自 Pioneer 被 Onkyo 收歸於旗下之後，不少 Pioneer 的忠實FANS都十分期待其新機的推出，並對於二大品牌合併之後, 會否連性格都合二為一呢??? 現在新機 VX930 終於見街，雖然只係入門級數, 但亦都兼容杜比全景聲 (Dolby Atmos) 、Hi-Res Audio 等多種時下家庭影院、兩聲道熱門播放格式。以五千有找 (HK$4,980) 的定價來講絕對很有市場潛力，未知其聲低上是否仍帶著過往 Pioneer 的高清味道，還是集 Onkyo、Pionneer 兩家之大成呢 ? 今日小瑟就同大家一齊來開箱小試一下啦!!
∇ VSX-930K箱內的配件如下, 天線, 測音咪, REMOTE, 電源線都一一齊全!
∇ 美中不足之處, 就係REMOTE沒有夜光功能, 如果係熄哂燈睇戲既情況下, 就要靠記憶來使用勒.
VSX-930K重點功能
規格方面， VX-930L 約重 9.8公斤，是一部 7.2聲道的環繞聲擴音機。其每聲道最大輸出功率為 160W，額定輸出功率為 135 W，以價位及輸出能力來講是一部入門級的型號。本作的焦點所在是以五千有找的情況下，擁有一部能兼容新世代聲效杜比全景聲的擴音機，能以 7.2.2 的玩法播放 Dolby Atmos 的藍光碟影，一般的香港家居環境其實已經相當夠用。
∇ 可播放 Atmos 聲效的 VSX-930K 可自行推動 7 聲道喇叭，而超低音輸出則為 2 聲道, 即係在不加任何後級的情況下, VSX-930K係可以玩到 7.2聲道的喇叭配置, 而一眾新玩家一定最緊要就係如果玩 Atmos 的情況下又會係點呢??? 如果玩 Atmos 的情況下 5.2.2的喇叭配置用來對應最基本的 Dolby Atmos 音效就絕對不成問題。而 Pioneer 的AV AMP 都擁有「Dolby Surround」模式，能夠將所有 “非全景聲” 制式的聲效格式 (如: DTS-HDMA 7.1) Upmixing 至包括天花喇叭在內的聲道，想玩足哂家中全景聲配置呢個功能真係非常實用呢.
∇ 5入2出的HDMI端子, 而喇叭插位都十分清晰, 邊個位係插天花喇叭, 邊個位係插後置喇叭都一清二楚, 對新手玩家來講呢D指示絕對緊要呢.
∇ 雖然是入門機， 但 VSX-930K 在影像處理上都非常有誠意。其影像處理可將輸入的影像訊號增線至 4K 解像度，並會為視頻的亮度、色域、物像輪廓等做出優化。如過你已經有 4K 電視而服役中的藍光播放機未有增線功能，VSZ-930K的影像處理功能就非常實用啦。
完善的無線接駁方案
現在的AV AMP, 無線功能已經係必要課題, 尤其係入門級數, 因為的而且確, 家中影音系統如果冇無線播放功能都幾唔方便, 而 VSX-930K 的另一焦點就是內建了 Wi-Fi（含Wi-Fi Direct 功能）以及藍牙網絡卡。方便大家將擴音機與無線路由器或流動裝置進行連接和串流播放, 而 Pioneer 擴音機另一重要的功能就是其 iPad apps的控制對於用家來說非常緊要, 因為除了 P 記的聲底與別不同之外, 其 apps 的控制界面之好用亦係其皇牌之一 。而且懂得設置 DLNA 的玩家，更加可以連結同網絡的 PC 以及 NAS 等裝置內的所有音樂檔案。其相容的播放格式包括 WAV、FLAC、AIFF 以及 ALAC 格式，最高規格為 192Hz/24bit。而且它更支援DSD (5.6MHz and 2.8MHz)播放，在兩聲道播放上其實已經無咩可以再要求。
Pioneer 耍家自動音場修正 MCACC Pro 之下放
好勒, 都介紹左好多規格既野, 係時候開始駁線開聲勒, 而當然我地亦都係要開始左做一次初始化程序先啦, 而 Pioneer 的耍家技術 MCACC PRO 對環境中的聲學處理就大派用場呢, 以往這個 MCACC PRO只會在高階機先會有配置, 現在就連入門級的AV AMP都可有呢個享受, 入門玩家真的非常幸福呢。
∇ MCACC Pro多聲道自動音埸修正系統設定需時大既 10 多分鐘, 在眾多品牌中算係時間最長的一部了, 而攪掂之後終於見到了主控制頁面。對 Pioneer 了解的朋友都會知道舊版的介面可說係非常專業(難用XD), 但呢部 VSX-930K 終於可以見到有一點點改變了, 但操作介面依舊簡潔握要。除了網絡設定，主介面還有MCACC ((Multi-Channel ACoustic Calibration / 多聲道聲學教訂) 以及系統設定三個選項。如果玩家打算個人化喇叭設定，以配合自己的實際聆聽喜好，您就可以點擊入 MCACC PRO 內的選項。
