雖然我係一個日漫迷，亦知道《攻殼機動隊》是大受好評的名作，但無論漫畫，電影，電視動畫我都無去睇過，適逢真人版電影上映，昨天抽空去了睇首映，可能無期待，睇完特別喜出望外，如果你係怕了日漫改篇電影必爛的話，我可以講，絕對唔駛擔心，由頭到尾都好表達到日系動漫風格，香港場景非常多，多得來又唔會好似變形金剛咁搞到好討厭，特別來香港取境果然真實好多，還記得八九十年代的日漫，有唔少都係以香港做場景，《攻殼機動隊》亦係以香港為藍本設計，由於無睇原作，還原度高唔高我就唔知，但我真係覺得如果未來世界真係出現，未來的香港就係咁的樣，作為香港人，非常滿意！
動作場面方面，有好多場景都玩水玩得出神入化，槍戰場面亦唔少，特技方面，除了其中一兩個場景唔夠真外，整體都唔錯，聲音方面，我係FESTIVAL GRAND睇ATMOS版本，非常到位，由於槍戰同拳腳位唔少，所以十分值得為高清音效揀間好的戲院，畫面方面，我睇的係3D版本，唔算特別多用得著3D的場景，但因為唔少係實景未來化，睇3D會特別感受到未來世界的空間感，故事方面反駁位唔多，無悶場，好難想象係八十年代尾的作品改篇。
整體而言，我覺得好睇過生化危機好多，始終係一個完整故事真人化，有好的故仔，加上製作認真，可以話係近幾年日本動漫改篇真人電影的最高之作，如果你無睇美漫都去睇Marvel電影，我覺得對多數睇日本動漫長大的香港人來講，無理由唔去睇呢套《攻殼機動隊》，就算好似我咁，無睇過原作的，都絕對唔會有睇唔明的問題出現，唯一美中不足應該係套緊身衫(?)唔夠性感。
