小瑟讀小學的時間都有接觸過 “黑膠” 這個東西, 當年細個當然只係老豆買左我就多多手咁攪下果隻啦, 而要數最有印象的黑膠碟就一要數哥哥張國榮的彩碟版《Stand Up》、譚詠麟《迷惑》等等. 但自從 CD 推出之後, 黑膠呢個載體就完全停哂冇再興起了, 直至近年聽黑膠呢個玩法又再係影音界別內吹得非常盛行, 尤其係我地 76 版上都有唔小版友開始進入 “膠膠” 呢個領域上就可知一二. 而上月 Sony 終於都玩埋一份, 推出左 PS-HX500 呢個黑膠唱盤比一眾玩家去投入玩黑膠呢個世界, 而除左可以聽之外, PS-HX500仲可以錄埋 24/192, 24/96 WAV 及 DSD File, , 以 $4,980 入手價來講, 的確係我地呢 D 入門玩家超引誘的玩具之一.
未聽之前先來一個開箱寫真先！！
作為玩家, 淨玩膠膠又點能滿足大家呢?? 所以 Sony 就係呢個盤內, 加入USB 接駁電腦轉檔功能, 大家只需要將機身上的USB接駁上你的MAC(MAC OS X)或PC(Windows 7以上), 再安裝 Sony 預設的 Hi-Res Audio Recorder for Windows 程式, 就可以非常輕鬆簡單地制作出 Hi-Res File 來收聽, 就算係家中已有CAS組合或隨身聽組合的朋友, 都會可能因為呢個功能而心郁郁想入手, 小瑟就問 Sony 借一部讓我地既編輯部一試. 唔試由自可, 一試就出事, 因為就算係呢個超簡單的設定底下, 係公司聽完之後都比到小瑟一個CD/SACD/FILE比唔到的音樂感, 聽感一陣再同大家分享, 依家不如先來同大家開開箱睇下呢盒 PS-HX500入門黑膠盤究竟會有D咩先?
∇ 有得呢個Hi-Res 同 DSD Logo, 大家都知道係專為新一代既影音玩家而設呢.
∇ 事不宜遲, 一於快快開個盒睇下有咩配件同點樣SET返好個盤先.
∇ 一開箱, 就係黑膠盤的頂蓋, 包裝得非常整齊呢.
∇ 頂蓋下的東西, 究竟又是什麼呢???
∇ 原來就係包裝著厚 5 毫米橡膠墊, 呢個橡膠墊用來放係轉盤上, 玩膠膠最怕就係震盪, 而轉盤係金屬物料, 冇返個橡膠墊大家又點敢將心愛又貴重的黑膠碟放上去呢???
∇ 橡膠墊之下, 就係裝上了一對RCA線及USB線, 當然大家一睇就知, 呢二條線係各大屋村影音店都有售, 至於需唔需要換線呢個問題…………小瑟會建議先用原裝線玩左一排先, 之後先再升級會好玩D呢!!!!
∇ 好勒, 黎到呢度, 當然就要到我地既主角啦, 不過主角出場之前, 我地又見到發泡膠側邊又好似有幾件東西喎!!!
∇ 折出來睇睇之後, 我地就見到分別係(左起) 針壓尾陀、防塵蓋膠鉸、45 轉唱片轉換器.
∇ 針壓尾陀, 呢件東西對於整個黑膠唱盤起了生死的作用, 因為針壓調唔好對唱片出來的聲音都有非常大的影響, 究竟需要如何調校我地下文再分享.
∇ 好勒, 終於都來到 PS-HX500黑膠唱盤的真身勒, 不如我地逐一同大家睇睇每個部份的特寫先啦.
∇ 呢個就係唱盤的開關制, STANDBY的位置就係靜止的狀態, 而當你想安裝程式係你的電腦上時, 你可以選擇轉到去 ON 的位置, 而33、45的就是轉速, 因為黑膠碟都有份33轉同45轉的, 如果你手上的唱片是33轉的話, 就轉去33位置, 45轉的話………..就唔洗我教勒下馬!!!!XDDDD
∇ 黑膠盤簡單來說都係分硬盤同軟盤, 硬盤又叫直接驅動式(direct drive), 而軟盤又叫皮帶驅動式(belt drive), PS HX500屬於軟盤, 所以大家會見到佢係有條皮帶作驅動的.
