Yamaha 剛剛 3 月尾就已為旗下頂級 AVENTAGE 系列推出 Firmware 升級 DTS:X，唔知有機嘅朋友升級左未？阿賜試部 CX-A5100 前級的時候就剛剛好有得升級，實在相當好彩，所以有得試埋 DTS:X。到底呢部高階前級表現係點？升級完之後又有咩玩？今次就同大家試下！
而家 Yamaha 有得玩 DTS:X 嘅機暫時得 4 部，全部都係高階款，合拼機 3 部（RX-A3050、RX-A2050 同 RX-A1050），前級一部、就係今次測試的 CX-A5100。11.2 聲道處理，可以出齊 Dolby Atmos 同 DTS:X 7.2.4，RCA 同 XLR pre-out 都有。附送收音咪同座，用 YPAO 做自動音場校正，可以配合 CINEMA DSP HD3 音效處理使用，基本上係現時普通家用機嘅最高配置。
∇ Yamaha 4 部支援 DTS:X 嘅機入面唯一嘅前級。
∇ Wi-Fi、藍牙、MusicCast 功能有齊，AirPlay、Spotify 都支援，音樂串流功能都幾齊全。
∇ 配備前置 HDMI，間中臨時要駁嘢都方便。
畫面支援現時最高 4K 規格
畫面處理都支援現時最高規格，包括 4K/60P、HDCP 2.2、BT.2020 色域、HDR 影片內容的 Pass-Through 等等，咁多規格、睇唔明唔緊要，淨係要知道就算用 4K HDR 電視、或者日後升級 UHD Blu-ray 機都照樣可以完全兼容就得。而作為 AVENTAGE 系列一員，同「AVENGERS」一樣個個都咁有料，用上鋁製前面板、H 形內籠支架同埋堅固定架設計，提供最好穩定性。
∇ 機背都仲有 7 組 HDMI 輸入，而且全部支援 HDCP2.2，過到 4K/60 HDR 視訊。
∇ 駁 LAN 線同 Wi-Fi 都得，如果經常用到網絡功能的話，駁 LAN 線就穩定啲，Wi-Fi 天線可拆、唔會阻訂。
∇ 7.2.4 全平衡 Pre-Out，算係現時普通民用最頂級規格。
支援 DSD 24bit/192kHz
音樂播放方面，支援 DSD 2.8MHz/5.6MHz、24bit/192kHz 的 FLAC、WAV、AIFF、24bit/96kHz 的 Apple Lossless，基本上數得出都齊。內置 Wi-Fi 同藍牙，支援 AirPlay、Spotify，當然仲有自家的 MusicCast 無線 Multiroom 音樂系統，阿賜就比較貪心，如果有埋 TIDAL 同 Google Cast 就梗係更好。
∇ 「開箱」照一枚，採用左右兩邊線路對稱分離設計，減少干擾。
∇ 左上係 Wi-Fi 模組，上面係 HDMI 同視訊處理，右下解則是音效解碼晶片。
∇ 中間都有大大隻環牛。
∇ 除了加厚的腳墊之外，面蓋都有塑膠黐住，進一步加強機身穩定性。
∇ 已好少見有摺機咁款嘅遙控，其實好多功能用 AV Controller 個 App 設定仲方便。
∇ 阿賜好失策咁唔記得影個收音咪，唯有攞官方發相頂替下，不過都係呢個款，唔影都無所謂啦~（唔好打頭 !!!）
CX-A5100 主要規格及功能：
11.2 聲道處理，設有 RCA 及 XLR 輸出
支援 Dolby Atmos 及 DTS:X（最高 7.2.4 配置）
8 入 2 出 HDMI
支援YPAO R.S.C. 自動音場校正、配備 3D、多點及角度測量
配備 CINEMA DSP HD3 音效處理
4K/60P 視訊 Pass-through（兼容 HDCP 2.2、HDR 及 BT.2020 色域）
可播放 DSD 2.8MHz/5.6MHz、24bit/192kHz FLAC、WAV、AIFF、24bit/96kHz Apple Lossless
