早前已經為大家報導過發佈會內的 A1 OLED首試感覺，而且仲有 A1 開箱同我地舉辦的 A1 試睇會亦都同 A1 短聚片刻, 但心急我小瑟當然想真正一試其威力如何啦。所以就完 Show 後特意漏夜借來一台 Sony A1 OLED 65 吋型號同大家切切實實地試下睇戲的效果，喜歡在黑位鑽研的版友都一定非常心急日系代表的 OLED 究竟效果如何。所以小瑟就來同大家初步認識一下這部心儀電視的實際效果先，一齊睇睇 Sony 4K HDR OLED TV BRAVIA A1 評測
Sony 4K HDR OLED TV BRAVIA A1 評測
好易中好易中 Plasma 玩家千萬唔好睇…..
OLED 技術近年已慢慢成熟起來，面板壽命亦都增加不少，大既五萬小時應該不是問題，況且現在已進入第三代的 OLED 面板上，光度都已可做到 LCD 的 HDR 標準 1000 nits，理論上已非常適合家庭使用。但電視市場上始終都係 LCD 的天下，難得終於有其他品牌開始將 OLED 投入生產，實在係我們一眾玩開 Plasma 玩家一大喜訊。從發布報導中，知道呢部最新 Sony Bravia A1 4K HDR OLED 電視 7 月就會抵港，先有面板上的先天優勢，再加上 Sony 電視在畫質上的多年經驗，小瑟對 A1 都投以極大的好感。而 A1 會有 55 吋、65 吋 及 77 吋三種尺寸型號可選，不過暫時 77 吋型號未有售價資料，但相信 55 吋同 65 吋都會係大多數人士可入手的尺寸呢。
∇ Sony Bravia A1 系列棄用了一般的底座式座台設計，改用以支撐架承托電視，令畫面週遭空間更為簡潔，專注力可完全集中在畫面內容上。值得一提的是 A1 無論是 Sony 標誌或是電源指示燈的設計都非常不顯眼，是較少有的「低調」設計。
機身厚度進一步纖薄化 最厚處僅得 8.6 公分
Bravia A1 邊框為超薄設計，由於其 OLED 面板能自行發光，機身厚度進一步纖薄化，機身最厚之處只有 8.6 公分。即使掛牆後亦能緊貼於牆壁上，既美觀亦不佔空間。至於座檯方面，大家只要將其機背的支撐架完全伸張 (角度成 A 字)，將能將電視如相架般架設於桌上，非常穩固。
∇ 移除機背支撐架護網後可見到大部分接駁端子 (包括 : 電視天線、網絡 LAN、HDMI、USB、耳機等) 均收納於支撐架的底部位置。至於其支撐架的右則亦收納了額外一組 USB 端子，方便作快速裝拆。
試機前先做個小小的調校
小瑟係試機前, 先囉出一隻全家之寶 THX 調校碟去做一次基本的調校, 呢隻碟其實唔係什麼勁東西, 反而內容非常簡單, 有多個不同的畫面比大家去將對比度, 光亮度, 色準作一個又快又簡單的調校, 就係因為易用, 所以有時小瑟都會囉埋出來去試一下電視機的畫面, 但近年電視的調校名稱五花八門, 已經唔再係簡單地光亮度同對比度咁顯淺, 所以都極小囉出來調校. 但今次 Sony 機因為一向玩開, 所以都知道調校要點, 所以就囉埋出來快快咁修正一下!!
Bravia A1 4K 畫質初試 – 色彩真實舒服耐看
小瑟在測試時先以 Sony 自家的幾套 4K Demo片, 及小瑟至愛 4K UHD 之一的《奪命狂鯊》、《自殺特攻》兩套作測試。細看之下都覺得無論 A1 在色準、三原色的平衡度及高光位的細節還原度方面都有極驚喜的表現。尤其係當電影一出時, 上下二邊黑邊完全實地跟機身黑框型成一體, 就係呢一下, 足以令小瑟拜倒在石榴裙下, OLED 在明暗的動態展現力方面亦更再下一城，無論是極高光或極低光的位置都有很高的細節呈現能力，A1 在畫面上絡小瑟的整體感覺是自然細膩而不刺眼，對於真實的光暗同色彩重現來得舒服耐看。
∇ 呢幅圖上, 現場睇其實係可以睇到右上角的 Hollywood 的燈仔閃動好挑機的.
