去得長洲，吃、喝、玩、樂就當然小不免，但咁多野食，大家又會點選擇？壽司？海鮮？巨薯捧？糯米糍？大魚蛋？今次，我有多一個選擇推介比大家，就係水牛城雞翼 （Buffalo Wings）。
Anchor Bar既水牛城雞翼
水牛城雞翼係咩？ 早於1964年10月3日，位於紐約水牛城既Anchor Bar，裡面有一位合伙人叫 Teressa Bellissimo，為左招呼佢個仔Dominic同佢個仔既朋友，將雞翅攞去炸，配上醬汁，水牛城雞翼就係咁誕生。我第一次食水牛城雞翼係上次去澳洲，去左一間墨西哥外賣形式既食店，見到Buffalo Wings，個名幾得意，所以就叫左一客黎試。香港搵水牛城雞翼，其實係有難道，因為唔普遍。但今日去到長洲，竟然比我搵到佢，超級驚喜。食水牛城雞翼，個汁係好重要。汁既味道近似泰式辣醬，比泰式辣醬辣，但冇咁酸。如果喜歡食辣既朋友，可以加辣粉。見到隻雞翼被醬包圍，當然就唔會期望雞翼仲會好脆。但，圖中所見既水牛城雞翼，係仲脆，而且雞肉仲嫩，不得不讚一句：有水準！
價錢：＄28 一客（4隻）
講完雞翼，講下間餐廳先： The Pink Pig Music & Bar Restaurant 係由一對厭倦城市生活、工作，又熱愛烹調既夫妻創辦。餐廳開業剛好有一年，菜式以意大利，美國為主。Pink Pig 其實都好受原居民歡迎，因為島上中菜館較多，所以Pink Pig既出現，為居民帶多了一個選擇。
The Pink Pig Music & Bar Restaurant 其實係拆開三節解讀:
The：英文文法既關係
Pink Pig：因為Pink Pig 呢個字簡單，易記。
Music ＆ Bar Restaurant ：老闆十分喜歡音樂，藉此加入音樂呢個元素入餐廳。
所以，因為宗教或飲食習慣問題，而唔食豬既朋友，大可放心，Pink Pig 只不過係掛豬，但唔係賣豬。
炸 Mozzarella芝士球
Pink Pig主打菜，其實唔止水牛城雞翼，仲有炸Mozzarella芝士球 （Deep Fried Mozzarella Cheese Balls）。我明白，唔應該攞食物去玩。為左睇下Mozzarella Cheese Balls 有幾足料，在鏡頭前，輕輕咁，拉左一下。話明炸，咁一定要脆，個漿適中，唔會太厚。配上茄汁，係一個好好既配搭。
價錢：＄26 一客
炸魷魚伴墨汁Aioli （Fried Squid Tentacle with Squid Ink Aioli）
呢道小食，有兩個特別之處。
一・圖中，見到佢係用青檸，而唔係檸檬。
二・配汁係墨汁，而唔係茄汁、醋或泰式辣醬。
其實用青檸係會更加香口，配上墨汁，食落去，冇咁油膩。Pink Pig採用日本魷魚，Size 亦偏細，有肉感之餘，唔洗食到攰。
價錢：＄30 一客
Salad 配意式油醋汁（Olive Oil ＆ Vinegar）
Pink Pig餐牌裡面，都有好多主打既食物。雖然，我都可稱上大食，但都會有到項既時候。所以，只可以試到三個小食。咁接住落去，講咩？講下Salad 同甜品。Salad 一供有三款，我試左配意式油醋汁（Olive Oil ＆ Vinegar）。我相信，女士們會好喜歡呢個Salad。原因好簡單，正常一碟沙律菜裡面，總會有一、兩個菜，係唔鐘意食，因為苦。相信，我講個苦字， 應該都有人有共鳴。呢個沙律，全部都係一大塊既菜葉，冇一塊係苦。加上，菜葉十分爽口，好新鮮。配上醋汁，十分開胃。
價錢：＄25 一客
如果大家之前有睇到Hot Chick By Paul’s Kitchen篇介紹，應該都會知道，我唔鍾意食太甜。呢個Menu，一睇就知，最唔甜應該就係Muffin。不過，當我學到”中和”兩個字之後，我點左布朗尼朱古力蛋糕＋雲尼拿雪糕。
布朗尼朱古力蛋糕＋雲尼拿雪糕（Brownie＋Vanilla ice-cream）
布朗尼朱古力蛋糕採用法國75%朱古力調製，糖既份量比食譜減半，配上低糖朱古力糖漿，甜度，僅次圖中既雲尼拿雪糕。Brownie焗得剛剛好，冇燶，亦唔太濕。
價錢：Brownie＄23 一客
Vanilla ice-cream 加＄3
其實，Menu所有甜品，糖既份量都係比食譜減半，所以各位，可以盡情咁食，唔怕要灌水啦。
食就講左咁多，一間餐廳，唔會冇野飲既。The Pink Pig Mocktails 據老闆娘所講，只有夏天先會有，而且亦非常之受歡迎。The Pink Pig Mocktails 冇酒精成份，其實就等於冇酒精成份既Cocktails。夏天飲，的確透心涼。又或者大家可以考慮下，黃昏既時候，去Pink Pig坐低，叫杯Mocktails歎下景。
青檸薄荷（Mojito）
價錢：＄23 一杯
Pink Pig真係有好多野。門口有爆谷機，Counter 底有一個鼓、一籃Vinyl、Counter上面有部冰滴咖啡機、牆上掛左一支Ukulele同一支結他，廚房櫃頂有部Record Players。
鋪仔細細，有咁多野玩，值得一去。加上，試完Pink Pig既食物，水準係有，但唔知點解，當我問老闆娘，認為Pink Pig有咩競爭條件同吸引之處，佢既答案係價錢同食物款式。從試食，到傾計，都可以感受到佢地對食物質素，係好有要求，如果唔係，佢地唔會為佢地既食物，做Mix ＆Match，將食物既味道推到最好。以後，大家入長洲，又多左個選擇。
The Pink Pig Music Bar and Restaurant
地址：長洲建新里11號地下 （出碼頭後，轉右，直行）
電話：6444 8297
營業時間： 星期一休息
星期二至日 12:30pm-9:00pm
Facebook: The Pink Pig Music Bar and Restaurant