內置 Wi-Fi 及 藍牙
支援 AirPlay、Spotify、MusicCast
一拔一插即刻玩得！
今次開箱冇乜特別，所以就直接駁機測試啦。因為 Post76 Club 度用緊嘅前級 Onkyo PR-SC5530 都係 11.2 聲道，所以只需要抽晒成排 XLR 出嚟認返位再插返就 OK。不得提部 CX-A5100 比起阿賜之前試嘅 RX-A3050 實在好駁太多，指示清晰、一駁就係。（呢方面合併機真係要改進一下，唔睇說明書都唔知邊條聲去左邊，Set 機都搞半日。）
∇ 一駁收音咪就可以自動開始 YPAO 調節，高階機有得測埋角度同天花喇叭高度，有得測梗係測埋佢。
∇ 要測埋角度就每個聲道都要度 4 次，好彩 CX-A5100 粒處理晶片夠快，基本上成個過程就算度足 8 個位都係十零廿分鐘搞掂。
可以度埋喇叭角度
CX-A5100 嘅 YPAO 仲可以度埋喇叭角度同天花喇叭高度，多啲數據、理論上計個自動音場可以更加準。不過就要做多一重步驟，每個聲道都要擺 4 個位度一次，不過好在 CX-A5100 粒處理器超快，每次都係十秒內就計完數，所以唔算太花時間。另外 YPAO 可以度最多 8 個位，阿賜就試過度 1 個位同 4 個位，啲聲係有差別，要就足 4 個位啲聲會散少少，所以今次就梗係做「自私鬼」，淨係用 1 個位調聲。
∇ 度出嚟的角度同高度基本上都準確。
細音量一樣測到聲
校機方面，其實單次度聲都有 9 成準，不過！就要記得 Check 下啲設定睇下合唔合理，例如就有一次 TFL（Top Front Left）無端端度左成 3 米幾，手動 Set 返同 TFR 一樣都 OK。有時度聲的時候避唔到環境雜音，就會有機會干擾影響調聲結果。不過 YPAO 有一個相當好的功能，就係細聲一樣度得準。所以有時日頭環境聲比較多，就可以選擇響夜深人靜嘅時間嚟度，校細聲少少，一樣度得，甚至仲好。
∇ 因為前置喇叭比較勁，所以其他聲道都要推高少少就一就，特別天花聲道再推多半個 dB，等啲聲再出少少。
7.1.4 開聲 !!!
其實用 YPAO 度完就基本上搞掂，不過自己手多，總係要改下嘢，系統測到前置係大喇叭，自己就將佢改做細喇叭，交多啲低音俾隻秦朝 15 吋輸出，分頻點就全部統一 set 做 80Hz，然後又改下呢樣、改下果樣（等陣測試部分會詳細講），再然後就開聲啦！
測試器材 List：
Blu-ray機：OPPO BDP-105D
前級：Yamaha CX-A5100
後級：Ediscreation EC-7、Ediscreation EC-5
投影機：Epson EH-TW8200
7.1.4 喇叭：
● 前置 Chario Academy Sovran
● 中置 Jamo C10 CEN
● 後置 Jamo C103
● 後中置 Jamo D500
● 天花 x 4 KEF E301
● 超低音 秦朝 BQ3115D
音場連貫
阿賜有一個良好習慣，就係駁好 Dolby Atmos 系統之後點都會試幾 Cut 《Dolby Atmos Demo Disc》入面啲試片，因為內容簡單直接、最易聽出效果（或者問題）。聽「Leaf」一段，音場連貫性十分好，旋轉一圈完全冇斷聲位。當然，你會話用到 7.1.4 都仲斷聲仲得了？其實擺位或者 set 得唔好係唔出奇的。Post76 Club 嘅 Jamo 後中置其實都擺高咗少少，樹葉飛到後面都飄高左啲啲，但係整體定位算相當準，尤其音場包圍的密度相當高，環境風吹草動的細節十分豐富，呢個都係前級處理的 功力所在，當然後級對細動態的控制都應記一功！
