一直以來, 小瑟都以為 Cambridge 的藍光機完全一比一的 COPY OPPO的藍光機內膽, 換一換個外觀就出街, 故所以一直都冇去試過同玩過, 直至早排有朋友問小瑟, 可唔可以幫佢試下好似 OPPO 藍光機咁, 破解一下部 Cambridge CXU, 小瑟心諗, OPPO都係咁做, 舊MODEL 752BD 都係咁做, 應該冇咩分別啦, 搵都冇搵過料就叫佢囉部機比我攪攪佢……點知一入科林問問大家…原來冇人有JB過CXU的, 就係咁, 小瑟就心中暗叫出事勒!!!
∇ 科林討論帖 : 岩岩幫朋友攪佢部CXU, 原來唔係完全同 103D 一樣架喎…(OPPO 103D & Cambridge CXU)
https://www.post76.com/x2/forum.php?mod=viewthread&tid=243734&fromuid=4
好彩, 小瑟在旺角都識到一D影音店的好朋友, 佢地幫我四出打探之下, 終於都幫我搵到 SSP 一位識得將 CXU 做破解的人, 就係咁小瑟就囉左部 CXU 比佢攪, 唔洗一日回來時就已經成功同 OPPO 一樣, 讀到 ISO 檔, 亦都可以 RIP SACD, 既然部機已經在小瑟手, 當然就玩下佢啦!!!
機內設計原來都大有不同
小瑟手上仲有部 OPPO BDP-103D, 又點會放過機會開一開機箱, 睇一睇佢地兩者究竟有咩唔同啦? 就係咁, 一開之下, 先發覺原來佢地係供電, DAC 解碼處理部份, 光盤, 走線, 都有好多唔同既地方, 原來 CXU 內部搭載五粒 Wolfson WM8740 DAC 晶片, 任何數碼音訊輸入到 CXU 之後, 再配以Cambridge + 瑞士Anagram Technologies共同開發的自家升頻DSP晶片, 所有的音訊都會以 24bits/192kHz 作升頻輸出, 粒晶片真係未聽聲, 淨係見個樣都覺得勁呀, 所以大家會見到 CXU 的機背的 RCA 端子是跟 103D 完全唔同的, 有好多 HiFi 發燒友其實都非常鐘情於使用 RCA 作模擬訊號傳送到前級或合併機上, 所以 CXU 的解碼處理部份就絕對非常有用勒. 而影像處理方面, CXU 亦都係用上 Darbee 處理器, 畫質上 Darbee 可以有幾好, 相信都唔洗小瑟再由頭講一次呢.
∇ 呢個數碼輸出部份就冇咩分別了.
∇ 而呢個 RCA位置就跟 103D 完全不同, 亦都係 CXU 的精華所在呢. 另外大家細心留意, CXU 會係二組光纖及同軸的, 一個是OUTPUT, 另一個是INPUT, 因小瑟都已經冇這二個FORMAT的器材使用, 所以未能同大家做測試了!
∇ CXU 最不同的地方, 就係多左呢塊全新的模組, 所有的模擬訊號的輸出都由這塊板作處理, 就算係玩 AV 的 7.1 RCA 輸出都會經佢, 而 Cambridge + 瑞士Anagram Technologies共同開發的自家升頻DSP晶片就係在這塊板上.
∇ 所有都是自家黃色 Cambridge Logo電容, 靚仔排序非常工整!!
∇ Cambridge + Anagram 的自家升頻DSP晶片, 點解 Cambridge 可以比 OPPO 103D有唔同的聲底?? 呢粒野起左關鍵的作用.
∇ 全部聲道的輸出係靠呢粒晶片升頻到 24bits/192kHz , 聲音出來的確係有D料到!!
∇ 另外亦都想講的, 就是 CXU 的佈線手工都做得非常齊整, 唔會亂成一團咁, 值得一讚!!
∇ 電源處理部份, CXU用左一塊好硬的 PU膠蓋去覆蓋著電源的部份, 小瑟好想拉開佢影相比大家睇, 不過又怕整爛, 但依稀見到入面都有好多好大粒的電容, 應該都係另外再設計過一份電源比佢架勒!!!
∇ 小瑟家中的線材配置同之前一樣, Taralab M3 RCA 來作兩聲道聽歌, Kordz LUX 二條入 Pioneer SC-LX89 AV AMP及直上 Sony 4KTV.