∇ 以下畫面因為經過相機過鏡, 效果已經大大下降, 但我地都可以看到燈球內的小燈泡係清晰可見呢.
∇ 上一代的 OLED 面板在呢個 Demo 的測試中, 如果大家有留意的話, Paris 內是不可以呈現好獨立的小燈泡的。
∇ 來到真實環境下的測試, 小瑟至愛測試 Skin Tone(膚色), 《奪命狂鯊》中的 Blake Lively 可說是狀態大勇, 而且呢段更加可以試到沙灘上的各樣實景效果。就以呢一小段來說日光的效果光猛得來仲見到好多細節位係天空之內, 而 Blake Lively 身上的雀班亦都清晰可見, 令觀眾對電影的投入感相當不俗。
∇ 再來 4K UHD《自殺特攻》, 一直以來大家都覺得呢隻 4K UHD畫面比一般的 4K 碟來得較差, 但經 A1 “過鏡” 之後, 雖然唔可以話起死回生咁誇張, 不過耐看度同電影感都即時大增, 尤其因為本片的場景暗位什多, 本來在 LCD 上成為黑位殺手的《自殺特攻》即時變成什有睇頭。(尤其睇 Margot Robbie ^^”)
影院式喇叭系統 Acoustic Surface 究竟有幾唔同呢??
Bravia A1 搭載的 Acoustic Surface 「平面聲場技術」令螢幕能發聲。技術的原理是在薄型螢幕後方的左右兩側裝上了「聲音制動器」，以 OLED 屏幕作為喇叭振膜，從而加強聲音與影像的一致性。由於電視支架內亦加入隱蔽式超低音設計，強化低音頻段播放力。至於 A1 OLED 電視亦搭載 5 顆最高輸出功率為 10W 的喇叭單元，更可透過 S-Master 數碼擴大器技術提升音質清晰度。至於其 S-Force Front Surround 虛擬環繞音場技術，能營造出 5.1 聲道環繞音效虛擬音場。
∇ 用上《自殺特攻》噴火一幕, Bravia A1 最出色之處在於統一聲音與畫間的一致性，對白聲「對嘴」更實在，而動態表現中，後段兩段大動態音效戲，因為有其機背反射式超低音所幫助，整體的三頻態駕馭能力非常不錯，遇上大動態時的效果唔會爆音之餘仲可以感覺到有一陣低頻輸出，大家當然唔好同我地玩開的 Sub 仔比較, 但以電視喇叭來講, 小瑟覺得 SoundBa r對於 A1 來講真有一點多餘了。
畫質靚唔靚面板只佔一半功勞 圖像處理晶片都非常重要
小瑟之前成日都講, 畫面靚唔靚除了面板技術之外, GPU的處理能力都會成為關鍵, 就如一塊好牛扒都要有好廚師方能有美味的佳餚一樣。Bravia A1 用上佢地最頂級的 4K HDR Processor X1 Extreme 圖像處理引擎，三大功能可以將 OLED 的畫面發揮得最好。「物件導向式 HDR 優化」(Object-Based HDR Remaster) 、「雙數據庫運算」(Dual Database Processing) 及影像補完技術「Super Bit Mapping 4K HDR」。值得一提是 BRAVIA A1 現已支援 HDR10 及 Dolby Vision HDR 高動態範圍，相信下步會追加 HLG 支援。
Conclusion :「2.35 : 1 的上下黑邊其實真係非常累事呢….!」
今次的測試因為時間非常有限，所以未能有機會可以同家中音響來一次真正的合作，不過就以短短幾小時的短聚，尤電視開場的一刻，小瑟已深深被 A1 所吸引，無他的，電影一開場，2.35:1的畫面比例一直都係電影玩家又愛又狠的地方，廣闊的視野但灰灰的黑BAR，但 A1 一開出來的 2.35:1 黑色是真正的黑 BAR, 就連 BAR邊都見唔到，而且其自然的畫質，耐看的色彩都一一打動了小瑟的心，老實說．．．雖然我未說到非卿不娶的地步，但如果依家比我選擇要買電視的話，呢部日製 Sony A1 會係我現時的首選。(希望 Sony 睇到會比個優惠價我啦!!! 雖然咁多年都未試過@@”)
