不經不覺, 小瑟已經換左 Pioneer SC-LX901已經三個月有多了, 部機一返來時, 正值就係 MDLP大哥入手 901冇耐之時, 心想反正 MDLP兄都出緊PO, 我不如煲返一輪, 慢慢同部 901了解下先, 又再CAL多一次, 再了解下先, 先再出開機文比大家睇啦, 反正依家科林多左咁多野睇, 大家都唔會急睇小瑟既文架啦…..就係咁, 一煲就三個月了!!!! 未同大家講下部LX901有咩感覺同調校心得之前, 不如先來同大家分享下入手時的寫真照先啦.
∇ 其實依家的AV AMP真係18般武藝樣樣精, 食Hi-Res Audio咁濕碎既野, 一定要啦!!!
∇ 開箱好簡單, 一個搖控, 一本說明, 一條電源, 一枝天線加多一枝做CEL機的收音咪, 係咁多!!
點解個搖控”削”左咁多既??? 又係控制成本??? 咁諗你就真係 “瀨衣夫” 勒!!!!
好多人都話, 點解依家個搖控咁”少制”, 要縮水成咁呀?? 一D都唔專業. 的而且確, 小瑟一囉上手時, 都覺得貴為 P 記頂級機, 點解個搖控變成咁架? 細問之下, 因為依家所有機都有得接駁到Internet, 所以廠方可以收集到好多用家的習性數據, 得知搖控上其實最多人用的按鈕有幾多個, 佢地就將唔多人用的精簡左, 最決出來的就係依家大家見到的模樣勒!! 其實今代由LX-89 轉上 LX-901. 除左搖控之外, 就連機內的設定都簡化左唔小, 對於我地呢D升級既用家來講, 就真係好似覺得佢兒戲左D(雖然功能其實都有返哂係度….), 但大家回心一諗, 如果要吸引返一D新入門的用家, 佢地在AV擴音機未係好識點用時, 如果比返之前 LX-89 的設定佢, 老實講, 連小瑟一入去都覺得唔知邊樣打邊樣, 岩岩入手的玩家們又點會識呢??? 而唔識的話就會覺得太難太專業, 最終就離開呢個AV的毒海……所以設定簡化其實都係好事來呢!!!
∇ 開箱後第一件事, 放上檯比大家欣賞下先!!
∇ 再來比大家睇下同 LX-89 背後的分別先, 因為 LX-89 前面同 LX-901真係一模一樣, 所以基本上小瑟同大家分享後面的輸入端子會比較有意思, 大家見到上面係 LX-901, 而下面就係 LX-89, 基本上硬件的擺位分別唔太大, 最大分別就係 HDMI 及 LAN 線的位置, 11個 Channel Power 輸出, LX-901冇左 USB-DAC的輸入位都係唔同的地方.
∇ 7個 HDMI 輸出, 有5個都支援 HDCP 2.2 功能的.
∇ 黎到呢代, LX-901依然係用上 D類功率放大, 而更加用上最新版「Direct Energy HD」再加上訂製的低 ESR 電容, 讓放大電路的反應速度提升, 呢個絕對係 Pioneer 擴音機最出位的特色之一, 就係因為咁, 所以可以對微小的音頻信號都有更敏銳的反應勒.
∇ 再來當然睇下機身先啦.
現今的擴音機後級部份已經做得好好 決意重返一機合併式玩法
話說小瑟都玩左前後級分家好多年了, 但在上年聯同咁多位高手去左咁多次的家訪, 以及多個新機體驗活動, 老實講………….對於依家新一代的AV擴音機的後級部分, 同早幾年都幾大分別, 因為了解多左, 知道除左份”牛”之外, 其實仲有好多地方都同電同音質呢二個有著唇齒相依的跟本性關係, 而呢二年出的AV AMP, 除了支援輸出 Channel 多左之外, 穩定性亦都高左, 而小瑟屋企又豆腐潤咁細, 今次就試下唔用後級直出家中所有喇叭, 試下咁玩 5.1.2 又會有咩感覺先.