講多都無謂 試玩最實際
小瑟幫朋友 JB 左之後, 就插上自己機架上試玩一下, 可能玩左部 LX88 太耐, 真係好耐都冇試過可以操控一部藍光機可以咁快, 咁爽手的, 係操控上, O記同 C記的操作反應真係正到冇哂野講的, 而穩定性都係非常明顯的. 好勒, 咁講返畫面上, CXU因為有 Darbee 處理器的加持, 畫質在小瑟的 49″ Sony 4K電視上, 立體感, 顏色的鮮艷度, 邊位都非常 Sharp醒, 而且顏色的鮮度都非常討好, 尤其係紅色, 當大紅畫面時, 色深有層次得來, 畫面唔會爛, 而 4K 的增線效果亦都非常唔錯, 如果要同 LX88 比較, 我只係會講係對比度上, 小瑟覺得 LX88 會有更高對比層次感. 而聲效方面, 小瑟換左 CXU 之後都冇再調校過部 AV AMP, 一聽之下最明顯的就係一對後置喇叭的環繞聲明顯係比之前的到位左, 埋身左, 而效果的走位亦都明顯突出左, 如果對比起 LX88 聲音有著多一份的音樂感, 聲音走向會比較慢小小的, 俗稱 “淋” 身的, 呢個應該係同 Cambridge Audio 的音樂取向有關的了, 好聽唔好聽就真係要睇人而定, 但小瑟感覺就係 LX88 走爽快路線, 而 CXU 就偏重音樂感行先得一類!!
CXU 聽 SACD 只可以用 HDMI先出到原生 DSD??
冇錯, 如果大家想用 CXU 來聽 SACD 而又唔想行 DoP(DSD Audio over PCM) 的話, 咁就只可以經由 HDMI 將數碼訊號交比下家作解碼勒, 而小瑟因為冇同軸或光纖線來聽歌, 所以呢方面真係同唔到大家作測試, 不過就以 HDMI 出 DSD 來講, 係 CXU 經 HDMI 去 LX89 的情況下, 以為會出來好硬聲啦, 係聽梅姐新的 SACD 時, 反而覺得聲音質感好軟身, 又係果樣勒, 好 “淋” 身既, 唔會有好強烈的數碼味, 出奇地都幾耐聽喎!!!!
RCA聽歌表現
之後都搵返D PCM FILE來聽下歌試試佢的 RCA 輸出表現如何啦, 出來的音樂感同小瑟用開或用過的宇宙盤機分別都幾大, 一來佢聲音性格溫柔好多, 二來佢偏向慢聲底, 當小瑟聽Cazy for you 時, 梅姐把聲倍添溫柔, 和暖, 用來聽慢歌真係一流, 小瑟覺得 CXU 在中頻偏向比較重, 人聲同低頻都會比高頻更入耳, 如果用佢來聽歌, 相信以同價的淨 CD機來講, 都應該唔會差好遠的. 如果小瑟屋企有多一套兩聲道架生, 都有機會心思思入返部呢!!
JB後未有手機 APPS 支援
雖然 CXU 在聽歌的聽感上, 的確係非常之咁唔錯, 但唯一不足的就係佢在手機 APPS 的支援上就比較差了一點, 尤其如果大家係好似小瑟咁, 喜歡用 PLAYER 來充當 CAS 的訊源, 你就會非常之唔情願地要開著電視來選歌呢. 唔知呢個係因為小瑟 JB 左 CXU 之後先唔得定佢本身唔得, 雖然我見 Cambridge 上都有個APPS, 但安裝之後在網絡中係搵唔到我自己部 CXU PLAYER的, 非常可惜!!!
Conclusion : 「具有強烈英國味的藍光宇宙盤」
好多影音發燒友可能都會話 : Cambridge 咪即係 OPPO, 部機一模一樣的, 佢又賣得貴過人, 點解要擇佢先??? 的而且確, CXU 的架構係原自於 OPPO BDP-103D 架構的, 但原來開箱睇過之後, 除左模擬部分, 仲有好多地方都係同 103D 有非常之多的不同地方, 電源, 機底金屬板, 佈線, 光盤都不盡相同, 呢個不期然另小瑟又再有問題, 既然係要改咁多野, 點解唔正正經經自己做過一部全新的出來, 要囉人地個底去做呢?? 呢個問題小瑟就向身邊的高手請教過, 佢答左我一個非常淺顯的原因 : 因為 OPPO 已經取得好多認證, 例如 Dolby, DTS, 呢二個 Licence 如果一間新公司要從新向佢地申請, 淨係申請的費用已經係數十萬美金的事情, 而 OPPO 藍光機本身的設計其實都係以「模組式設計」開發的, 即係本身 OPPO 的藍光機就係預左大家係好多不同位置可以加入其他模組去增強其可變性, 加上佢地個 Firmware 同操作介面的確係做得非常之好同穩定性高, 係咁多個利好因素之下, 取長補短地用上 OPPO 機來做架構呢點絕對係合情合理的, 因為開發部門唔需要再為藍光的”基建”去浪費時間同金錢再次研發, 反而專心去研究點樣去做好佢地想要的性格出來就可以. 係呢部 CXU 上, 小瑟就係完全見到 Cambridge 係同 OPPO 無論聲音, 以至畫面都有非常之不同的取向性, 與其話佢係抄 OPPO機, 不如話 CXU 係 103D 的英國終極版會更合適呢.
