KEF第二代耳機岩岩就係下午 5:30 於銅鑼灣希慎廣場舉行了 M100 傳媒招待會, 而小瑟有幸可以先入為快, 早幾日就已經到開始煲煲佢, 今次 M100 外型絕對靚仔, 仲有四種顏色任君選擇, 顏色名都型過人, 包括”賽車藍”, “日落橙”, “鈦金灰”, “香檳金”, 四種顏色, 一眼睇落就知同 iPhone 岩哂 Key啦. 而除左外型型格之外, 今次就岩哂亞洲人小耳孔朋友使用勒, 小瑟個人非常喜歡橙色, 所以”日落橙”就岩哂我勒.
基本規格
M100 用上人體工學角度外殼, 高密度泡沫聲學阻尼器, 再加上一隻 10mm 釹磁鐵全頻單元, 以人體工學設計的傾斜式耳殼，長帶係耳都十分舒適. 響應頻率為 20Hz~20kHz, 靈敏度 97 dB±4dB.
開箱勒!!!!
好勒, 講左咁耐, 不過睇睇小瑟既開箱先啦!!!
登登登登…..等我慢慢”拉”低佢條………..繩先!!!!^^”
O~~~~~包裝全相呀!!!!!^.^
M100 隨機附送耳機盒一個及三對不同大小的耳塞及飛航轉插, 而耳機線內置有三鍵式免提線控, 盒面說明 Made for iPod, iPhone, iPad, 小瑟雖然唔係 iPhone 用家, 不過用係小瑟部 Sony Z3上, 呢個三鍵式免提線控都可以做到『通話』,『開始/暫停(聽歌時)』, 就算係用 Whatapps 時的『錄音』都係可以做到的, 效果仲非常清晰呢.
耳機盒可以放哂所有配件入去仲有位放埋耳機, 都非常實用架.
鋁質耳機機身, 配以精密金剛石切割邊緣外型, 高貴得來對音色亦有一定的照顧呢.
左圖就是耳機線內置三鍵式免提線控, 如果對應 iOS 系統的話, 就可以開關及大細聲之功能, 而 Android 就對應不到大細聲之外, 其他功能都可用. 右圖就是鍍金插頭.
Sony Xperia™ Z3 Hi-Res手機試聽
小瑟手機上有幾首由 Sony提供的 24/96 Hi-Res檔, 小瑟早二日收機之後就插住係電腦前, 快慢火煲足30小時有多, 應該都可發揮到耳機3成實力吧. 好……..首先就試下用【彭家麗 it’s All About – 不如不見】, 音壓不需要太大, 只需要8成位置就已經夠聲, 經過 Z3 解碼後提供的高清版【不如不見】, 人聲屬厚身型, 而背景結他聲清脆尚可, 不過以高清檔來說未算突出, 而彭小姐人聲係比較埋身一類, 就好似係小瑟耳邊唱歌咁, 而後面的小提琴伴奏之音樂感就唔錯, 可以做到引人入勝既效果.
之後就試一下聽POP野先, 近日女神 Tayor Swift 推出新大碟, 第二首 Blank Space 絕對係近期至愛, 小瑟有入手呢隻新大碟, 再RIP左做 WAV檔, 一聽之下, 就知道 M100絕對係為 POP 而生, 低頻實淨爽快, Taylor 把聲好立體, 連綿不絕之低音及把子感一下一下咁由 M100打出, 小瑟又一次不期然地腳下一同打打拍子, 如果聽開POP既朋友應該冇咩投訴啦!
越級挑戰 AK120II
小瑟當然唔會咁衰只比手機喂 M100 啦, 再黎同大家玩個越級挑戰先, 試下用 AK120II 來推推 M100又會係咩效果呢? 小瑟搵來 CD RIP出來的 WAV 檔, B餐KAY新碟中【獨家村】, 經 AK120II 輸出之下, 一開頭結他聲同之前 Z3手機出來的結他聲完全係二回事來, 結他回弦聲, 雖未至於有餘韻, 但起碼點滴可見, 尤其係Kay開頭一段的表現, 唔太多樂器干擾情況下, 可以感受到佢把靚聲及感染力, 以千多元的入耳式耳機來講, 算是交到功課呢.
結語
小瑟成日都有朋友問, 一千數以下有什麼耳機好介紹, 最緊要又有 MIC線可以講埋電話, 老實說, 好多時我都真係唔識推介, 因為數百元呢個價位其實真係好有多選擇, 而且聲音方面一般都唔會太過份, 點都見得下人的, 但要講到有返咁上下型仔又高貴大方的耳機, 市面上又真係唔係好多選擇, M100 以 $1230定價推出市面其實以KEF呢個品牌來說, 絕對係入門級別, 但交出來的功課亦都係見得下人, 交足功課啦, 如果要佢改進的話, 相信絕對係希望可以換線啦, 始終有MIC既設計都係多隻香爐多隻鬼, 如果可以換上無MIC線又或者可以玩埋線的話, 呢隻 M100的可玩性以及可塑性, 應該可以更高.
(順帶一提, 因為 M100 係一隻 10mm 釹磁鐵全頻單元, 所以大家如果入手的話, 最好多D聽佢, 聽得20-30個鐘左右, 佢就會開始入狀態架勒~~^^”)