∇ Anti-Skating 呢個就係防止Skating滑針的裝置！因為唱盤轉動時有”向心力”，而 Anti-Skating 這就是用以產生離心力去抵消向心力, 用以另到唱針可以充分的放到唱片的聲軌上, 簡單而言, 針壓尾陀, Anti-Skating, 唱針, 唱臂三者有著一個幾微妙的關係, 而開盤一開始就一定要先定好呢幾件東西的調校先會可以正式聽歌呢.
∇ 盤底有橡膠阻尼體將檯面上的震盪完全減少, 有效消除從音櫃和其他外在物件所帶來的震動.
∇ 唱盤的機背當然都要同大家睇下有咩插頭可供使用先啦!
∇ (左起) PHONO / LINE用以比用家選擇是經由唱盤的內置 PHONO AMP 還是將訊號輸到擴唱機才作放大, 如果你的擴音機有 PHONO AMP的功能, 調到這就岩的了, 如果沒有的話, 就調到LINE由唱盤負責. 而 GND就是地線, 通常駁 Phono GND or PreAmp 的 GND, 咁就可以帶走唱臂上的靜電, 靜電對聽黑膠好質壞非常重要呀, 如果處理得唔好, 聽歌時會有”胡胡”聲架. 之後的就係USB接頭, 如果想錄DSD FILE的話, 呢個駁上電腦就可以直接有數據經USB到電腦上呢.
∇ 盒底就係由鋁製壓的鑄盤, 先放這個鑄盤上盤上, 再加上皮帶作驅動.
∇ 大家要小心留意呢個位置, 因為佢係希望方便玩家安裝唱盤時可以容易拉出皮帶之用的呢.
∇ 唱盤之安裝, 依家就同大家介紹一下, 點樣安裝呢個盤先好哩!!!
∇ 呢條紅色的小帶子係呢個時候就發揮最大的作用呢.
∇ 最終的狀態就係咁, 條皮帶就食左係盤上的摩打轉動的位置, 就咁岩哂的呢.
開門一件事，記得細心調整唱臂！
當人人都話玩黑膠時, 其實係咪真係好似CD咁, 一放隻碟, 放埋唱針就已經可以收聽呢??? 當然唔係咁簡單啦, 雖然依家聽黑膠碟都已經叫做簡單左好多好多, 但調整唱臂呢個動作始終都唔可以省略, 因為黑膠盤的唱臂, 唱針同黑膠碟本身就有著一個”力學原理”的東西在內, 所以如果唔將唱臂調好, 當唱針放在唱片上時唔夠平均, 針壓唔岩的話落針力太多或太輕都會影響聽歌的表現, 咁究竟點樣的設定先岩呢??? 其實又唔洗太覆習, 簡單的都可以跟住以下方法都可以得出不錯的效果!!!
調整唱臂的平衡，以保持唱臂水平平衡（零平衡），使正確的手寫筆壓力施加在黑膠唱片。
∇ 首先當然係取出唱針的保護蓋.
∇ 將 Anti-Skating 調到 “0” 的位置.
∇ 解開唱臂扣讓唱臂可自由活動(以下圖片為扣上的狀態).
∇ 再將針壓尾陀的數字量調到跟白色線, 跟“0”位置對準.
∇ 再以順時針旋轉或逆時針方向直到唱臂形成水平橫向.
∇ 以下好明顯就係不水平的狀態啦, 如果是這個情況下, 針壓尾陀就要放鬆一點了, 大家可反覆調試, 好快就會知道何謂水平呢!!
∇ 調到以下圖片的狀態, 代表唱臂已經水平, 留意……..千萬不可以讓唱臂接觸到中間的唱臂扣呀, 如果唱臂放在扣上, 就等於唱針方面較重架勒!
∇ 調好唱臂之後, 當然就放上橡膠墊啦.
∇ 因為編輯部的地方有限, 所以今次測試就以黑膠盤 USB 直入電腦, 再 USB 上 CAS-1 作電腦解碼, 而電腦就以 Windows8.1 作 OS 收錄.
