BDP-103D 都算威，「摩機」摩到官方出個特別版 BDP-103D Special Edition（簡稱BDP-103D SE）。最近呢款新機終於正式到港，阿賜今次就率先試下，究竟呢款特別版有幾特別？係咪值得用家俾多啲？大家一齊嚟睇下佢嘅表現啦！
基本上 BDP-103D SE 外表同普通 103D 係一模一樣，所以今次都冇特登影低開箱，機身表面唯一唔同、係前面有大大隻「Special Edition」字樣，避免大家認錯。SE 同普通版大部分的「唔同」都係「內在」，有圖有真相，兩部機同場就一齊解剖俾大家睇下。（以下內容涉及解剖環節，需要家長指引 XD）
∇ 特別版同舊版外表上唯一分別就係有個大大隻的「Special Edition」字樣
解剖圖，左邊係 SE 版、右邊係普通版
一開個個蓋就已經見到分別，甚至幾大分別，原版係薄身金屬殼，SE 版用鋁箔加上膠帶黏貼左 3 條特殊橡膠，抑振能力強左好多！
∇ 類似做法亦都應用到 BD ROM 上面，將機殼同讀碟兩大振動來源減震，可以想像到對穩定性的提升會幾明顯
∇ 然後就由電源「輸入」部分講起，普通版用銅線，SE 版則係鍍銀單芯線
∇ Fuse 部分，由原本銲死變成加入保險絲座，而且改用了德國ELU/SIBA音响級專用的 Glass Fuse
∇ 電容部分由 Acon 電解電容更換成 Panasonic FC 系列電容
∇ DAC 的穩壓電路一樣改用了 Panasonic FC 電容
∇ 8 聲道 DAC 之後的 OP Amp 前後用到的 13 粒小型交連電容全部換成數值更大的 Panasonic 電容
∇ 聲效處理方面，以 Burr-Brown OPA2132 代替了原本左右聲道的 N5532A，提供兩聲道表現，其他 OP Amp 晶片就繼續保留
睇完以上的「圖解」，大家都可以見到，呢部 BDP-103D SE 的確係幾「Special」，改動的部分相當多，只計電源的話幾乎可以當係一部全新機款。不過無論點改、加幾重料都好，靚聲先係最實際，事不宜遲，即刻同大家 AB 比較下兩部 BDP-103D 的表現。
即場A/B比試103D vs 103D SE
試機部分，今次一樣響 76-FriendClub 旺角店進行，以 Onkyo PR-SC5530 作前級、Ediscreation EC-7 做後級、配合 Chario Academy Sovran 座地喇叭測試，除左播 Blu-ray 用到 7.1 系統之外，聽歌全部係 Pure Direct 兩聲道播放，播碟之前亦都確保將 Blu-ray 機的設定保持一致。講明係 AB 比較，係播一隻碟就即刻換一部機再播做比較，無花無假、務求即刻聽到個分別。
「谷行雲《Gigi in Cuba》」
先試一隻谷行雲《Gigi in Cuba》，相信上開 76-FriendClub 嘅朋友對呢隻碟都好熟悉，本身都預期用 BDP-103D SE 可以聽到一定提升，不過估唔到係提升可以咁多、咁明顯！
基本上一開聲個差別就已經出晒嚟。明顯的提升包括人聲，普通版 103D 人聲較矇、粗線條，103D SE 嘅分析力提升起碼有兩級，除左女聲還原力好、細緻度一流之外，人聲線條亦修飾得較為「窈窕」，結像實淨得嚟又唔係太死實，無論演唱《大地》時較有勁度嘅聲線、定係《分分鐘需要你》比較甜美嘅演繹都恰到好處。
另一個明顯提升係音場闊度，縱向同橫向嘅空間感都闊左幾多，但又唔會鬆散。配樂、特別係鼓聲低頻包圍感更加強，低頻下潛力同分析力都明顯提升，聽《大地》前奏一段密集鼓聲就已經可以聽到分別。
>
「Eagles 《Farewell Live From Melbourne》BD」
試過 CD，忍唔住又用 Blu-ray 試下，睇下會唔會有分別。可能俾之前聽 CD 的表現嚇左一嚇，聽 Eagles 《Farewell Live From Melbourne》有少少心理準備，個差別無純兩聲道咁明顯。
基本上音場闊左，就算係觀呼聲嘅立體感同定位都更加好。動態同低頻分析力提升比較明顯，用普通版 103D 聽的話，鼓聲同人聲夾雜嘅部分有少少混亂，103D SE 就完全無呢個問題。
人聲同配樂分離度夠之餘，音樂感配合亦相當好。《Hotel California》小號 solo 一段，103D 聽落會有少少刺耳，103D SE 將個高音修飾得圓闊但不失細節，震音動態甚至更明顯、質感亦更加突出。
>
AB 比較完，基本上 BDP-103D SE 係完勝、而且係大勝 BDP-103D。Special Edition 版會贏本來係意料中事，不過估唔到會贏咁多。有機會大家一定要試下，基本上聽過 SE 版係返唔倒轉頭，尤其好似阿賜今次咁不停反覆 AB 比較，後來會有少少接受唔到普通版 103D 嘅聲。
越級挑戰 105D 又會如何?
