上個月的影音展當中, 小瑟有搵 MIC AUDIO 國聲的 Ming 哥仔打聽過佢地音展有咩玩電新野可以同大家分享, Ming哥當時就同小瑟介紹左二款入門級新手非常玩得過的新線, 一條叫《SINE Nidas Gold》, 另一條就叫《SINE Nidas HC》二條線的定位都非常清晰, 價位入門, Nidas Gold一條連英/美式頭+IEC尾, 1.8M都只係 HKD$1320, 另一條 Nidas HC 連英/美式頭+IEC尾, 1.8M就貴小小, 但都係講緊 HKD$1880, 的確吸引, 尤其線材全經佢地最耍家的 -196℃超低溫冷凍處理, 有效改善金屬結構和導電性能, 去電順 D , 自然出來的聲音都順滑 D, 上次問過 Ming哥有成品就借二條來玩下, 等小瑟試下比部 Pioneer LX-901補補佢, 而今次同大家試玩的就係呢條《SINE Nidas HC》, 睇下會唔會好水好力左先. SINE Nidas HC電源線
全新系列 SINE Nidas 究竟係代表咩呢???
當日同 Ming哥傾計時, 佢都有講過其實佢地希望做一條力水好到位, 又干淨的電源線, 所以今次 Nidas 其實就係以北斗之拳的拳王《雷奧》命名, 而整個 Nidas 的線材都會經過 -196℃超低溫冷凍處理, 同心軸結構, 五芯設計, 用上 Polyethylene(聚乙烯)絕緣體作線身材料, 密度比一般PVC更高，當然對抗干擾能力亦都比PVC更強呢. 全線雙面銅箔屏蔽, 每股線芯有 10AWG(5.26mm²), 最高可承受 300V / 30A 的電量, 提供特高過電量(供特大後級及主電錶), 除了小瑟手上的美式 15A 插頭之外, 仲有英式 13A 插頭, 歐洲Schuko 插頭比一眾玩家任選. 小瑟將電線上手唔算好重, 亦都唔難屈曲, 對於機背唔多位的小瑟來講, 插線都算方便呢.
∇ 有得呢個 CRYO-196℃ 的標誌, 就知道經過線材經過 “超低溫冷凍技術” 洗禮, 是對提升金屬導體和缐材效能的重要技術。
∇ SINE Nidas HC 的 HC 其實就係指 High Current Power Cable(大流量電源線), 如果大家需要放係POWER AMP, SUB仔等, 總之要力水的位置就應該岩哂數勒.
∇ 每股線芯有 10AWG(5.26mm²), 最高可承受 300V / 30A 的電量, 就算係用來比主電箱去電制位都一定夠用啦.
雷奧 HC 配 Pioneer LX-901 究竟會出咩效果呢???
拉櫃, 換線, 開機, 雖然看似幾個簡單的步驟, 其實小瑟都要做好多野先可以完成, 因為家中空間太窄, 所有機架後的位置都岩岩好的, 所以其實攪一攪都冇左一個下午, 不過有時換線出來的效果就係幾辛苦都值得的, 而今次用得《SINE Nidas HC》呢條以力水為主的電源線, 當然要比部 AV AMP 品嚐一下啦, 小瑟玩緊的是 5.1.2, 家中 7 隻喇叭都係由 LX-901負責哂的, 不過我家中的都係小喇叭, 書架或掛牆的細喇叭, 其實要推得到唔難, 但如果要推得穩定同食得正所有音色都唔係咁易, 尤其係超大音壓下, 更加唔係次次都可以出到好音色的. 今次小瑟就用上近期最愛的兩套電影來試試 HC 的效果先.
《Ghost in the Shell – 攻殼機動隊 : 試槍戰同爆玻璃之埋身感》
小瑟近來最愛的必定係呢套《攻殼》了, 因為電影上映時, 小瑟去左星影匯睇時, 爆玻璃一幕玻璃爆碎聲打埋身真係到依家都記憶猶新, 好耐冇出現過的震撼呀, 所以呢套戲出碟即時入手, 仲要返屋企勁炸一番啦. 小瑟換上左 Nidas HC 之後, 都比左半個小時左右佢熱一熱身先的, 之後就再正式測試呢段, LX-901音壓 用到 -7 度, 開場的音樂沒有太大的分別, 當殺手開始出現, 背景音樂轉為緊張氣氛之後, 再連環開火, 爆玻璃等等, 用上 Nidas HC 在低頻的爆發力上, 比之前的來得好深好厚, 而且整個音場的中頻都豐厚而且有彈性, 而難得的係高音方面都可以保持到清趣, 對白明確. 而爆玻璃一刻的埋身感唔錯, 埋身的一刻係會有小小低頻的感覺在內, 唔會只係高音到埋到身, 幾好幾好!!
《Fast and Furious 8 – 狂野時速8 : 試賽車引擎低頻》
另一套就係《狂野8》, 老老實實, 套戲就真係唔好睇架勒, 冇左 Paul 始終冇左神髓, 但入面既章節同爆機位又真係好多又好正, 尤其係開場呢幕的賽車引擎聲, 真係正到冇哂朋友, 所以搵佢想試下換左線後的低頻線條會係點就最好不過了. 未開車前的以下呢場真係試低頻的好朋友, 二架車在現場不停踩空油, FEEL到徐左SUB仔工作之外, 中置的引擎都有湧住湧住出來的感覺, 因為小瑟依家前面三隻喇叭都設定左全頻咁出, 所以低頻唔會只係 Sub 仔工作, 前面三隻都會一同幫手, 所以呢個位全屋就比呢陣低音攪到震得既都震, 郁得都郁哂勒, 正式比賽之後除左低頻正之外, 前後的空間感都做得非常之唔錯, 尤其一開始二架車就真係好似係小瑟身邊行過咁, 而唔知係之前冇留意定係真係聽多左, 今次測試時小瑟比較聽多左係車呔同地面產生類似 “卒” 呔的聲音. 唔知大家有冇留意呢.
Conclusion : 「下一步一定要試埋《SINE Nidas Gold》同埋將 HC 放係Sub仔會係咩一回事先!!」
經過今次插上 Nidas HC 之後, 小瑟對 SINE 的線材有左一份信心, 事關在這個入門級價位(千多元貨仔)又有咁清晰定位的線材的確唔多, 好多線都唔會講明自己係配咩會岩聽的, 所以今次國聲呢個設定對一眾 AV 入門的朋友係最好的玩法, 而試過條 Nidas HC 之後, 又點可以唔玩埋 Nidas Gold 呢?? 睇 SPEC 條 Gold 同 HC 分別唔太大, 只係每股線芯轉成 13AWG / 2.62mm² 電量為 300V / 23A, 其實真係值得一試. 同埋講身邊有老友講, 佢將條 HC 插係 Sub 仔上, 比插 AV AMP有更大的驚喜, 呢點小瑟真係冇諗過, 因為小瑟一向都已經用緊條 Northwire Double Run多年, 一直都對佢非常滿意, 但係LX901試過之後, 又真係好想試下用係 Sub 仔上會係咩一回事先得!!!
