之前小瑟已經登記左Netflix, 希望可以第一時間收到消息究竟佢地幾時來香港, 昨日朝早一收MAIL, 就已經有個【Netflix 現已在香港推出！ 免費試用一個月】的電郵, 心諗正呀, 終於都來勒, 咁就二話不說, 狗衝去登記試玩啦, 反正唔洗錢. 而我地電玩版版主阿定亦都已經係水區出左申請教學, 如果大家都想好似小瑟咁即時登記呢, 可以去上面阿定個POST度睇返的.
4K Android TV 實試 Netflix 完美顯示
小瑟開得POST同大家分享, 當然唔會只係同大家分享點登記啦, 我咁心急要狗沖, 除左睇下有冇可能 Netflix 取代到家中的NOWTV之外, 當然就睇下畫質同音效又會係咩一回事啦, 因為小瑟家中4KTV早前就有更新專登加入Netflix APPS去支援, 究竟係龍定係鳳呢?? 小瑟即時同大家先以上年購入的 Sony 4K Android TV KD-49X8300C 分享一下聲畫效果先啦!!!!
∇ 小瑟登入 Netflix 之後, 進入主頁面, 好開心呀, 一黎已經見到 Netflix 原創電視劇熱門選擇中, 畫面解像度上,已經註明【ULTRA HD 4K】, 好緊張呀, 究竟係咪真係出到4K畫面呢?? 等小瑟即時進入 JESSICA JONES試下先.
∇ 進入影片中, 小瑟就按下 INFO 去睇睇究竟解像度如何呢??? 影片開始左5秒左右的載入影片時間, 一出來就已經係 1080 的畫面, 又話4K解像既???……… 好, 一陣再睇, 先要睇下有冇咩聲軌可以選擇, 同有冇字幕可選啦, 聲軌方面都幾齊架喎, 有英文, 德文, 同法文, 而英文同德文就仲有5.1, 呢個5.1當然係Dolby Digital 5.1啦, 而字幕方面可能 Sony 內的 Android 已經有地域設定, 所以字幕已經預設用 “繁體中文”, 非常體貼呢.
∇ 聲音方面, 小瑟就試左用電視中的 “ARC” 功能將電視的音訊回傳到 AV AMP內, 證實 Netflix 的 5.1 為 48kHz 的 Dolby Digital 5.1 聲軌.
說好的4K畫面呢???
大約過左15秒左右, 畫面突然清左一清, 而電視的左上角終於都顯示左 2160 的字樣, 正呀, 真正4K畫面出來勒, 明顯地, 畫面中的DETAIL位比之前 1080 時的仔細度好左好多, 成個畫面的立體感亦都深了一個碼, 非常唔錯, 不過雖然係話4K的畫質, 但如果同小瑟家中睇藍光碟時的畫質比較, 小瑟仲係覺得藍光碟靚D, 主要係畫面的扎實度唔夠藍光好. 但以一個串流的播放 apps 來講, Netflix 一定已經好過NOW TV好多了!!!!
Netflix兒童頻道只得480畫質
Netflix的另一主打, 小瑟覺得好似係兒童頻道, 因為係進入 Netflix 時, 系統會有個專門入口的 Kids icon, 咁小瑟又諗, 如果佢個兒童頻道掂既, 我個 NOW TV 又係可以收工喎, 因為依家小瑟既 NOW TV 其實有一半原因係因為個兒童組合頻道, 而當中最緊要既當然係 Disney Channel 啦, 不過小瑟其實都想投訴好耐, 唔知點解佢個 HI-5 節目, 做成年都係得果幾集, 係好難得先有一集新既加入去, 心諗洗唔洗咁慳呀???? Anyway, 我地都係睇返 Netflix 可以比到什麼樣的兒童頻道我先, 首先進入主頁, 其實都多野睇的, 卡通, 電影, 不過就係唔係好分到究竟係電影定係電視劇, 但好多兒童的節目都會有, 好似PEPPA PIG, 芭比等等, 另外最多的都要數 Dreamworks 系列了, 可以話係應有盡有, 總之頻道內除左 Disney 之外的卡通都可以係度搵到!!
∇ 小瑟先以功夫熊貓2來試試畫質如何先, 原來所有的兒童頻道中的影片, 都只會有480標清的畫質, 暫時都未見有任何方法可以轉行更高的解像度, 呢個真係有一點可惜呢.
當影片轉回正常頻道又可選HD了?? 而聲軌就只有國語!!