∇ 可惜既係….小瑟仲係玩緊 5.1.2, 天空只可以係 Front Height 位置掛上一對喇叭, 而後置放返係耳仔位呢個工程仲係遲遲未批………不過本住點燈呢個信念, 我係會不斷努力去另 5.1.4 呢個夢想可以盡快實現呢.
∇ Sub仔依照係服役多年的 MK SB12, 呢隻SUB仔在小瑟斗室中夠哂照啦!!!
∇ 小瑟服役的藍光盤當然點少得 Pioneer BDP LX-88的份呢??? 夾埋佢玩 PQLS 就冇得頂啦!!
開機即時設定 MCACC Pro 係冇得走的…..
其實依家好多擴音機, 機內的處理晶片都已經好成熟, 一開頭駁好哂家中喇叭, 試下比MCACC工作一下先, 用返個FULL AUTO MCACC來比佢熱身一下先, 去到依家LX-901呢代, 佢只有三個不同的 MCACC 預設的調校方式, 以下同大家逐一講下三個設定的分別先啦.
Symmetry – 主要用於執行每對左, 右喇叭的對稱修正, 使頻率振幅特性平淡, 適用於房間左右平衡的環境.
All Ch Adj – 主要是所有喇叭都採取個別設定, 讓 MCACC去為每隻喇叭作出認為是 Pioneer 聲音的調校.
Front Align – 系統會根據前置喇叭的特性, 讓系統中的其他喇叭都依從前置喇叭凡的特性去調校(一對前置喇叭不會採用等化處理).
而 LX-901 附有三個記憶 MCACC 的存檔表, 方便大家記下不同的 MCACC 設定, 以下小瑟就一次過將三個 MCACC 的設定記錄在不同的位置, 方便日後使用勒. 而小瑟依家日常用的多數都會係 M3的 All Ch Adj 的, 因為小瑟屋企左右唔對稱, 所以 Symmetry 一定唔岩我, 而我又唔係玩兩聲道為主, 所以我亦冇需要將一對前置作 Reference 咁去處理, 所以由得 LX-901 去同我測試返家中聲效由佢想幫我發揮就最好了.
∇ 由 MCACC Pro 出來的預設上, 前置喇叭佢測量出我係 “Large” 即係大喇叭的, 但因為小瑟對自己家中的SUB仔好有信心, 亦都希望可以將整個系統的喇叭可以有更一致性的音效, 所以呢度小瑟會將 “Large”改為 “Small”, 咁全屋七隻喇叭就可以分工更平均勒.
∇ 另外還有一個地方可以影響著整個音場系統的, 就係呢個 “Crossover”, 大家不妨可以任意調校高低去試試在家中的感覺, 數字級細, 低頻的量感及包圍感會越多, 但唔好以為一定係好, 因為太多的低頻分比其他喇叭負責, 擴音機的壓力就會越大, 壓力大就會影響整體表現, 而太細低頻就會唔夠埋身, 唔夠過引, 所以呢個位非常之好玩架!!!^^”
∇ 做好 MCACC Pro 的自動設定之後, 小瑟都不忘將每個 Channel 再手動度一次睇下, 如果有出入的都會調返 75dB 的音壓呢.
玩得 Pioneer 又點可以唔提 Bitstream PQLS 呢????
除左 MCACC Pro 之外, PQLS Bit-stream 當然就絕對係 Pioneer 影音系統的一大王牌啦, 呢個由 Pioneer 獨家研發的 PQLS 精準石英鎖定系統, 配合返自家藍光機例如，BDP-LX89及BDP-LX59 都可以對應, 透過 HDMI 以 Bitstream 形式將全無抖動的多聲道聲頻資料由訊源交到擴音機解碼, 對音色既完整度又會大大提升呢。所以如果大家都係 Pioneer 西裝的用家, 就記得在 HDMI 內的 PQLS 設定為 “AUTO”, 而藍光機都係 “AUTO”, 咁二部機就可以對應到 PQLS 呢個制式, 到時爆起機上黎, 你就會知道準確同穩定的音效係咩一回事呢.
