多年前小瑟都有玩 Media Player, 當時就係要係美國訂回來先有的 Popcorn C200, 當時睇片真係非常方便, 買左隻碟返來之後, 第一時間 RIP好左 ISO放係 NAS上, 用部 Media Player一按就可以睇返, 的確係非常方便, 而時過境遷, 部 C200 魂歸天國之後, 小瑟一直都未搵到一部覺得比較似樣D的 Player 可以充當家中成員, 直至 Egreat A10 的出現!
Egreat A10 4K UHD 藍光播放器
Egreat A10 最終又點樣入宮呢??
之後好彩, 好多藍光機都會有JB版本, 就係咁, 小瑟一直就用緊 Pioneer LX88的JB版本來睇返D 藍光檔, 如是者都過左一大段時間. 到 OPPO UDP-203的出現, 小瑟二話不說就入手, 投入 4K的懷抱啦, 不過早排更新左 Firmware 之後竟然傳出未能再有 JB版本, 成件事直頭晴天霹靂, 而小瑟部 LX88又手快快更新左 Firmware所以……….(下刪一萬字)…. 就係呢個萬念俱灰之際, 老友 『赤員外』就打比小瑟, 話佢都終於搵到一部同 C200 一樣, 可以出到藍光選單之餘, 仲可以讀埋 4K 備份檔, 價錢仲非常抵玩, 只係 HKD$2988, 小瑟不嬲都信哂員外的, 佢話抵就冇其他機比佢更抵同好用架勒XD, 仲洗諗, 當晚就即時入手, 仲要即時係科林同大家分享!!(科林討論帖 : 新玩具 4K UHD Player Egreat A10) 聽完小瑟講完咁多廢話, 不如一齊來睇下 Egreat A10 的真身先啦!!
∇ 開箱後全部配件係哂度勒(其實仲有條HDMI的, 不過唔知飛左去邊了!!^^”)
∇ A10細佬仲有一個型號叫 A5, 二者其實分別係有硬碟位同冇硬碟位, A10 以三塊主板組成(主板, 電源板, HDMI), 而 A10 就有16G RAM, 而A5只有8G, WiFi 方面 A10 就支援 5G, 而 A5就只支援 2.4G, 小瑟份人比較守舊, 當年 C200 有呢個位覺得非常方便, 依家竟然仲有機附帶, 仲支援到2TB-8TB咁大的硬碟, 樣樣野都正中哂我需要, 又點會唔入 A10 呢.
∇ 面板可開的, 一開就係入 3.5吋的硬碟位置呢.
∇ 小瑟家中仲有好多RIP 落的藍光碟, 依家屋企冇位放碟, 好多都收埋哂係公司了, 所以呢類 3.5″的硬碟其實對小瑟來講就係寶庫來啦!!!!@@”
∇ 大家最關心的當然就係機背的端子啦. A10機用上8字頭電源插, 一個光纖, 一個同軸, 連最古老的三色線都仲有支援, USB有二個, 一個3.0, 一個2.0, 支援 1Gbps的網絡線, 仲有個SATA插位, 非常夠用. 但最衰就只得一個HDMI輸出, 如果佢有二個HDMI的版本, 我一定入果部呢…..~_~!
∇ 除左插網絡線之外, A10仲可以用無線連接, 不過小瑟喜歡穩定, 所以一定係插線的, 肯定最快麻!!!^^”
∇ A10的身影比一般的藍光機細, 所以一放入小瑟的機櫃內就顯得非常細小呢.XD
正式開機界面又幾靚喎……@@”
A10回到家中有一個小插曲的, 就係用佢原裝電源線的, 不過因為小瑟用緊美式拖板, 所以要用轉頭, 睇左幾分鐘, 個心硬係唔舒服, 決定返公司囉返條陳年 Ortofon 來比 A10, 一插返開機, 畫面同聲音都舒服返哂……大家可能會話有冇咁誇呀??? 冇錯, 小瑟認的, 呢個一定係心理問題多於試出分別, 但因為小瑟真係試過N咁多次原裝電源線同換條好小小的係有明顯分別, 唔係太想一開機對A10有個唔好的印象, 所以最終都係決定換左線先正式試機. 而 A10 開機界面都非常靚仔, 身邊老婆果晚仲坐係沙發睇緊書, 見我開機玩左一陣就問 : 呢部又咩來呀??? 又多舊野返來既!? 不過呢部好似睇開機畫面好似易用過你之前果部喎……@@”, 你話死唔死, 連唔識用果個都覺得呢部易用D(因為 A10有自動 MOVIE WALL會自己 SEARCH哂你硬碟上的電影再搵返封面, 所以一開佢已經覺得好易搵到戲睇…), 真係冇入錯貨呢!!!!
