以前打機，無華麗嘅畫面，無震撼嘅音效，講緊嘅係14″電視機，插嘅只係紅、白、黃AV線，幾個朋友”烘”埋一齊睇，都玩得不亦樂乎。
以前嘅遊戲，遊戲性強、 好耐玩，甚至好多遊戲，爆機只係個傳說，無返咁上下技術，唔煲返咁上下時間，根本無可能爆機，相信唔少朋友仲有好多未爆機嘅遺憾喺心中。
另一樣令人又愛又恨嘅，就係遊戲內隱藏嘅秘技喇，當年喺一個未有互聯網嘅世界，秘技只能夠以以訛傳訛嘅方式流傳，好多方法都要親自印證，先知真假。
但係一啲遊戲入面加咗所謂嘅秘技，令遊戲增添咗一份神秘感，更加引人入勝。
以下係小編喺秘技界入面嘅丁點經驗，同大家分享一下：
上上下下左右左右BA start
要數最經典嘅，莫過於呢個組合，而識得呢組經典秘技嘅朋友，相信都有返咁上下機齡，呢個組合用過喺好多遊戲上，無記錯小編第一次接觸呢組秘技，係”魂斗羅I “，之後知道嘅有”沙羅萬蛇I “、”兵峰I “……等等 ，效果係：30條命、full gear等等，之後以上遊戲嘅續集都出現咗惡搞版，輸入之後會變為自爆。
所以之後引伸出以下公式。
右左下上AB start
“魂斗羅II”、”沙羅萬蛇 II”之後，上上下下左右左右BA start呢個組合已經無正面效果，變咗為右左下上AB start。
ABBA
出現喺”怒I”，要2P（雙打）先有效，如其中1P死咗，只要另1P未死，輸入ABBA，就可以無限復活，但如果輸入唔切，兩位都死咗嘅話，咁就sorLy了。
街頭霸王II _八人版（無影撻、癡身、定格、熄機）
出現喺”街頭霸王II”呢四招，嚴格嚟講，似Bug多過似秘技，而無獨有偶，都出現喺軍佬身上。
當時嘅出現，風頭可謂一時無兩，就算唔係機迷，都專程去機舖一睹”無影撻”嘅風采。
（由於操作上有一定嘅複雜程度，不在此詳述）
街頭霸王I（出兩個波）
講緊嘅並唔係”葵花寶典”，第一集無呢個版本。
但係呢隻遊戲都不乏經典傳說，有人話去非洲，有人話出一陽指，不過通通都係流料。
但有一樣唔太多人知嘅堅料，就係出兩個波。
不過限制條件都好多，只限第二版打忍者時，忍者會跳起向下掟飛鏢，就啱位置，令飛鏢掟中角色下身，被掟中前先出第一個波，中鏢後角色會被取消硬直，當第一個波未消失前，再出第二個波，畫面上就會出現兩個波了。當然實際上係其實無乜作用嘅。
特殊部隊（連射、雷射砲）
作為射擊遊戲，最煩惱莫過於要瘋狂射彈，簡直人都顛。
特殊部隊只要快速輸入射彈制達一定程度同時間，角色就可以出現慣性連射，只要喺角色死亡之前，都可以㩒實射彈制做連射，輕輕鬆鬆專心避彈。
而另一樣更殺食嘅秘技就係，只用齋彈打死第一版大佬（超大坦克車），大佬身後就會出現一舊正方體嘅黃金磚塊，食咗之後就可以擁有貫穿任何物件嘅雷射砲，過版自然事半功倍，當然死咗就閣下自理了……
足球小將II（角色大調亂）
首先一定要用紅白機，而且一定要插Joystick，因為操作上就會變成兩個制都操控1P，之後去到換人版面，平時嘅設定係龍門只可以換龍門，但插上Joystick後，因為都係1P，換人時只要一個制拉上，一個制拉下，換人指標會慢慢向下順滑移動（正常係一格一格），將指標移到兩格中間，再向右拉，就可以進入換龍門嘅範圍，呢個情況下，你就可以換林源三出嚟踢，換任何人入去守龍門喇。
唔講大家一定唔知，泰來嘅守龍門能力原來仲勁過林源三嫁（伸脷）。
小編玩過嘅遊戲唔算多，不過所講嘅都係一啲親身經歷，並唔係”街頭霸王I”去非洲之類嘅傳說（笑），又忽然間無聊諗起，覺得可以同大家分享下，所以胡亂寫咗幾隻字，請勿見怪。
而遊戲嘅秘技可以話多如天上繁星，講三日三夜都講唔晒，所以不能盡錄，好多如”孖寶兄弟”無限1UP、秘道……等等，都無提到。
而且好多實在係唔記得咗……
所以非常歡迎大家補充同參與討論，懷緬一吓小時候嘅童年回憶。
https://www.post76.com/x2/forum.php?mod=viewthread&tid=238178&page=1&extra=#pid3797463
