平時做野都戴開大headphone，並且我相信已經搵到最適合自己口味的設備。於是都冇再好似以前咁對耳機咁狂熱，其實真係收心養性左好耐冇買野喇。有D身痕，由於太耐冇買過耳機，加埋身邊朋友半推半就之下就導我買左呢對Aurisonics Harmony返去玩玩。
講下配戴舒適度先
當然上巴士第一時間拆禮物，一如以往咁搵對M碼耳塞用下，但居然隊唔入耳窿？！最後要用返細碼先FIT返晒。之但係我家膊內耳仔仲細過我，連S如果都用唔到，就真係唔知點算好喇。由於身痕買野事出突然，唯有求其拿拿臨搵部G4試聲下先。點知。。。好似我D初學結他學生掃和弦咁款，低音最大力，愈高音愈冇聲。。。剛好第一首係播王菲首《紅豆》，個前奏D高音上唔到去?實在心有不甘。。。於是返到屋企就即時搵部座檯AMP 聽左2轉碟試真佢。
佢BASS真係好有力，係一搥搥揼落黎，並非潛低D就散開消失果種，係好實淨同反應好快果隻！咁我馬上搵返D陳年X Japan同Rock/Metal野出黎試左幾隻，D Bass同鼓聲的定位同層次直頭係爽～（心諗，用黎睇戲實好正。）之後例牌再試返隻必聽許美靜同D Jazz。佢層次好清晰，原來音場都幾闊下，呢個真係有驚喜俾到我的!我有理由相信基於AMP夠力的關係，高音出返少少，但都只係勉強聽到。咁唔駛諗啦，掉佢入去閉關修練，反覆燜燉幾日先好再黎見我！
第一重修練成果
老老實實，由於對耳機只係貪得意買，加上工作勁忙，掉左去煲之後完全冇為意。再拎返佢出黎已經係五日之後。。。出西貢的長途巴士，我座下層，趕住出門，又係得部手機聽歌。呢對野長時間帶都好舒服好貼亦唔會聽到個人好攰。而且隔聲算係好唔錯，同custom產品都唔差得幾多，引擎聲唔會點騷擾到你聽歌，背景細節野都清晰表現到出黎。
聲音方面
佢中低音依然有力強勁，聽K-POP EDM等一流！但通常呢方面強，弱點就會係集中在大量中低頻且好大動態要求的音樂，例如幾把結他伴奏加把人聲，正路都會炒到應一應。不過，呢五日閉關修練係冇白廢的！同剛買返黎果陣比起上黎，幾把結他分得更清楚同有力，強弱同定位都更加有層次，只係去到一D位仲有少少悶悶朦朦的感覺。但已經好似脫胎換骨咁，相信再煲耐D可以更好！咁唔駛諗啦，要閉關重練！
第二重修練成果
諗住煲耐些少，就五日啦，點知話咁快過左七日。今次又用手機又用座檯AMP試左一個下午。又聽File又CD又黑膠咁。相信呢對Harmony終於表現出身價。用座檯AMP聽，的而且確定位都係偏向較強中低音，高音真係要煲左先出現，比起唔煲，閉完關高音真係多返好多！但當然，D高頻唔會係清脆到宛若銀鈴果隻，但係起碼中規中矩有所交代先！而用手機聽返，其實都真係非常之好推，但當然拎出街都係唔好懶，我建議用返抽手榴彈推啦！
黎個總結啦，若果唔係工作需要，學識(其實係被迫)左要習慣聽好平衡好準的音色的話，個人黎講我真係好鍾意呢對Harmony。以前覺得就算耳機再靚都唔會好過做野對Mon。但係，佢表現真係唔錯。好夠力水，帶得舒服，隔音方面令室外使用時背景清靜好多，真係出行街都嘆到下歌果隻。
呢對耳機幫我重拾返以前聽歌果種趣味～食左清湯咁耐，而家加左D味精，反而令我冇咁集中去留意首歌的編曲呀，Mix成點等等，真係令我可以純粹咁享受返隻歌。令我又開始返座車聽歌呢個好普遍，但我就甩左好耐的習慣。