「《2015 原音精選》」
咁對住 BDP-105D 又點？機會難得、有 3 部機同場，最後就梗係要嚟一個 BDP-105D 的「亂入」比拼，究竟原本就標榜靚聲的 105D 同摩機靚聲版的 103D SE 又邊個好啲？
用比較多元化的《2015 原音精選》來比較 BDP-103D SE 同 BDP-105D，先同大家講個「結果」，試完四五首歌之後，阿賜嘅評分係……平分秋色。唔係搞爛gag、亦都唔係要以和為貴，而係兩部機的確互有高低，以下逐點同大家分享下。
人聲、分析力方面，阿賜覺得 103D SE 稍勝 105D，之前都講過，103D SE 人聲線條會較為窈窕輕快少少，而 105D 則比較飽滿圓潤，個人聲共鳴感會稍強一點，亦間接令到聽感上分析力稍稍不及，不過事實上係取向上的不同。
而 105D 的能量同聲音餘韻就比 103D SE 出色，聽《怎麼捨得你》唱到肝腸寸斷部分，就會覺得 105D 更加飽滿扎實。而音場闊度方面 105D 也稍好，兩者結像都相當清析，縱深兩者差不多，橫向的聽感 105D 就似乎包圍得更好。概括而言係 103D SE 還原力好、較為中性偏向輕快，105D 較為飽滿札實、能量動態再稍強一點。
Conclusion :「俾多 50% 價錢換 50% 提升？」
BDP-103D SE 定價係 HK$8,999，比起而家 BDP-103D 普通版街價貴大約 50%。音質上的提升阿賜一向覺得好難量化，對於比較著重分析力、還原度的用家來講，103D SE 的提升甚至可以話超過 50%。對於同時玩影音，甚至較為著重聽歌的話，103D SE 絕對係更加好的選擇。比起 105D 又點？103D SE 個價其實都貼得幾近，105D 支援 USB DAC、功能再強一啲，音效上只可以話兩部機性格有少少唔同，呢樣就真係要試過先知邊部啱你，同埋睇返自己對功能嘅要求喇。
【首批103D SE送RCA線】
近日代理為了答謝香港用家，首批訂購 103D SE 的用家會加送美國發燒音響品牌原點 Increcable 黑水晶 Crystal 訊號缐一對 (RCA, 1M, 價值HK$1,300)，如果大家都考慮以 103D SE 作為你的聽歌訊源，其價值又增加多一點點呢．
聽人講不如自己親耳聽 – Oppo BDP-103D Special Edition 全港首發初體驗
我地就係知道玩影音一定係耳聽為實，所以我地就係今個星期六在銅鑼灣崇光百貨 13 樓AV Life 生活影音內的示範房為版友來一個OPPO全線PK戰，如果你都希望可以知道版友聽完之後點樣既反應？？記得留意我地版友的討論勒．