∇ MCACC PRO 內的功能分為了 6 大範疇。而小瑟作測試時, 就用了常用的「全自動 MCACC」, 因為我喜歡逐一設定去慢慢選擇, 而EQ類型就同之前的一樣, 可選擇三類不同模式(見下表)。此部分玩家可以按實際情況或喜好為喇叭喇叭的擺放模式及格局作設置。如果你發現之前的初始化測試結果與您實際的喇叭格局有明顯出入，你就可以在此選項中，指示擴音機重新校訂所有喇叭的播放特性。
EQ類型的解釋如下:
SYMMETRY – 執行每對左,右喇叭的對稱修正,使頻率振幅特性平淡
ALL CH ADJ – 是所有喇叭都採個別設定,任何聲道亦不特別加重效果的”平化”設定值
FRONT ALIGN – 根據前置喇叭的設定,設定系統中的所有喇叭(一對前置喇叭不會採用等化處理)
∇ 如果你屬於有經驗的一族，或是老手一名。你就可以選擇手動 MCACC 一項作進階個人化。此部分的玩法相當多變，除了可以為聲道位作微調外，專業級玩家常會用到的駐波以及 EQ 調整等功能都能在此部 Dolby Atmos 入門內搵到，對小試牛刀的玩家來講其實頗有驚喜感, 不過小瑟就建議一般新手唔好攪呢D設定了, 因為一來都需要有專業儀器先可以作出準確的修正, 二來都需要對音訊有基礎的認識先可以因應自己的喜好作更改, 所以一般情況下, 信哂個MCACC PRO點都好過唔信的呢。
∇ 而 Pioneer 的擴音機亦有一個幾唔錯的功能, 就係佢擁有多過一組設定記憶比玩家作整個系統的設定記錄, 換句話講, 你可以設定多個不同的MCACC PRO的設定以方便你轉換作測試, 位置就係下圖的 M1.MEMORY 1
∇至於系統設定，其相關的功能主要是圍繞訊號輸入以及資訊性的顯示功能，一般玩家其實一睇就明。
實試老變四 – 控制力佳、瞬變效果不俗
來到大家最關心的測試部分, 小瑟選擇以兩齣必試大熱全景聲藍光碟 《變形金剛 4》以及《木昇戰紀》作試玩。小瑟先此聲明, 一直以來小瑟都係 P記音效的愛好者, 所以呢個分享難免會有小小偏心, 希望大家自行扣減一點勒. 小瑟發覺 VX930K雖然只係一部入門級AV擴音機, 但依照保持到Pioneer一貫快狠準聲底性格, 在《變形金剛 4》的中、高頻段部分的分析依然係P記招牌爽朗精準, 而細緻位亦清晰層次分明, 畫面內的物件的分佈、走位以至空間感也相當遼闊，另人睇戲時增加不少投入感不俗。場景如下圖爆炸一段就試出了爆炸由遠至近，空間距離有層層遞進的壓逼感，三頻控制力和分析力相當到位。另外，鋼索一段在也突出到高、中、低三個水平的定位效果，整體而言是細膩具爆發力。
分析力強、定位感明顯
至於近期經常用來的 《木昇戰紀》就試出了 Pioneer VX 930在分析力強的優點。片段中多部敵機對主角連環發出攻擊，敵機位置的迅速轉換以及在鏡頭前後飛來飛去的效果在 VX 930 的處理下都簡潔有條理。它唯一的不足可能是因為它的分析力太強，令所有聲音特效的混音變得有點過火，而高頻部分也略為有點尖, 相信如果時間許可的話, 要在設定中做小小調校或換一條銅成份高D的電源線都可以改善呢個問題呢.
結語
Pionner VX930 在價位上雖然是走入門級路線，但以價論貨佢兼容 Dolby Atmos(DTS:X未有資料), 其分析力, 定位走向, 空間感的確超其四千幾呢個價位的, 而最令入門玩家雀躍的必定要數 MCACC PRO之下放, 對沒有經驗的用家來講, 呢個MCACC PRO已經係MCACC中最高階的音場效正系統, 大家只需要放好收音咪之後跟畫面設定, 設定完之後基本都可以得到不俗的環繞效果, 如果玩到開始中中地毒的又可以深入去更多設定不同功能, 照顧周到. 而在76-FriendClub呢個過800多尺的直間下, 由 VSX-930直推5.1.2 之7隻喇叭來講, 其力水都算中規中矩, 當然如果話音質上的充實性一定比高階機為弱架勒, 但以930的身價大家又點可能要求佢可以應付咁大空間呢??? 而小瑟試完 VSX-930之後, 對之後擔心佢會變聲底呢個問題已經一掃而空, 930除左係一貫 P記聲之外, 佢個設定畫面之改進更加另小瑟期待就快到港的 SC-LX89 新機究竟係咩一回事呢?? 如果你都好似小瑟咁, 對 Pioneer 的獨到分析力有鐘愛的話, VSX-930 呢部入門中階機絕對值得一試呢.
