Spark可解作火花，所謂火花其實就係凱音Cayin i5，叫慣左舊名都硬係會慣性叫佢做斯巴克Spark，有認識小弟嘅朋友可能都知道，小弟對國產嘅音響牌子一直有D抗拒，唯獨對兩個中國牌子有特別待遇，其中一個就係「斯巴克」，無他，因為小弟玩音響初期非常之窮，一部斯巴克CD11T，一部Graham Slee Solo，再加上一對Sennheiser650就陪伴左小弟一年有多，只係後來CAS抬頭就將斯巴克CD11T賣走，直到依家仍然對呢個牌子有好感，所以一直有留意斯巴克產品，當我未睇任何「Post」之前，一直以為呢部會係N7，點知當我知道佢唔「7」又唔「6」果時，我下巴的確係趺左落黎，但作為「Post76」嘅玩家，當然要試啦，我亦都好期望佢之後會有「i6」，「i7」，甚至有「i7 Extreme Edition」。Cayin i5最大賣點係用左AK4490晶片，支援32/384 PCM 64/128DSD，行Android 4.4系統同時使用USB Type C插頭。i5包裝盒用了相對「簡約」的包裝風格，對品牌黎講算係幾創新。
∇ 近日暑期忙到甩轆，連坐係屋企聽下歌嘅時間都無，但走黎走去嘅好處就係可以玩多D耳機，如果有留意開Post76耳機版嘅朋友應該知道近日headfi界就出現左新「火花」i5。
∇ 紙盒採用時下流行暗隔設計，其實都好似依家D電話，其實當你關機時，其實系統都會判定佢為「電話」，有追開post仲見到有版友笑佢添。
∇ 暗隔入面有三樣野，分別係說明書，一條USB Tpye C線同埋一個Micro USB 轉 Type C嘅轉換器。
∇ 機身用色同N6好似，但質感同用料上竟然比N6更好。
∇ Home掣係機身正面，典型的圓型設計。
∇ 機體的開關制為於機身左側，機身右上方為 Play/Pause、Fast Forward及Back制。
∇ Micro SD卡插座係機身右下方，支援200GB容量Micro SD卡，上方為3.5mm耳機插及Line out，音量旋扭係右邊。
∇ 音量旋扭造工非常精緻，鬆緊度岩岩好，就算唔開鎖屏模式亦可以正常使用，放係褲袋行街都唔影響音量。
∇ 機身下方採用了USB Type C插頭，支持OTG，可自己加大自己個Song Library，對於一D用極都唔夠用量嘅師兄黎講絕對係喜訊。(DAP黎講應該暫時得i5行USB Type C)
∇ 機身背面係Cayin招牌碳纖背蓋。除左靚仔外，碳纖亦可以阻干擾。
音質中性推力足
試完之後我終於明白點解「C」記要開多一條產品線，因為i5同N系列完全唔同口味，i5係走中性平衡路線，你可以話無N6同N5咁濃味道，但相比起N系列個人更鍾意I系列，人聲染色無咁明顯，人聲更通透，細節更好。其實都幾岩我，因為夠晒雜食嘛，玩喇叭呢通常都會入一對就算數，然後夾好晒器材谷行佢，耳機玩家通常都會有唔止一對耳機，得閒就換下咁，所以一部聲音平衡嘅DAP可以玩嘅野就多左啦，音質同推力係價位機種黎講算係突出，同版友評價接近，整體黎講推力大，用IE800之等入耳開50已經非常夠聲，動態良好，低頻好強下，唔鐘意呢隻低頻可能會覺得或者衝，樂器同人聲分離度高，聲音乾淨，背景夠靜，點聽都聽唔到噪。
中性聲底搭Beyerdynamic T5P效果好
我自己試聽果時第一日係用IE800，聽果時覺得有少少乾，人聲某D位覺得尖，明顯係同IE800唔夾八字，後來索性換隻封塵T5P去聽，結果就聽左一晚聽到唔想停，T5P其實係一隻定位好特別既機，速度快、解析好，高音亮麗，縱向音牆，走秀麗清亮風格，帶有一份空氣感，但衰在歌路窄，亦比較大食，因為係推力唔夠嘅環境下控制力會唔夠，人聲會標，錯誤配搭下更會覺得求其一隻耳機都好過佢，所以好亦有唔少人插到隻T5P開花，本來T5P同我手上DAP無一部夾聲，一直都係用ipod+hpp1去餵佢先有好效果，結果係i5手上T5P就可以重光啦，咁你會問我到底用佢黎聽乜?聽Sarah Brightman、Sissel Kyrkjebø、Enya其實夾到絕，i5平衡中性聲底去搭T5P效果意外地好，試聽Sissel Kyrkjebø的Shenandoah，人聲如絲綢般柔順，包圍感充足，人聲密度極高，高音伸延異常出色，高音位拉到最盡幾乎聽到叫左出黎，人聲仲有D潤添，去到呢度我知道尋日用IE800聽果種乾明顯係錯覺，應該係推力大嘅問題，所以小瑟拎Denon D7100聽效果都好好。
預載Dropbox夠貼心
好多人可能會話「車！你寫Report一定賣花讚花香啦！」事實上每種產品都有特性，斷估唔會有人做一D佢自己都覺得唔好聽嘅產品係咪?所以呢，機真係要講八字，夾特性，第二日我專登拎左我細佬隻RHA T20去試，結果D聲非常刺激，低頻又爆又潛，當然我呢D老人家聽半個鐘就頂唔順。另外我特別想讚一下C記，由於國內版係預設百度雲，港版刻意預置左Dropbox真係好貼心，亦幫到我呢D會save歌係雲端嘅玩家，至於缺點，i5亦都有，我自己測試過，佢待機太過耗電，我待機一日等返20%電，對於我呢D唔鍾意下下熄機嘅人黎講有D唔方便，好彩開熄機都算快，其次當Micro SD卡拔插有時會認唔到卡，要拔插多一兩次先OK，不過我手上面果部係Sample機，相信黎緊好快有Firmware解決以上問題。
Conclusion : 「國系誠意作 同價位 DAP 無敵手」
以四千蚊樓下去睇，i5應該會非常有競爭力，論聲音論功能i5都真係誠意之作，咁嘅價錢做埋DAC去邊度搵呢?我地亦透過一部i5睇到Cayin用心同誠意，對國內品牌講都算係罕見，期待Cayin再為我地帶黎更多新火花。
