Onkyo TX-NR656去到呢代, 已經成熟到唔止係一部AV擴音機咁簡單, 八組 HDMI 輸入及二組 HDMI 輸出, 支援 4K 視訊規格需要的 HDCP 2.2、4K/60Hz、HDR規格, 此機當然一定支援 Dolby Atmos 同埋 DTS:X(* 追加上述功能的韌體更新預定於 2016 年夏季提供) 呢二個全新影院音效制式, 以入門機來講已經非常夠用, 小瑟見個Spec 咁勁一於問 Onkyo 借來 76-FriendClub 等小瑟試下啦.
入門影院心臟，規格用料絕不馬虎
TX-NR656 為 7.2 聲道設計, 如果玩 Atmos 或 DTS:X 就可以設定成 5.2.2 , 每聲道有 170 W(6 Ohms) 或 100 W(8 Ohms) 輸出, 最驚喜的竟然 DAC 晶片用上 AK4458 呢粒連 TX-RZ900 都使用的 384kHz/32-bit 高階 DAC 數碼模擬晶片, 對於音效解碼能力真係D信心. 就咁睇數據上都好似幾掂, 究竟去到實際出聲時效果又如何呢?? 小瑟呢日就插好哂線, 以 5.1.2 上前天花喇叭的設置, 再用 Dolby Atmos 第二版的藍光碟去試試佢究竟咩效果呢???
∇ 一睇機身就知道部機究竟有咩支援 Dolby Atmos, DTS:X, Wifi使用又可以用到 Google Cast, AirPlay 無線音樂串流, Spotify及Tidal 亦都可以食到, 藍牙 2.1 版本, 差唔多市場上流行的無線播放方案都可以食哂, 幾千蚊既機仲想點呢???
∇ 一黎當然就係要插好哂線SETUP左部機先啦,
∇ 估佢唔到依家就算入門機都有幾唔錯的操作介面喎.
76-FriendClub 5.1.2實測
依家會址上, 家庭影院方面最新的配置已經用上 秦朝音響 E6 家庭影院喇叭及 BQ3112D plus 12寸超低音, 而藍光機就用上 OPPO BDP-105D, 天花喇叭就用KEF 蛋仔, 投影機就用返 EPSON TW-8200作測試, 試左 Unbroken, MAD MAX, 在睇 Unbroken時, 子彈由四方八面遊走的效果都非常唔錯, 定位仔細又清晰, 而在會址上地方太大的關係, 小瑟都需要將 656 音壓上調到70左右, 但要 656 去推動四隻座地喇叭, 一隻中置加一對天花喇叭, 再要上到 70 度以上老實講我本來都冇抱有什麼期望, 但去到進入激戰時, 講真控制力同失真的確係有的, 不過要 656 應付呢個情況其實都已經係一個過份的要求, 但有 12吋 SUB仔的幫助下, 整個片段播完小瑟都真係覺得收貨有餘了. 再去到 MAD MAX 開場一段, 開車之後咪有一秒靜哂的, 之後架車係天花跳入畫面呢, 天花的效果都非常到位, 再去到尾段反車應該細路仔的對白位時, 環繞感同每隻喇叭在不同位置發出聲音都可以清楚聽到, 呢個應該係歸功於 DAC 晶片的強勁分析力呢.
Conclusion : 「進入家庭影院毒海的入門機，周邊功能強大，但依然緊守影院心臟的角色」
小瑟在 Price.com 查一查價之後, 原來依家6系價都仲係 HK$5,280 左右呢個價, 其實以入門用家來講, 真係算非常抵玩, 玩家只需要配埋一套細細地的衛星喇叭或書架式5.1喇叭(八千至一萬左右) 再加多一對平平地的反射喇叭(如 Onkyo SKH-410 二千以下), 都係三萬蚊有找, 值得一提是 TX-NR656加入左一個叫 AccuReflex 功能, 可以將反射喇叭的天花音效與你家中的其他環繞喇叭作音效混合, 另到天花喇叭的效果更實淨同結像力更好, 對於香港家庭環境中只可以玩反射的朋友真的非常有用. 講返家庭影院方面, 大家再加埋部電視機, 藍光機, 埋單真係三萬有找, 就可以係屋企嘆到戲院的效果, 仲要除左睇戲聽歌之外, 部機仲可以支援哂無線串流播放, 咁即係手機, 各式各樣的手提裝置都可以連接使用, 真係算係抵玩啦, 當年小瑟入門都係以三萬蚊一個家庭影院為入門價的標準, 但估唔到10年之後, 三萬蚊一套入門影音器材依照岩用之外, 技術之提升仲要唔止幾多倍之增長, 如果好似小瑟咁唔想成日周街去, 只想坐係屋企定定地休息下, 享受自己的家庭影院, 仲諗咁多?? 快D計劃下啦!!!!
