好耐都冇同大家分享過玩入門機既聽感, 早二日 Onkyo 就送來首部支援 Dobly Atmos 及 DTS:X 的 AV擴音機 TX-NR646, 呢部機官方定價只係 HKD$5,580, 老實講, 呢個價位其實真係好吸引又易入手, 而呢排部 TX-NR646 都會係我地 76-FriendClub 小聚數日, 小瑟駁左佢同做左 AUTO SETUP, 不如依家就同大家分享開箱同小小既試聽感覺先啦.
開箱
∇ 整個開箱比大家睇下先, 界刀已經準備好呢.
∇ 開箱後有說明書, 天線, 搖控器, 例牌配置.
∇ 呢個說明點都要睇小小, 因為小瑟一下子都唔知究竟 7 CH 會係點駁法呢.^^”
∇ Onkyo TX-NR646 真身來勒.
∇ 7入2出的HDMI端子, 點都應該夠用勒卦……^^”
∇ 網絡功能係依家 INTERNET必須的年代, 如果部機冇得上網, 真係唔知掉唔掉左佢好.XDDD
TX-NR646 的 5.1.2 Atmos設定
646支援自家最多7聲道喇叭輸出, 即係最多可以唔加後級情況下, 直接插入7隻喇叭玩, 係一個入門來家來講, 其實真係夠哂用啦, 玩埋 Atmos 都仲得, 5.1.2 即係5隻喇叭+一對天花喇叭(如圖), 而我地今次係76-FriendClub既設定都係以呢個為主, 用上前上置一對KEF蛋仔喇叭, 再配合JAMO 5.1 系統來做今次既測試.
∇ 一開始咩都唔好攪, 直接插跟機來支咪來做一個完整的自動音場校正先.
∇ 插好左之後, 畫面就會自動彈出呢個畫面, 大家只需要跟返自己既情況去一步步作設定就可以了.
∇ 以下畫面就係提示你SUB仔(超低音)係咪已經插好, 大家只要確定插好就可以架勒.
∇ 之後就再三提醒用家, 自動音場校正中, 所有的喇叭都會有高音亮的測試聲, 同埋校正過程中大家一定要整個環境都保持寧靜.
∇ 經過了5分鐘左右的測試之後, 就會跳出呢個畫面, 主要係問你想唔想開始埋EQ去所有喇叭作調音之用, 大家可以選擇”開”, “開/但除了一對前置喇叭”, “不開”三個選項呢. 最後當然就係拔返枝咪出來開始享受一下啦!!!^^”
∇ 準備就緒, 終於都到左真正開機測試既環節, 不如同大家介紹一下我地 76-FriendClub 的設備究竟有咩先啦!
76-FriendClub 影音器材列表
投影機 : Epson EH-TW7200
投影幕 : JK 120″ HD-3 MKⅢ ST 電動【高清】玻纖幕
前級擴音機 : Onkyo PR-SC5530
後級擴音機 : PA-MC55019聲道後級放大器
喇叭 : Jamo C10 CEN(中置) , Jamo C103(前置) , Jamo THX D 500 Home Cinema Systems(後、中後置) , KEF E301(全景聲天花喇叭) , Jamo THX D 600 SUB(Subwoofer)
Blu-ray Player : Pioneer BDP LX58 , Philips BDP9700
HDMI : Kordz Neo-S3 , Kordz Lux , Kordz Neo-Link
常試及新貴 【老變四】及【木昇戰紀】
最緊張既時刻到勒，終於都可以囉碟來試試開聲勒。今次我地就搵左二隻Atmos碟中都幾有代表性既二套藍光片，第一套係出名爛到爆既【變形金剛第四集】，而另一套就係近日小瑟誠意推介用來試Atmos真係頂瓜瓜的，但套戲劇情就…………@@, 影評既野見仁見智啦，呢度唔講勒^^”，呢套木昇戰紀片中一段追逐戰絕對係近期必試，我地就來睇下二套片係 NR646 下會有咩效果先。
包圍感不俗喎!
