早在 2017 年 2 月時, 美國 Head-Fi 論壇果邊已經有 N3 發表的消息傳出, 當時主題非常之爆的, 就係以 【COMING SOON: Cayin N3 Hi-Res DAP with AKM4490 DAC, apt-X Bluetooth, and Line, USB & Coax Out for under $200】, 差唔多可以用十項全能但只賣千多元港幣的價錢, 以規格來講真係非常強勁, 而小瑟都有同 Cayin 方面了解過, 因為未有正式工程機而最終沒有拿上手測試一番. 但香港終於係 3 月中發售在即, 小瑟終於就可以率先上手同大家做過評測, 究竟呢部只賣人仔 RMB$1,099 (折回港幣約 HKD$1,299) 的入門全能 DAP, 出來的聲音同操作又會係咩一回事呢??
強勁的硬件配置 你講得出的格式佢都食到 …..@@
講返斯巴克呢間廠, 佢地係成立於一九九三年, 都成24年歷史, 一開始先 Hi-Fi 器材為主, 主力推出膽機系統, 所以佢地對於音色的溫暖感及靚聲都有一定的執著. 今次新出的 Cayin N3 DAP 會係『斯巴克』呢間多年 HiFi品牌的第四款DAP無損播放器，其體積相當細小, 只有100 x 54 x 13(mm)的的身型, 重量只有 100 克左右. 上手放係褲袋非常方便, 雖然係咁細, 價錢又咁平, , 當睇佢個 SPEC 絕對勁抽, 介面就採用自家操控介面, 搭載 SA2500+AKM4490EN DAC晶片, 再加上兩粒 OPA1652+OPA1622 的功放晶片, 老實講, 呢個陣勢的確有唔打得都睇得既效果, 因為解碼的功能真係玩哂, 可支援 DSD256, DSD128和DSD64 硬解, PCM 32bit/384kHz, 直解 SACD-ISO, 檔案支援你講得出佢都食得到, AIFF, FLAC, WAV, ALAC, APE, WMA, MP3, OGG ….. 真係打都打到手軟, 同時佢又用上藍牙 4.0 支持 apt-X 的播放器, 依家咁多無線耳機都支援 apt-X 最為方便，而且仲有一個叫 “雙向藍牙” 嘅功能，可發送音樂到其他藍牙設備嘅同時，也可以接收其他藍牙設備發送過來的音樂，通過 N3 接駁嘅耳機或同軸輸出黎聽歌，都幾有趣。
∇ 機身左邊有三個按鈕, 分別係開/關同音亮按鍵。
∇ 右邊就係聽歌最重要的上一首, 播放/暫定, 下一首三個按鈕。
∇ 支援最高 256GB microSD 外置儲存, 但好特別地 N3 係沒有設定內置存儲空間的, 即係話要聽歌佢一定用外置存儲作主力, 亦都可能因為咁, N3 的定價可以咁進取呢.
∇ 機身下方的 USB Type-C 插口, 可支援 USB DAC, 連接其他大機進行 DAC 解碼, 進一步提升音質表現.
∇ Cayin N3 機身採用鋁合金材質和塑料材質相結合, 正面是金屬面板, 而背面竟然用上了貼皮裝飾設計, 真係有一點估佢唔到, 而且今次由價錢來看主打年輕市場, 所以顏色除了黑色之外, 仲會有藍色的呢.
實測時段 I – Cayin N3 + Onkyo E900M入耳式測試
小瑟手上日常使用的都會係 Onkyo E900M 的入耳式耳機, 貪佢三頻平衡, 人聲同低頻岩哂口味, 亦都有收音咪方便講埋電話, 就係咁小瑟當然第一時間就用 E900M 來做測試先啦. 音壓方便小瑟用加到 “57 度” (最高 100) 已經足夠了, 小瑟測試用上 Haydn String Quartet in D, Op. 76, No. 5 – Finale – Presto DSD 檔來測試, 估唔到機仔細細, 一開頭的起弦空氣感都做得有板有眼, 當然空間感就唔可以同高級的 DAP 相比啦, 但都總算背景寧靜, 樂器都質感都叫出得唔錯呢!!!
試聽 CD版本 16bit/44.1kHz 版本的『我是一隻小小鳥』
再試就用上叮噹【下一站，天后】自選+精選中, 第一章節的『我是一隻小小鳥 』試聽, 小瑟手上的係 CD 版本 16bit/44.1kHz 的版本, 一開始時一二件樂器, 二枝結他出來的左右分離度做得非常唔錯, 再來叮噹開聲的感染力是有的, 而 N3 出來的人聲會企得比較後一點點的, 唔會企得好出的感覺, 到大棚野的段落時, 就非常考驗 N3 對覆習的環境會有咩表現呢..? 人聲同音樂的連貫性始終尚欠一點完美的連接性, 而且低音的輸出就會比較上欠了一點活力呢.