∇ 開機界面好易就會明白應該去邊先搵到你既電影.
∇ 呢個 MOVIE WALL 當年玩 C200 時, 要攪好x多野先可以有到, 依家不費吹灰之力, A10會自己上網跟返你電影的檔案名同你自動搵返相應的電影封面, 仲可以有系列電影表比你易於搵返想睇的系列, 真係非常之咁方便呢.
∇ 一黎小瑟都習慣唔會即時睇戲住, 反而係入左設定睇下有咩攪先!!!
∇ 我地係中文人, 睇中文界面都是常識吧.XDDDD
∇ 之後就入顯示睇下先, 佢有好多設定, 有4K電影的, 可以先選用 UHD 24Hz, 始終暫時真係睇 4K UHD藍光的話, 都係以 24p為主, 其他我暫時都不需要呢.
∇ 反而呢個色域問題就慘小小勒, 因為小瑟用的 sONY 4K電視未有支援 HDR-10Bit, 所以唔知係咪因為咁, 佢色域上係唔比我用上 10Bit以上的設定, 非常冇引呢…..##”
∇ 最後小瑟的顯示設置都只係可以做到 3840 x 2160/24p, YCbCr422 色域, 但算啦, 電視唔爭氣, 都冇計呢!!!!~_~
∇ 另外仲有D比大家在播片時的設定都非常人性化.
∇ 最後要比大家睇下個搖控, 用 C200 果隻真係一模一樣架.XDDDDD
A10操作及使用穩定嗎??? 可完美播放藍光碟嗎???
A10在小瑟手上的 Firmware 係 2017-04-28 v1.1.2.5 正式版, 而現在小瑟打緊呢篇分享時, Firmware 已經去到(V 2.1.1)版本, 文件上聲稱可完美播放 4K UHD 原盤的所有導航功能, 但因為小瑟一來未有 4K ROM, 二來又唔識將 4K UHD 的藍光碟 RIP 入電腦, 所以呢個 2.1.1 版本未有更新, 但小瑟相信未來一定可以有 4K ROM 可以自己在家中就可將所有4K光碟作備份, 唔需要心急呢. 所以依家小瑟只可以同大家分享一下呢部 A10 究竟在操作上的穩定性及聲畫的表現呢. 以下就係小瑟以【職業特工隊5：叛逆帝國】來作測試, 一開始的藍光 Menu 完全冇問題, 反應都快, 冇窒機, 可順利選擇任何章節及聲軌等.
∇ 音效方面, 串流 Bitstream 音效可輸出 Dolby Atmos音效正常.^^”
∇ 入左電影之後, 仲可以選擇任何功能, 如 POP UP MENU, 選字幕等等都可以在選單選取, 當然搖控都可以直接選擇啦.^_*!
∇ 畫面方面, 佢有個叫 “影像引擎”的選項, 一開機時佢係用 Standard 的, 小瑟個人覺得畫面太光, 有D爆光的感覺, 所以試試轉下預設先.
∇ 最後小瑟個人覺得呢個 Colorful最合個人口味, 亦都比較相近睇開的LX88畫汁, 所以用上 Colorful 呢個設定之後, 再做小小微調之後, 就正式可以開始試戲呢.
實試電影…….A10 單挑日系藍光旗艦代表 Pioneer LX88
要知道究竟 A10 對唔對究竟玩唔玩得過, 最好莫過於同依家出名的藍光機 A/B 比位一下, 因為小瑟AV MAP係用上 Pioneer SC LX-901擴音機, 要玩PQLS自不然就一定要用返系列旗艦代表 Pioneer LX88, 今次就由佢來出戰接受挑戰啦, 小瑟找來三套成日都係屋企睇完又睇, 留睇再睇的三套電影藍光版來作個比較, 今次玩法係咁的, LX88負責播放藍光碟片, 而A10就負責播已 RIP在 NAS經網絡播放藍光電影, 睇返同一段, 在聲音同畫面中作出比較. 由此大既就可以知道 A10究竟在影像同聲效上, 與 LX88 呢個價位的藍光機又會幾大分別呢.
