相信有唔少 Post76 的版友都係 Cambridge Audio Fans，其實自從自己做返代理之後，Cambridge Audio 的確相當進取，加上 CX 系列新機推出，成個氣勢出晒嚟，好似部部機都有賣點咁。阿賜今次就有機會試到新 CX 系列入面 CXN + CXA80 一套「西裝」，前者係純 Network Music Player，後者係兩聲道擴音機。睇名都好易分，好似之前 CXU 宇宙盤，「U」就係 Universal Player，今次「N」就係 Network Player，「A」就係 Amplifier。
近年網絡串流音樂盛行，阿賜自己都有用 AV Amp 玩串流聽歌，不過對擴音機來講 Music Streaming 始終只係「副業」，音質係爭少少。CXN 一萬樓下的售價其實幾啱入門到中階玩家嘅 Budget，一部機有齊 AirPlay、Spotify Connect、Internet Radio、UPnP 電腦/NAS 串流播歌功能，主流的 Streaming 方式都支援晒咁滯。想玩藍牙都可以，但就要另外買隻 BT100 手指先得，雖然大部分屋企都有 Wi-Fi，音質更好而且同樣方便，不過原廠有得送埋就梗係更加好。去官網睇下先發現，先來 CX 系列已經幾齊腳，連 AV Amp 都有。
∇ CXN 配件，除左電源線就仲有呢 3 樣，放心，有送 Wi-Fi 天線。
擴音機方面，CX 系列兩聲道 Amp 有兩款，分別係 CXA80 同 CXA60，樣差唔多，其實 CX 系列全部都係銀黑色拉絲面，闊度一樣，所以點疊埋一齊其實都襯。今次試玩的「大哥」CXA80 功率大些少，每聲道 80W。CXA60 就係 60W，主要少左 USB DAC、XLR 平衡輸入，其他規格差唔多，所以可以視乎自己需要來揀。詳細功能同規格大家上網就睇到，我估大家都冇興趣睇我多講，事不宜遲，先來最興奮一 Part：開箱！ 除左機身係襯一套之外，連盒都一樣，問你死未。
∇ 盒面有 show 支援 Spotify、AirPlay 同埋 Apple 「i 裝置」。
∇ 無錯！除左電源線同埋一條橙色 control bus 之外，係唔包任何其他線材嘅。
∇ 正式「開箱」！黑色袋係咪有少少熟面口？不過佢冇手挽，唔可以擰住周圍走。
∇ 幾張「傳單」，Quick Start 只有基本安裝指示，詳細 Menu 要上網 Download。
∇ 燈燈燈櫈！出場，小弟唔記得搣貼紙，敗筆…
∇ 精緻牌仔寫住「GREAT BRITISH SOUND」，隔離 USB 用來直接播歌或者駁 iPhone 都得。
∇ CXN 可以駁電腦做 DAC，光纖、同軸輸入輸出都有齊。
∇ RCA 同 XLR 輸出都有，上面有反轉的標示，方便響機前摀身去後面插線用。
∇ 送 Wi-Fi Dongle，亦都有 LAN 頭，屋企用駁線串流會穩定啲。
∇ 成個機背，係咪同之前 Stream Magic 6 V2 有啲似？CXN 的確係佢基礎上面開發出來。
CXN 主要規格同功能：
– 面板裝設有4.3吋(11cm) 高清顯示屏幕，內置瑞士Anagram Technologies共同開發第2代改良 ATF2 24 Bit / 384 kHz升頻技術，並可透過USB接收DSD訊號，乙太網及 Wi-Fi無線網絡接收最高規格達 24 Bit / 192 kHz 水平的PCM數碼訊號，可加配BT100藍牙接收器
– D/A轉換器：2 x Wolfson WM8740，24 Bit
– 數碼輸入 (最高24 Bit / 192 kHz)：同軸S/PDIF、USB A型 x 2、USB B型 (同時支援DSD傳輸)、Wi-Fi、光纖TOSLink、乙太網 10/100 Base-T
– 數碼輸出 (最高24 Bit / 192 kHz) ：同軸S/PDIF、光纖TOSLink
– 對應檔案系統格式：FAT32，NTFS
– 模擬濾波：2極雙差動Bessel濾波器，雙虛擬地瑞平衡架構
– 模擬輸出：RCA、XLR
– 對應格式：WAV、FLAC、ALAC、AIFF、WMA、MP3、AAC、HE AAC、AAC+、OGG