實測時段 II – Cayin N3 + Philips Fidelio X2 頭帶式測試
今次換上頭帶式的耳機, 小瑟搵來 Fidelio X2 呢隻好多耳機友都有的一隻性價之王耳機來再聽一次叮噹的『我是一隻小小鳥 』, 明顯一開聲加大音壓是必須要做得事情呢, 因為 X2 係一隻開放式的頭帶式, 小瑟勁愛的埋身感就需要將 N3 音壓上升到 “85 度” 先可以滿足到. 今次叮噹的聲音比之前的 E900M 更磁性, 感覺更入咪, 而且人聲都企返前小小, 同樂器平排了, 而且低頻的活力同彈性都好返好多了, 而到大棚位置都比之前來得有條理, 習之更為分明.
試聽 SACD DSD 版本的『海闊天空』
再來又點可以少得小瑟聽左幾十年都仲係不停 loop 的『海闊天空』呢?? 小瑟聽呢個係 SACD 版本 DSD 2.8MHz 的版本. 家驅獨有的滄桑喉底聲, 真係好正. 而成首歌在 N3+X2 的重播下, 雖未可以做到感動人心, 但其穩打穩扎而又條理分明的音樂性是有的, 而且最另小瑟覺得好野的, 就係以呢個價位的 DAP 都可以有呢個力水去推動測試中的二款耳機而且控制力亦十分唔錯, 點解小瑟話控制力唔錯呢? 因為有時有 D 耳機同 DAP 當聽海『海闊天空』副歌黎料的時候, 又和音又高音結他, 好多機出來都會有 D 亂或應該有一點”了”的感覺, 情況就好似渣車當去到好高速時而又小小”線”呔的情況一樣, 但係 N3 上又唔算有好明顯的感覺.
Conclusion：「千多元的入門 DAP 可以食到全餐又夠力水, 算有交代呢! 」
N3呢度機小瑟一拿上手, 的確係覺得有一點單薄感, 可能呢半年見得太多頂級 DAP, 部部都重到可以掉死人, 所以一開始對 N3 投以一種 “兒戲” 的感覺, 再細睇價錢, 千多元可以做出咩效果呢!? 呢樣一直都係小瑟抱有懷疑的. 而真正來到小瑟手上, 可以比小瑟慢慢試, 某程度上都比到小瑟一個 “估佢唔到” 的感覺, 尤其係力水同調音上, Cayin 呢廿幾年的經驗的確係有 D 料到, 以呢個價位來講可以出到呢個力水同音色, 如果呢部係外國品牌, 相信比到三倍價錢都未必可以做到. 但到現時都係有一個問題小瑟覺得 Cayin DAP一直存在的問題, 就係界面操控的習慣性問題, 工作系統的穩定性就冇問題的, 但始終自家 OS, 大家用落都需要一點時間去習慣一下全新的操作方法, 選歌方式, 入 FOLDER 由邊個位入, 呢 D 都係需要用腦袋想一想先可以記得係點操作, 呢下就唔多夠人性化了. 希望呢點如果可以一直地改善, Cayin 呢個品牌應該會在 DAP 上會可以有更多的 HeadFi 玩家接受的呢.
Cayin N3重點規格
♦ 儲存空間 : MicroSD (最高支援 256GB)、USB OTG
♦ 輸出介面 : 3.5mm 耳機輸出(線性輸出)、USB type-C 相容同軸輸出
♦ 輸出功率 : 130mW + 130mW @ 32ohm
♦ 無線藍牙 : Bluetooth 4.0、apt-X
♦ 續航時間 : 約 12 小時
♦ 外型尺寸 : 100mm x 54mm x 13mm (LxWxH)
♦ 重量 : 約 100g
♦ 價格 : 未定(RMB$1099)
【站內活動】76-FriendClub 快閃試 – Cayin N3 性價 DAP 首試之夜
大家如果睇完小瑟的評測之後都希望可以自己親耳一試未見街的Cayin N3在你的耳機會出到咩效果的話, 就記得報名參加我地的快閃試活動, 後天星期三晚(2017年3月22日)就係架勒, 今次代理可以安排到每位參加者都一定有一部自己任試, 名額有限, 額滿即止, 報名就快勒!!!