【職業特工隊5 : 叛逆帝國 – Mission Impossible : Rogue Nation】
畫面 : 先試由 Pioneer LX88 及 A10 以SonyA7M2相機 M MODE 屏攝同一秒畫面中的效果, 左圖為 LX88 而右圖為 A10 的畫面, 小瑟可以睇到在 LX88 上的畫面明顯係清晰度同 SHARPNESS 都係勝 A10 小小的, 不過如果唔係見睇 LX88 的情況下再昂時睇 A10其實都唔會太覺存在呢個差距的問題, 而令小瑟都有一點驚喜的就係在 A10的顏色處理上同 LX88的整體感覺真係可以做到非常小的差距, 而在畫面的深度同立體感上差距亦只有 10%-20%的距離, 呢個回合小瑟可以話以價論機來講, A10 平 LX88咁多, 呢10-20巴仙的差距絕對不足掛齒呢!!
聲效 : 而聲效方面分別就相對比較大了, 因為 LX88 有二組 HDMI OUT的關係, 在影音分家及 PQLS 的加持下, 音效上明顯比 A10 來我精準, 穩定性更強, 尤以大棚野高音位更為明顯, 不過 A10 在整個氛團下其實都可以比到小瑟正常藍光機出來的應有的澎湃感及應有的細節度, 又係果句, 如果唔係A/B 比較基本上都唔會覺得有問題呢!!
(因為經過了相機的過鏡, 所以畫質只可供大家參考, 不能作為標準呢, 大家記得留意呀^^”)
【暗算 – The Accountant】
畫面 : 好多人都會問小瑟, 點解成日都會用呢套戲來做測試, 一來呢套戲後段的聲效真係好勁, 二來小瑟比較欣賞既係導演希望可以用真實的現場環境去比觀眾去投入佢既世界, 所以好多場口都的環境都比人感覺非常暗同多Noise, 但亦因為咁, 小瑟覺得用來試黑位就最好了. 現場環境中其實二者的分別唔係太大, 只係 A10 整體光位比較多小小, 但DETAIL位就比 LX88 低小小, 不過真係好小, 而A10在黑夜環境中的 Noise 比LX88多一點點, 但綜觀畫面的色彩, 流暢度同大家都不相伯仲.
聲效 : 音效方面就精彩了, 因為呢段會用上好多槍炮聲同子彈橫飛的關係, 所以用來測試一下二者對包圍感的實淨度同埋身感就最好不過呢. 先講 LX88, 埋身度同包圍感好到位, 有細槍聲有小小搶耳感, 但低音埋身感就好入心入肺, 爽呀. 而A10出來高音尖聲會比較多小小, 低頻的下潛力比 LX88 輕小小, 但感覺打心口同快左, 呢個回合小瑟都係覺得LX88做氣氛會比較好小小的.
Conclusion : 「性價比勁高而且勁方便的影音播放器!」
小瑟咁耐都冇再買Media Player, 就係因為一直唔到小瑟的要求, 而到依家同大家寫呢篇分享到呢刻, 小瑟都冇去睇過究竟 A10 用什麼的晶片, 什麼的用料去制成呢部 A10, 因為唔想有先入為主的感覺, 玩機如果下下都睇哂 SPEC先玩就一定會有心理上的影響, 在小瑟眼中, 功能同效果就係最重要的二個環節. 今次試完兩套藍光電影之後, 其實小瑟得出一個結論, 就係呢部只賣 HKD$2999 的 Media Player 可以完整到播到小瑟家中的所有電影, 操作左咁耐又未見有BUG. 雖然聲畫上係同 LX88 有一點點的距離, 不過呢小小的距離如果唔係下下都二部機囉出來睇同一套戲去A/B比較的話, 老實講真係唔係好易睇或聽得出佢地二者的分別, 而 A10又可以插返家中多隻 3.5吋硬碟, 對於將來支援 4K UHD藍光又有著光明的前景, 老實講……仲想點呢, 所以用呢部 A10 來做小瑟家中比屋企其他成員方便睇戲絕對係非常合適的一部器材呢.
團購活動已展開 : 
