近日身邊好多影音友都有出部 LG V10 來充當DAP因為佢都係用上 32bit ESS SABRE 9018 DAC 呢粒非常熱門又一致好評的DAC解碼, 所以音質上一定有保證的, 尤其係近日 V10 方面有個非官方的 “DAC Fix for LG V10” 可將手機中其他的音樂程式都可以受惠於DAC 的優化, 又點會唔勁呢??? 而事緣小瑟早排部 Sony z3 手機壞左, 係多番請教身邊友人新機買咩牌子時, 大家都異口同聲地推荐 LG, 但當時大家都唔係因為佢既 DAC 晶片, 而係 LG的系統比其他的 ANDROID 都好用, 影相又靚, 就係咁, 小瑟都入手左呢部 LG V10 手機了. 而另一方面, 小瑟手頭上都有一部 OPPO HA-2 手提DAC+耳擴的, HA-2同V10一樣, 大家都是使用 32bit ESS SABRE 9018 DAC 的, 不如今次就同大家分享一下究竟 V10 同 HA-2 音質上究竟有冇分別呢?? 係咪有左部 LG V10 之後就唔洗再諗耳擴呢????
LG-V10直推 Philips Fidelio X2 播 “Adele – Send My Love”
先用左性價比十分之高的 Philips Fidelio X2 來測試一下先, 平時係公司小瑟都會用佢來聽歌的, 貪佢二千多元但音質優雅, 空間感好, 效果遠超其身價. 講返正題先, 駁上 X2的 V10, 起初音壓用上 55 度, 但好難聽得清楚, 之後要上到 65 都仲未夠, 要去到最高75 才算比較聽得清楚, 但其實正式來講, 都係唔夠聲的, 不過升無可升就冇計啦. 講返音質先, Adele 把聲大家都知道係好獨特的磁性的, 係呢個直推的情況下, 佢把聲出黎十分嬌柔, 唱歌時的腔感及空間感未算好強, 感覺只是過得去, 而且低音亦較輕，似乎 V10要推 X2應該都係比較吃力一點點, 未能反映出 V10 應有之水準.
LG-V10直推 AKG K3003 播 “Adele – Send My Love”
有見V10對於直推 X2 有點力不從心的情況, 所以小瑟就找來出名易推又好聲的 AKG K3003入耳式耳機, 一插上後, 由K3003出來的聲音力水同之前 X2 差太多了, 一般來講音壓只需要 65 已經可以夠聲有餘了, 由 V10直出之下, Adele 的獨特唱腔在 K3003的輸出下, 倍添爵士中的騷靈味道, 而低音結他爽朗而快速, 人聲中的高音位置, 配合低音結他一高一低之下, 在 V10 這個只是一部手機為 DAP 下, 小瑟的確係有一刻再三回想自己究竟係用緊 DAP 定係手機呢??? 唯一可以話不足之處就係空間感較窄, 冇空間感自然臨場感會差一點點呢.
LG-V10 + OPPO HA-2(耳擴部份) 推 Philips Fidelio X2 播《Adele – Send My Love》
好, 之後我地就試下不如由 HA-2 幫助之下, V10做訊源可唔可以推得掂比較大食的 X2 有辦有眼呢. 先講音壓上, 已經完全冇哂唔夠聲的問題, 跟住整首歌的低音同音樂感都返返來, Adele把聲即時實淨左, 低音結他的效果都有返層次感, 但略微低頻效果比較多左小小, 有點肥仔感, 整體效果厚左一個碼. 但音樂感對辦, 而且傳真度都好高, 明顯地有 HA-2 的加持, 可以將 V10 的音質好好發揮出來呢.
LG-V10 + OPPO HA-2(解碼+耳擴部份) 推 Philips Fidelio X2 播《Adele – Send My Love & 蘇打綠 – 我們不懂》
都係聽同一首歌, 究竟由 HA-2 作解碼會同 V10 直出解碼會有什麼分別呢?? 因為小瑟手機上購買了 USB Audio Player PRO這個軟件, 而小瑟就對佢出來之聲底比較有好感, 所以今次試玩V10 USB出解碼都希望用返 USB Audio Player PRO來做播放器. 先講返聽感先, 比起 V10直出, 用 HA-2作解碼後的 Adele 在透氣聲浮哂上面, 而結他聲再企前一步, 結他聲明顯幼細左, 而鼓聲層次感輕左薄左, 冇咁肥胖，不過彈性就豐富左.
Conclusion : 耳擴為手機作補完的最住拍擋!!
的確, 以V10作為DAP在一般情況下真係絕對可行的, 尤其現在串流音樂大行其道之下, 用手機聽歌佔了市場7成人都係用串流APPS聽歌的, 而 V10 在自家音樂 APPS 或其他音樂 APPS 之下都可以以其靚靚DAC作解碼之用, 呢個絕對是喜愛聽高質音樂之玩家來講, 非常有用的一個”功能”, 而 V10 在直推 K3003之下, 其音質效果已經非常討好, 但 V10 雖然係 DAC上做足功夫, 但始終一部手提電話中內有太多不同的訊號在機內發生, 而手機中的高頻訊號對音質影響最大, 所以用手機聽歌無可口非一定會在音訊的潔淨度及數據的完整性有一定的影響, 而 HA-2 的角色對手機來說正好就有一個”補完”的作用, 一來手機的輸出一般音壓都唔會好大, 如果手上的耳機係大食一類, 就咁用手機聽歌有時真係唔係好夠聲, 二來如果想聽Hi-Res或比較靚的音質, 分家這個做法一定會係必然之選, 將手機當為”SOURCE”, 而解碼同放大交由下家(DAC+耳擴) 處理, 對音色一定有其好處, 尤其係空間感, 樂器的分離度更為明顯, 所以如果大家堅持一定要聽高質靚音樂的話, 一機一擴已經係最低消費呢. 不過以V10來講, 因為佢音壓制同開關制都在機背位置, 要加耳擴其實都幾唔方便, 小瑟到依家都仲諗到一個好方法將 V10同 HA-2 可以完美結合, 如果大家有咩好提議不妨指教小瑟一下呢.