∇ 記得要 Enable 返 Object Decode Mode 先至可以解 Dolby Atmos 同 DTS:X 音效
∇ CINEMA DSP 3D Mode 都要記得開。
∇ DSP 就要揀返 Surround Decoder，玩 Dolby Atmos 當然就要 Set 返做 Dolby Surround。
層次十足
再嚟就用《末日先鋒：戰甲飛車》女主角駛入山谷一段實試一下個空間感，向山谷高叫一段的回音擴散性十分之強，幾浸聲一浪接一浪咁去層次感十足，而且天花音效同後置、後中置嘅位駁得好靚，表現值得一讚。闖關逃亡一段，激昂嘅配樂做主、再滲返後面槍林彈雨同爆炸聲出嚟，除咗分析力相當唔錯之外，勁度亦都好夠。要數缺點的話，淨係配樂同實景音效配合得唔夠完美，依然有輕微凌亂，其餘定位同包圍感都相當令人滿意。
∇ 試機時揀 EQ，預設係 Flat，揀 Front 的話前置聲會再實淨啲，最後揀咗 Natural，定位同包圍感配合會好少少。（話時話，用 Through 都唔錯，動態會強啲，不過音場效果會差少少。）
聲底厚
阿賜幾鍾意用《職業特攻隊》開場一段試低音同人聲，其實開場音樂已經幾好試，幾下小號的節奏「噠噠、噠噠⋯」勁度同質感都十足。湯告魯斯跳上飛機一段，引 擎低頻厚度都好夠，响一片雜音當中同拍檔通訊，其實幾考人聲分析力，CX-A5100 偏厚聲，自己唔算特別鍾意，不過應該唔少師兄喜歡呢隻聲底，細緻度同還原力都唔錯。
∇ YPAO 測到係大喇叭，最後全部 set 做細喇叭，將低頻交晒去超低音處理，分頻點就 Set 做 80Hz。
∇ 有一個為提升音樂音質而設的 Enhancer 功能，不過睇戲時用竟然可以將環境聲推出一層細節出嚟，飛機引摩聲、草叢包圍感都再增強咗。不過聲音結像就會散少少，有辣有唔辣。
∇ 就係呢個三月尾嘅 Firmware，升級咗先有得玩 DTS:X
∇ 然後 Surround Decoder 就會多咗 Neural:X 的選擇，播 DTS:X 記得揀返。
空間像真度高
再嚟當然要試下 DTS:X，不過試機果時阿賜手頭上都係得隻 DTS:X Demo 碟，不過都照殺，反正 Demo 碟試效果仲清晰方便。青蛙捉蟲一段定位極之明顯，而且都相當準確，由樽外到樽內的音效空間感轉換亦都做得極之像真，還原度好好，可以話 CX-A5100 已經完全係「DTS:X Ready」，完全播到晒預期的效果。
Up-Mixing 殺出新血路
最後試一試新鮮滾熱辣的《星球大戰：原力覺醒》，因為只係得 DTS-HD MA 7.1，所以梗係要試下 Neural:X 的 Up-Mixing，順手比較埋 Dolby Surround 的 Up-Mixing。其實兩者都可以重現返千歲鷹由上面飛過的高空音效，大概都有原生天花聲道六七成效果。夾硬要講的話，Neural:X 的 Up-Mixing 方向感同定位會再清晰少少，引擎聲的質感再實淨啲，同以往試呢兩種 Up-Mixing 比較的結果一致。而家 Dolby Atmos 已經搶佔咗大部分市場，唔通 DTS:X 真係要靠 Neural:X 的 Up-Mixing 殺出條血路？
∇ Neural:X 對 Dolby Surround 的 Up-Mixing，前者的效果稍勝少少。
Conclusion : 「炸機臨場感一絕，Enhancer 功能睇戲有驚喜」
用得前後級就梗係想分析力、控制力、爆發力、定位、方向、包圍感全部都做好，事實上 CX-A5100 都的確交足功課，最重要係功能選單有齊晒各種設定可以配合唔同喇叭、擺位、空間等因素做調校，梗有一種啱你。而原本用落音樂度的 Enhancer 功能，睇戲用竟然可以推多一層細節同空間包圍感出嚟，實在有驚喜，有機響手的朋友記得試下。