– Wi-Fi技術：IEEE 802.11 b/g
– Wi-Fi保安加密：WEP, WPA, WPA2
– 串流通訊協定：RTSP、MMS、HTTP
– 體積 (H x W x D)： 85 x 430 x 305 mm
– 重量： 3.5 kg
∇ 睇完 CXN 就到 CXA80，一樣…係唔記得搣膠紙…
∇ 呢 3 個「神秘」按鈕分別係 Balance、Bass 同 Treble，輕按就會彈出，旋轉就可以調聲，勁方便。
∇ 有 Speaker A, B 輸出，可以獨立運作推兩套喇叭，又或者 bi-wire 都得。
∇ 一樣有 USB DAC 功能，較低階嘅 CXA60 就無。
∇ 除左光纖、同軸、RCA，仲有 XLR 平衡輸入，可以同 CXN 夾返，同樣 CXA60 都係無。
∇ 唔係自己機所以無解剖到，大致上係左右聲道獨立供電、用大型環牛，電路分隔做得好好，將干擾減到最低。
∇ CXA80 配件，無錯，同 CXN 幾乎一樣，都係用同一款遙控（所以會有兩隻），遙控頂係 CXA、中間 CXN、最底 CXC ，可見 Cambridge 幾想你地買成套，一個遙控控制晒。
∇ 循例獻上成個機背。
CXA80 主要規格：
– 80W RMS @ 8 Ohms、120W RMS @ 4Ohms
– 頻率響應：5Hz – 60kHz
– 輸入端子：XLR、RXA x 4、3.5mm audio、光纖、同軸、USB
– 輸出：Speaker A、B； 3.5mm 耳機、Pre-out、Subwoofer Out
– 體積 (H x W x D)： 115 x 430 x 341 mm
– 重量： 8.7 kg
開完箱就來駁機測試啦！
開完箱就即刻來駁機、Set 機同試機，接駁就好容易，CXN 用 RCA 落 CXA80，再駁去 Cayin LYRE T50 書架喇叭就完成，喇叭線用同版子的 CS-50SP。由於試玩時間有限，所以無挑戰到大喇叭。駁機時記得駁埋橙色 Control Bus，咁就可以一次過遙控晒兩部機。CXN 支援播放格式好齊全，ALAC、WAV、FLAC、AIFF、DSD64、WMA、MP3、AAC、HE AAC、AAC+、OGG Vorbis 有齊，最高支援 24bit/192kHz 音訊，而且配備 Wolfson WM8740 DAC 解碼晶片，所有訊源都可以 up-sample 去 24bit/384kHz 輸出。4.3 吋大芒幾好用，無論係睇 menu 定音樂資訊都好清楚。聲音採用「直出」，幾個調音旋鈕都歸零。一開機就即刻叫你入 Wi-Fi 網絡，今次響 AV Gala 試機（出返張贊助相先 XD），添置 18 樓，唔好去錯！逢星期一休息，試機果日遇到幾個師兄上左去要摸門釘。
∇ 音樂 3 大來源，分別係 Radio、Music Library（主要係 USB 同 NAS/電腦）、Inputs（光纖、同軸、USB DAC）。
∇ 有繁體中文，要讚一讚，而家唔係個個品牌有！
∇ 出日文名同資料都冇問題，Album Art 可以直接睇到。
∇ 有個大芒好處係睇歌曲 list 同選單結構都好方便。
∇ Spotify 資料都可以真接傳過來。
接駁方式好多，集中試 3 樣！
終於去到戲肉試機部分，因為 CXN 可以播歌嘅方式好多，時間有限之下唯有集中試其中 3 樣：USB DAC、Network Streaming / USB Storage 同埋 Spotify。CXN 同 CXA80 兩部機都可以做 USB DAC，今次就用 CXN 駁電腦，買機唔送線，所以 USB 線要自備，只係普通一條 USB Type B 轉 Type A 線，即係俗稱「Printer 頭 USB 線」。駁 MAC 唔使裝 driver 直插就得，今次用 Surface Pro 4 試，去返官網下載安裝返個 Audio driver 1.67 就搞掂。
USB DAC：〈Hotel California〉by Eagles @ FLAC 24bit/192kHz