∇ 當雙方都可以用 PQLS 進行通話之後, AV擴音機同藍光機都會出到呢個功能的顯示, 非常清楚的 “點燈” 呀!!^^”
要乾淨又爽脆的低頻??? 記得開 Phase Control !!
又係 Pioneer 獨有功能, 呢個全頻相位控制功能 (Full Band Phase Control)都可以係呢部 LX-901上搵到，呢個功能據講係有效改善多聲道揚聲器各單元的相位不協調，並套用新既低音管理系統，以補償重低音喇叭和主聲道之間的相位延遲，係 HiFi 界別上，相位問題不嬲都係好多發燒玩家調機的重要功夫，而 Pioneer LX-901 之所以可以輕易地得出乾淨的低頻其實呢個就係呢個功能以自動測量方式得到相位調正功能，的確係為一眾用家想得非常周到。
三個不同 D-Filter 以 “Sharp” 係最有 Pionner 的性格呢
玩得 Pioneer, 又點可以唔提呢個一定會轉來轉去的功能呢?? 呢個功能叫 D-Filter 模式功能, D-Filter 內建三種主要模式, 分別係 SLOW、SHORT、SHARP, 有說這三個模式是將 AMP 的性格轉換, 不過小瑟試過當中功能其實效果未算好明顯, 但以 SHARP 呢個 Filter 最有返 Pioneer 原有的性格, 所以一直以來, 小瑟點都會用返呢個 Filter Mode去睇戲的.
三個月後的煲練得出之成果…..
MCACC之調校過程比想像中時間係長的, 當第一次 MCACC 調完出來的時間, 小瑟搵隻 Dolby Atmos 碟來試睇一下…………嘩……死火, D聲咁標, 咁乾既, 好似同平時聽開 LX89 的厚肉有質感的效果唔同哂喎, 成件事薄哂喎, 咁解會咁架………之後就想起 James 教落, 所有的電子零件, 電容, 任何的影音器材都好, 最理想進入工作狀態的效能係200小時, 所以小瑟就日日都開住佢去睇電視呀, 睇新聞呀, 聽歌呀, 睇戲呀, 聽新聞呀, 睇電視呀, 聽歌呀………. 如是者, 去到呢排都過哂 200 小時有多了, 以下就由小瑟同大家分享一下呢三個月來的修練成果呢.
依家小瑟家中有三部藍光機, 第一部係可支援 PQLS 的 Pioneer BDP-LX-88, 第二部係支援 4K UHD 的 OPPO UDP-203, 另外仲有一部就係 Panasonic UB-900, 三部機依家會點用多???? 哈哈, 要睇情況啦. XDDDD 回到正題, 小瑟先以一套西裝 Pioneer BDP LX-88 來夾 LX-901先, 因為最正的係可以用到 PQLS 功能麻. 小瑟手上有唔小 4K 碟的版本, 除左 4K碟之外, 佢仲會包埋一隻藍光碟, 所以今次可以試的除了藍光之外, 仲可以有 4K 的版本可以測試, 咁小瑟就可以一個版本試哂藍光同4K版都可以試到啦!!!
4K Atmos美版《JOHN WICK – 殺神》
呢套戲小瑟本來冇藍光又冇4K的, 不過因為之前做好多次活動, 睇睇下又覺得幾正, 之後 4K版本推出時美版又勁平, 所以唔好講野, 一定要入手.^^” 測試的一定係浴室駁火果段架勒, 因為小瑟最愛的 Disco 低頻係呢段戲內. 經過三個月的試煉, LX-901 的確可以比到小瑟一份好清晰的 Disco 低頻之餘, 最突出的就係聲音中的緊密程度比未煲好之前實在差太多了, 槍火的交戰聲又可以好清楚有定位地打埋小瑟心口, 而且將 Disco 內的音樂溶入電影之內, 一面睇奇洛”慢”速殺人, 一面聽子彈周圍飛, 果份投入感絕對係正呀!!!