試聽泳兒 – 愛情歌黑膠版本
小瑟手上黑膠真係唔多, 小時候的黑膠唔知去哂邊了, 所以如果依家玩黑膠, 又要全部再買過哂, 不過近年已經愈來愈多時下流行歌手出碟時會考慮出埋黑膠碟, 小瑟聽講陳柏宇黎緊專輯都會有黑膠版本, 真係聽到都興奮呢.^^” 返講呢隻黑膠的聽感, 雖然用上黑膠 USB 入電腦再出 CAS-1呢個咁數碼信源及在這個細細的小喇叭的情況下, 整套音響系統絕對係入門級數, 但就反而係編輯部呢個細細地三尺左右的收聽距離下收聽, Vincy 呢隻黑膠都可以比到小瑟一份黑膠碟獨有的輕柔的音樂感, 一份好多年都冇聽過的模擬味道, 竟然可以係呢對只有2.5吋的低音單元的喇叭仔, 出到一份意想不到的感覺來, 讓 Vincy 獨有的溫柔美聲可以有另一番體會, 終於都明白點解版友們咁多個都慢慢投入膠膠的世界, 因為如果真係鐘意聽歌的朋友, 聽黑膠的確係可以讓大家重拾聽歌的樂趣呀!!!
黑膠轉DSD究竟點做?? 將黑膠數碼化永久保鮮吧!
講得呢部黑膠唱盤, 又點可以唔講埋佢既黑膠轉DSD的功能呢?? Sony 在這個黑膠轉DSD的領域上, 絕對係第一家廠商有呢個功能, 而且做法都非常簡單, 大家只需要將盤後的USB線插到你的電腦上, 再在 Sony 的網站上下載就可以, 為方便大家, 小瑟就係度將下載連結放在下文, 等大家簡單地下載而且安裝呢.
PS-HX500 – Hi-Res Audio Recorder下載連結
∇ 大家可以見到呢個介面其實非常簡單, 大家只要選擇你想要收錄的檔案格式, 再按”RECORD”制就可以了, 如果大家用 DSD 5.6MHz 1bit 最大的格式的話, 錄製一首歌的容量大約為 500MB一首, 以一隻64GB的SD卡來說, 都可以收藏110首歌左右了!
DSD 5.6MHz 檔放入 Sony NW-ZX2實試
小瑟問左毒峰借左隻張國榮膠膠來試玩一下, 再收錄成 DSD 5.6MHz, 再用 Sony嘅 NW-ZX2 Hi-Res Walkman, 一聽之下, 音壓係比較細的, 但只要調大音亮就可以了, 而聲音的質素都真係可以保持到黑膠獨有的模擬味, 尤其係舊唱片的錄音, 大家都知道以前D唱片都會用D EACH去另到歌手唱歌更有氣氛, 呢點係轉DSD出來之後氣氛依舊. 好多人都會問, 究竟會唔會錄埋D炒豆聲入去, 冇錯, 的確係會錄埋炒豆聲入去的, 不過以小瑟試左幾隻碟來講, 如果隻碟洗得干淨, 又真係唔多少豆聲呢.
Conclusion : 「平價又可轉高清FILE，想入黑膠之門可以認真考慮」
其實岩岩囉到隻黑膠盤來返時, 都真係有D驚唔識點玩, 尤其係小瑟家中跟本冇可能有位放到一部黑膠唱盤, 多年來都冇認真諗過要玩返黑膠, 不過自從 Sony PS-HX500 黑膠盤到左編輯部比小瑟玩過下之後, 以經過電腦再數碼輸出到一套的式的微型音響組合 CAS-1 都可以出到一陣陣溫柔而細膩的音色, 的確係令小瑟有D心郁郁想入一隻回家慢慢玩, 但一想到究竟放係邊先好呢個問題, 小瑟就將想法打破了, 現在反而考慮緊好唔好係編輯部這個小小的地方設定一套2 Channel組合來平時聽下呢???? 講返個盤先, 以 Sony 呢個牌子出一部切合現時高清玩法的器材, 既可以收聽黑膠出來的模擬音色, 又可以將呢個音色以最高規格收錄成DSD數碼檔案, 的確係得一想二的一個不二之選, 如果大家都想進入黑膠的世界而又可以將呢份黑膠感帶到你的CAS 及 Hi-Res Walkman 隨身聽器材之上, 呢部黑膠唱盤應該可以滿足你呢!!!