一來就懷念下 Eagles 先，其實手頭上有隻 〈Hotel California〉 64bit/192kHz 版本，諗住摶大霧試下，可惜真「食唔到」。死死地氣試返FLAC 24bit/192kHz，一開聲就有驚喜，雖然對 LYRE T50 唔難推，不過估唔到 CXA80 輸出咁夠力。開場掌聲、歡呼聲加結他前奏一起，氣氛即刻出晒嚟，二三百呎空間瞬間填滿。音場開揚之餘，定位好精細，幾下歡呼聲同掌聲簡直「睇到」啲人企邊。分析力同預期中差唔多，單人聲或者獨結他演奏都好出色，比預期中好嘅係，副歌部分主音、電結他、Bass、鼓聲同歡呼聲炒埋一碟，分析力依然保持得好好，每樣樂器都呈現到自己嘅質感同定位，最重要係夠夾埋一齊整體性同音樂感都強。
Network Streaming：〈Impromptu〉by Tony Overwater & Bert van den Brink @DSD64
Network Streaming 同 USB Storage 之所以擺埋一齊，因為 CXN 用呢兩種方式播歌果時支援嘅檔案解碼差唔多一樣，USB 播到的話用 Network UPnP 基本上都播到。因為唔係屋企試，冇 NAS 駁，所以經網絡直駁電腦 share 就算。不過大家都知，經網絡駁 NAS 通常易過駁 PC，PC 播到、NAS 更加問題不大。聽完熱鬧嘅歌，之後就試下純音樂。〈Impromptu〉一開頭一陣雜亂人聲之後，聽到就係「靜」，背景真係好靜，幾下低音大提琴撥弦彈出來，夠晒立體，雖然細聲，但係質感一流。鋼琴接替做主音之前，大提琴幾下大力撥弦，聽到個心真係有少少「離一離」，估唔到 CXA80 夾 LYRE T50 可以做到咁強低頻爆發力！另一個原因係，因為〈Impromptu〉初段比較「文靜」，所以當時校到幾大聲，至於實際係幾「大聲」？自己都唔知，因為無論用 App 控制定機身前面板都冇顯示音壓、音量。
USB Storage：〈Like A Virgin〉by Madonna @ FLAC 16bit/44.1kHz
CXN 前後都有 USB，插外置硬碟播歌其實都方便，兼容亦都最好，DSD64、FLAC 24bit/192kHz 都可以直接播。除左睇唔到音量之外，今次試 Madonna〈Like A Virgin〉就發現 CXN + CXA80 另一個缺點，高音比較飇。聽樂器，例如鋼琴、結他唔太覺，女聲就有少少搶耳。不過其他優點依然保持到，分析力高，人聲同樂器、樂器同樂器之間分離度好，音場闊得來 Madonna 的歌聲結像夠實淨，而且滲透力強，係線條粗少少。
Spotify 換歌方便
最後有時間試埋 Spotify，手機駁去 CXN 同一個 Wi-Fi 網絡就可以選擇用 CXN 出聲。不過要留意係 Premium、即係有俾錢的用家先有得用 Spotify Connect 咁玩，免費用家就冇。Spotify 換歌好方便，所以捉緊時間試左好幾種唔同音樂，The Beatles、Supper Moment、Classical 都有。基本上聽完上面啲 Hi-Res 音樂再聽 Spotify 當然就爭一截，不過 CXN 個 24bit/384kHz up-sampling 係有啲用。特別播古典、弦樂的時候，樂器聲會更加綿密，補足左少少壓縮音樂果種有少少「虛」嘅聲底，起碼聽落去順耳好多。不過，大家睇上面影啲 Menu 都可能發覺，CXN 機身度可以調校嘅項目好少（係幾乎冇），主要靠前面 3 個細旋鈕去調聲，所以亦都冇位可以關左個 Up-Sampling。遇著 Supper Moment 部分 Pop Rock 歌曲，反而有時提升唔到效果。電腦版同手機版差唔多，駁去 CXN 同一個 Wi-Fi 網絡之後，輸出果度就會多左 CXN 呢個選擇，相當方便。
Conclusion : “呢個價位冇乜投訴”
試玩左個幾鐘，雖然又駁機 Set 機，不過試聽嘅歌其實唔止上面咁少，只係揀部分比較突出、值得講嘅同大家 Share 返。CXN + CXA80 呢個配搭係幾好，接駁方便、串流播歌設定簡單、音質出色。不過都有啲缺點，例如無內置埋藍牙、音量控制唔清晰、選單入面的聲音設定項目冇乜。自己就貪心少少，如果支援埋 TIDAL 就更好，不過以呢個價位來講真係冇乜投訴。