藍光版 vs 4K UHD版《Lone Survivor – 絕地孤軍》
要試定位同埋身感, 又點可以少得近年槍戰片至愛的絕地孤軍呀, 呢套戲又係只可以入美版, 因為港版的藍光碟超攪笑, 因為只有DD5.1, 連 Dolby TrueHD 都冇呢下你話攪唔攪笑, 所以呢套戲基本上都冇得選擇, 一定要美版的. 好, 今次我地就來一次藍光 vs 4K UHD版本先, 主要係因為小瑟想試下有 PQLS 同 4K DTS:X 的分別. 回到劇情先, 軍隊係草叢中埋伏時, 平靜的感覺讓小瑟都抖不過氣來……等到第一槍聲起, “彭”….一陣又爽又快速的槍聲打到去皇帝位, 小瑟即時中槍, 就係咁勒, Pioneer AV擴最耍家就係呢類快狠而準而又乾淨清脆的低頻一野穿心的感覺, 就連小瑟家中的泠氣機都即時震左一野. 之後連綿不絕的槍戰小瑟都可以感覺到子彈由頭後向前射出, 以至前上方的炮火由天空殺落坐位上, 其連貫性及衝刺的快感真係冇得頂呀. 而呢個回合, 受惠於 PQLS 的功能, 小瑟覺得藍光版的DTS-HDMA定位同聲音中的確定性比 4K版本的 DTS:X 做得更好呢, 尤其係開槍的第一下最為明顯, 空氣間的回彈聲, 中彈聲都更為到位呢.
Conclusion :「同LX-89之分別 + 沒有加後級的感覺係………!?」
先講同 LX-89 既分別先, 因為小瑟玩 LX-89 時, 好早已經加埋後級咁玩, 所以玩在只用 LX-901 就同 LX-89 去做比較好似有D唔公道, 不過咁講, 依家由 LX-901自己一條氣去推哂 7 隻KEF喇叭仔, 其實都唔覺得有腳軟無力之感, 反而依家 LX-901 比到小瑟既感覺仲係切切實實的 Pioneer 聲底, 快狠準之定位, 清爽既低頻, 都係一一可以比到小瑟呢. 咁加後級係咪冇用?? 咁當然唔係啦, 如果加左後級的話, 成套系統出來的聲底會來得比較沉實, 每隻喇叭的中頻位會更豐厚, 但就要小心調校勒, 因為如果配唔岩線, 就會容易變濛, 所以要夾後級時反而要注意一下配搭之問題. 但如果你問小瑟, 究竟加唔加後級好?? 小瑟依家睇化左, 唔係一味勁就得, 小瑟反而覺得屋企的聆聽環境唔係咁大的話, 喇叭又唔係特別好大食的話(大食都有方法調的^^”), 其實一部合併機已經非常足夠, 其實小瑟有諗過不如玩 LX-701 的, 不過人始終係人, 都仲未過到心理關口, 始終都係唔多想跌返一級咁, 加埋自己都希望將來可以玩到 5.1.4 的麻, 所以買 LX-901 點都唔會後悔的呢. 講開又講, 其實AV擴音機不嬲都係好值得投資的項目, 但如果你係初入門的玩家, 小瑟真係建議由低玩起, 先由入門級開始, 千萬唔好聽人講一步到位, 影音的世界冇一步到位的, 因為你買左部機返去之後, 可能功能太強你都未玩熟之後, 就已經有第二代推出, 反而先由入門機玩起, 先了解哂影音的基本調校設定中左基本關係, 如分頻點對聲音有咩影響呢??? 大食喇叭又點可以SET到唔洗部AMP咁辛苦去推呢??? 幾時先應該由 SUB仔出而唔洗其他喇叭出低頻呢?? 連貫性點可以做好D?? 呢D你玩熟左之後, 到你下次有機會升級AV AMP時, 你就會 “聽得出” 原來自己家中套喇叭已經到左極限, 應該又要升級了…….到有呢下野的時間, 可能你已經玩了好幾年家庭影院, 而最開心既係, 你已經知道咩係家庭影院而且亦都真正享受緊家庭影院比你的樂趣呢!!!!!^^” 唔講勒, 呢炸碟小瑟好希望可以係復活節假期可以煲哂佢, 唔講勒, BYE~~