好奇怪, 當小瑟退出兒童頻道, 回到正常的頻道時, 同一套電影就可以有HD的選擇, 究竟點解要有呢個分別呢?? 小瑟就不得而知了!!! 而大家當見到片中有 “中文” 聲軌比大家去選擇時, 唔洗咁開心住, 因為當中的中文, 其實係指國語聲軌, 絕對唔係我地最親切的粵語……….真係OMG呢!!!!~_~
OPPO BDP-103播放 Netflix 又如何呢??
OPPO的藍光機, 由第一天開始已經有 Netflix 呢個功能, 不過一直都唔可以正常播放, 今日終於都可以一試佢既身手, 睇下究竟會唔會比小瑟的 Sony 電視接收好呢????
不支援4K解像度了…..
似乎一開始已經唔多順利勒, 在影片介紹頁中, 已經冇左【ULTRA HD 4K】字樣, 換來的只係【HD】即係最多只可以播放1080的畫面, 而小瑟亦都試過將OPPO內的解像度提升到 “4K x 2K” 的解像度, 睇下可唔可以迫佢轉回4K解像, 但最終都係不行的. 而系統介面就只可以有英文顯示, 冇中文的菜單, 而介紹頁中的文字就更加出現亂碼, 未能正常顯示呢.
大鑊..連中文字幕都冇埋….!
進入正片, 只見有英文字幕出現, 咁小瑟當然就拿拿林去換字幕先啦, 不過好可惜, OPPO 系統係唔支援中文字幕的, 好似小瑟呢D文盲, 冇中文字幕要聽佢對白真係有D吃力喎…!!
∇ 解像度方面, 一開始只有480的顯示, 要差唔多到30秒之後先開始有720的畫質顯示, 而大既要過到2分鐘之後先可以正式有1080的畫質顯示, 呢方面OPPO反應都比較慢, 呢個小瑟懷疑 OPPO 機內原生的 apps 可能都仲係舊版所致, 睇來 OPPO 方面需要在未來的 Firmware 中著手攪好呢個 Netflix 的支援了.
OPPO 支援 Dolby Digital Plus 5.1
不過 OPPO 在聲音播放方面, 聲效就支援 Dolby Digital Plus 5.1制式, 制式上 Dolby Digital Plus 理論上最高碼率可至 6 Mbps, 所以理論在音效上應該會比 Dolby Digital 更好的, 這方面有待下次小瑟搵到好片時再A/B測試再同大家分享呢.
Conclusion : 影音支援真係唔錯, 期望有更多平台支援
昨天相信好多影音發燒友都會將 Netflix 正式進入香港視為一大喜訊, 始終香港免費電視都仲係一台獨大, 想要有更多選擇往往都要每月大灑幾百元去享受更多的節目, 而Netflix這個強大的劇集及電影庫的來臨, 正好比大家以一個較平的月費, 去欣賞更多不同的劇目, 對用家來講絕對係一個好消息來, 而現在更加有一個月免費的優惠, 大家可以安心去試玩. 聲畫方面, 本來小瑟都諗住 OPPO 原生 APPS應該實食冇痴牙, 擔任 Netflix 的機頂盒既任務九成會落係佢身上, 點知冇中文字幕呢個問題, 真係變成有等於無, 好彩小瑟仲有部 4K Android TV係度, 估唔到以一條網線來播放原生4K 的內容都可以咁順暢, 小瑟家中都只係用 200MB 寬頻, 都可以完美地支援, 都算唔錯, 不過由電視 ARC 回來的音效就只得 Dolby Digital 5.1 就比 OPPO 差了, 不過老實講, 其實問我 DD5.1 同 DD Plus 5.1 的分別始終唔係好大, 除非 DD5.1 同 TureHD 的分別就大, 其他的都只係格式上的分別, 感受到既可能性不會太多呢. 另外大家可能會問, 小瑟會唔會一個月免費後依然會 JOIN Netflix 的服務呢??? 呢刻來講相信都未必會住, 因為一來小瑟仲有 NOWTV 合約在身, 要睇既電影同電視劇都夠用, 再加上以小朋友來計, 卡通片都仲係 Disney 的天下, Netflix 呢方面就唔洗多諗, 但佢美劇方面真係超強, 劇目又多, 種類又齊, 不過小瑟又有幾多時間可以煲劇呢?? 除非佢有 Silicon Valley 矽谷群英 啦, 咁小瑟就會即時乖乖比錢呢.
