灣仔餐廳淋立就係人都知，點先可以站穩陣腳？ 離不開都係錢同實力啦。要有錢去經營（交租，交雜費，買食材同出糧比員工）要有實力去煮有水準、有質素既食物。 如果有隻識生金蛋既雞，就另計啦。今次我介紹既餐廳，不得了。佢就係位於灣仔汕頭街，單憑兩個主打菜－春雞與炸魚，上過不少報章及雜誌，獲得一致讚既評語之餘，炸魚薯條亦攞過獎既Hot Chick By Paul’s Kitchen。（店入面，貼左由新假期雜誌被評為「本地最佳炸魚薯條」既刊物。）
Hot Chick By Paul’s Kitchen開業半年，主要做外賣生意，食物種類真係唔係好多，但勝在食物質素高、有水準及合理既價錢搭夠。不過，仔細咁留意個餐牌，搵到個有趣既地方。12pm-3pm，同樣既菜式，轉做set之後，價錢係更便宜。如果唔想付出太多，但又想試，可以考慮12pm-3pm幫襯。過左3pm，所有野都係正價。
俗語「男人成功既背後，都有個女人」，Hot Chick By Paul’s Kitchen成功既背後，就有兩個男人。Hot Chick By Paul’s Kitchen既由來，係一位好欣賞Paul整既燒春雞既朋友，邀請Paul合作而開業。主打，就係Paul既招牌燒春雞。一間外賣店，得一個主打，有點兒單調，所以就加埋炸魚薯條。招牌燒春雞，早已被食到街知巷聞。現在，炸魚薯條都被評為「本地最佳炸魚薯條」，足以肯定Hot Chick By Paul’s Kitchen既實力。（店內，貼左Hot Chick By Paul’s Kitchen背後其中一個男人－Paul，為餐廳出鏡，做宣傳既刊物）
招牌烤焗春雞 Signature Roasted French Baby Chicken
好啦，講下食物先。由於一個人，食既野真係好有限，所以就主動要求，將燒春雞同炸魚薯條既分量減小，等我可以一次過試晒之餘，又唔怕浪費。招牌烤焗春雞 Signature Roasted French Baby Chicken 選用來自法國既春雞，重量大約400-500g。焗春雞之前，會先放牛油、香草等調味料入雞肉同雞皮之間，仲有雞胸入面。焗完之後，牛油溶左入雞肉，雞肉就唔會乾身。（醃醬，每兩星期轉一次）焗完之後，淋上烹調過既雞精華汁。
我試既燒春雞係蒜蓉迷迭香牛油。一見到碟雞，咁大塊雞胸肉，其實有點兒擔心。雖然，去食之前，都有睇過食評，但畢竟要做介紹，如果最後，只食兩啖，真係會失禮死人。不過，食左一啖之後，成件事唔同晒，雞肉好嫩，我冇心講廢話，但蒜蓉味好出，我個人都喜歡蒜蓉味，所以，我好放心咁食落去，食晒去。半隻雞春既份量，食量正常既女仔絕對可以應付到。烹調時間大約二十分鐘。
傳統英式炸魚薯條 Traditional British Fish & Chips
傳統英式炸魚薯條 Traditional British Fish & Chips 選用較厚身同肉質好既北美深水鱈魚，配上英國啤酒整既炸漿，加埋美國粗薯條，就成為攞獎既炸魚薯條。香港食炸魚薯條，即使去西式餐廳，都未必整得好食。試過食過勁多油，炸漿好粉都有。當我見到呢個炸魚薯條，第一件想做既事，係將個炸魚一分為二，睇下有冇中伏。
忌廉焗薯塊 Potato Gratin
結果係，我愛上了。外層，唔太乾，入面，有肉感。除此之外，我仲愛上了，Paul自己研製既Tar Tar 醬。成碟炸魚薯條，我冇落過一滴茄汁同醋，只有Tar Tar醬。烹調時間大約五至六分鐘。忌廉焗薯塊 Potato Gratin 選用本地薯仔去焗。焗薯仔，時間同焗既溫度好重要。控制得唔好，個薯仔可能會硬，未熟或者燶。呢個薯仔，我會用十個字形容個口感：「實但不是硬，淋但不是散」 值得一試。
蘋果金寶 Apple Crumble
蘋果金寶 Apple Crumble 有三層：
最低：由雲尼拿加糖煮既蘋果
中間：牛油加麵粉整既Crumble
最頂：Custard
蘋果金寶係熱食，適合喜歡食甜既朋友。我個人唔喜歡太咸或太甜既食物，所以，對我黎講，甜左小小。不過，口感係正面，個Crumble係脆，搞混食，係會有一種食甜品應有既感覺－開心。
拖肥布甸 Sticky Toffee Pudding ＆Ice-cream
拖肥布甸 Sticky Toffee Pudding ＆Ice-cream 聽說拖肥布甸做法十分複雜，整好個布甸，之後攞去焗。焗完，配上自製既拖肥漿，之後又攞去焗，最後上碟加雪糕。所以，我第一眼見到既拖肥布甸，係出煙。加上有雪糕既原因，中和拖肥布甸既甜，我接受到呢個甜度。同埋，一冷，一熱，食落去，好爽。
結語:
總結，Hot Chick By Paul’s Kitchen畢竟係外賣店，店鋪裝修簡單、面積細間係正常，食係味覺行先，唔好因為門面而止步。開放廚房有個好處，就係間食店一定要保持潔淨環境。價錢貴？唔值？以一間講求食物質素同水準既食店黎講，佢地set既價錢，係合理。同樣既價錢，其他地方，未必會做到咁既質素。不過，呢個問題都好個人既，只可以講：「要有收穫，先要付出」。臨走，比我見到……有興趣，不防撥個輪去查詢下 🙂
地址 ：灣仔汕頭街27號地下A鋪
電話 ：6878 6482
營業時間 ：12pm-9pm (星期一至日）
網址 ：http://pauls-kitchen.com/
Facebook : HOT CHICK by Paul’s Kitchen