睇得老變四, 點都一定要係搵呢段來試試, 貪佢聽返開頭既戰機聲同之後追逐轟炸音效, 首先一開始環境包圍感真係比到小瑟一個小小既驚喜, 雖然小瑟只係用 5.1.2呢個配搭, 而另外會址喇叭所限, 後置一對喇叭都要以掛牆方式擺放, 但亦可能因為咁, 所以天花喇叭同後置喇叭就岩岩形成左前置同後置中間的一個”音場補助”, 竟然比到一個幾唔錯既包圍感, 呢個雖然真係有一點”符碌”, 但香港地既家居環境其實十居其九玩開都係後置掛上天花位置, 如果大家有意升級 646 的話, 加多一對天花喇叭係上前方的話, 其實都可以營造出一個唔錯既全景聲音效喎.
而去到戰機一段, 以 NR646 推動會址內的7隻喇叭, 戰機上頸頂時係幾到位既, 不過過頭時就比較短了, 而音壓一下子沖上去時都有一點點亂, 不過當日小瑟都開到差唔多 +60 咁大聲, 其實都有一點OVER LOAD, 不過小瑟試機係咁, 總希望可以谷一谷佢, 睇睇去到幾多會到頂, 而NR646係整個戰鬥中連貫感真係唔錯, 而只係音壓谷盡時會有一點點感覺”辛苦”小小, 但以入門機來講, 好多細緻位都仲照顧到算係咁啦, 而同小瑟一齊試聽的 Hugo 仔睇完就即時叫小瑟試埋木昇戰紀呢.(係超憎老變的XDDD)
木昇戰紀
如果大家未睇過呢套木昇戰紀的話, 小瑟呢套真係近排的誠意推介, 當然劇情就唔係好另到人興奮既, 不過呢段太空戰機追逐戰就真係不得不睇, 尤其係當中勁多戰機在所有喇叭中左穿右插之定位會另大家睇得非常過引, 而佢地D發炮位仲會有好多係圍住你成屋喇叭來射呢下先正麻, 咁你NR646身上又會點呢? 今次小瑟將音壓調校返去正常位置, 唔再刻意谷大音壓, 大既係 +55 左右啦, 今次小瑟仲專登坐前小小睇, 坐到岩岩前上方就係天花喇叭既位置, 今次感覺震撼多好多了, 包圍感, 動態分離度, 低頻力水都係比小瑟想像的入門機好, 雖然話同中階或高階機係力水, 分析力上仲係有一段距離, 出大棚野時都仲係有小小亂既感覺, 不過其定位同埋身感都真係比想像中好了, 以價而論來講, 真係仲想點丫, 而畫汁上經 NR646 視像晶片幫助之下, 輸出到 120″咁大既畫面都清楚分明, 顏色討好, 真心咁講, 一部5千幾蚊既AV AMP已經有幾唔錯既水準, 依家玩AV既入門玩家其實都幾幸福, 換個角度睇上中下三路中, 其實最底玩 C/P 值真係最高最高呢.
後話
小瑟到手時, TX-NR646 雖然文件上都話係支援 DTS:X 呢個音效格式既, 不過其實依家大家買到既 NR646 係未可以即時使用到既, 原因唔係冇軟件支援, 而係機內 Firmware 需要等日本方面有更新先可以正式支援, 廠方話預計今年內應該能透過軟件升級對應返, 但呢個反而小瑟覺得唔算係大問題, 最緊要最終支援到就可以勒, 而NR646其實主攻都係入門級的玩家, 佢仲有好多網絡上既功能都會幾岩新手門玩機之用, 好似以 Wi-Fi 無線連接自己的手機來播手機內既歌, 仲有依家係香港都開始多人用既 Spotify 音樂串流服務, 4K及 HDCP 2.2對應, 都係呢幾年必要既規格, 呢部NR646應該都可以對應到未來幾年既影音要求卦!!!! XD
溫馨提示: 我地下星期二會有一場 【ONKYO 潮玩影音教室】TX-NR646 首輪搶先試 活動, 如果你都想親身聽下究竟 NR646 仲有咩能耐既話, 快D來報名體驗一下勒. 如果活動當晚唔得嫻既話都唔緊要, 我地 76-FriendClub 現在依然接駁住部NR646既, 如果你都想聽下小瑟所講既效果, 今個星期六, 日就落去玩下啦!!!!^^”
