來一試會唔會另 SUB 仔有幫助呢?? 所以今次就問代理借埋呢條 Zunmu《神武》用係訊源 OPPO UDP-205 上勒。
《 Zunmu神武 》之所以可以做到大佬, 就係因為佢係由超低阻抗值既 MONO Copper（魔雷晶銅）為線基，線芯為 15AWG(300V / 19A), 每條 MONO Copper 都加上 Polyethylene(聚乙烯) 為線芯絕緣, 再用銅箔為正/負二極的屏蔽層, 咁做就係希望可以更有效隔絕正負極之間電流通過時大家互相干擾.
一套 SINE 西裝會帶來什麼樣的分別呢???
今次小瑟用上成套 SINE 的電源西裝去做測試, 有 S-60A(電處), Nidas Gold(金雷奧), Nidas HC(大力雷奧), Zunmu(神武), 三線一電處的組合, 正正就係要比我成套家庭影院用哂, Pioneer SC-LX901 AV擴音機, OPPO UDP-205藍光機, MK SB-12超低音, 究竟係點插的呢??? 大家可以睇下表!!!
Pioneer SC-LX-901 = Nidas Gold(金雷奧)
OPPO UDP-205藍光機 = Zunmu(神武)
MK SB-12超低音 = Nidas HC(大力雷奧)
實試上次二套 4K 藍光 Ghost in the Shell + Fast and Furious 8
呢排試機, 呢二隻都一定冇走雞的, 一個試爆玻璃, 一個試賽車, 其實一開聲效果已經非常明顯, 由 SB12 打出來的低音, 係一下一下好爽地推出小瑟的身體上既, S-60A+大力雷奧的組合的確係可以讓不嬲有小肥的 SB12 一下子就清減左10磅有多的索女 MODEL, 最爽既係走肥之餘, 一陣陣的低頻係留有餘震的, 條尾係拖得好滑, 好長, 之前有一點點的含糊都消失埋, 即時整個家庭影院比小瑟一個 “實淨左” 的感覺, 如 FF8 開賽前的引擎聲就可以輕易試出了. 另外, 部 OPPO UDP-205 有 Zunmu神武的幫助下, 畫面立體感, 連景深都好左, 而聲音方面, 7隻喇叭來回的空間感, 都比之前有明顯的提升, 之前好多人都話畫面好似小了一層”霧”的感覺, 在 SINE 成套西裝下, 小瑟就有小小呢個感覺, 尤其係爆玻璃果下的埋身感, 清楚了不小, 殺埋來直頭想避一避呢~^^”
Conclusion : 「玩電的確係可大可小…..一套西裝二萬元你又點睇??」
小瑟寫呢篇文既時候, 成套 SINE 的西裝都已經返回廠方手上了, 老實講, 依家用返舊拖板, 係周身唔聚財之餘, 仲好明顯係若有所失的感覺的, 有時D野就係咁, 失去左方知情重, 依家再睇返D戲, 炸機都好, 一來SUIB仔既小肥又返返來, 仲要感覺好似肥林林咁, 背景又冇咁寧靜, 而且大聲小小仲有D嘈雜既感覺, 呢一刻小瑟就會諗, 究竟應唔應該用二萬蚊去換返套西裝返來呢??? 正常來講如果小瑟今年冇入到部 OLED TV 的話, 呢個問題係一定唔洗多想, 一定係入手一套 SINE 去完善整個影院的, 但依家已經入左 TV, 如果再要換埋電處的話, 我諗2018年頭半年真係樹皮都冇得食都不特止, 但依家成日就會心思思睇下仲會唔會有D平平地既電處可以玩下呢!??? 唉……….有時多野試都唔係一件好事…尤其係越級挑戰左一D勁野………………!!!~_~
