小瑟其實一路都對亞KAY既歌都有興趣, 之前都有聽下, 而今次係冇咩宣傳既情況下, 出左呢隻《KONTINUE》, 事緣係小瑟有時想聽流行曲, 都會開KKBOX聽的, $49蚊一個月可以任聽, 的確係完全改變了音樂及唱片業市場, 有日就見到KKBOX個首頁竟然話KAY大碟《KONTINUE》大唱推出左, 就係咁, 小瑟就由頭聽到尾勒!!!!!
先此聲明, 小瑟絕對唔係什麼碟評人, 而小瑟對本地樂壇亦只係停留係”用家”級數, 所以好多樂壇歷史, 恩怨一一唔知, 今次真係以歌論碟. 先講講KAY, 老實講, 小瑟有時都幾服佢, 覺得佢整TEAM人都好夠姜, 好敢言, 好敢試新野, 睇得出佢做呢行唔係純為搵錢, 佢地全隊人完全係藝術家性格, 好似《KONTINUE》呢隻碟中第八首《我可以被這個世界淘汰，但不可以被世界擊敗》, 小瑟到依家呢刻都冇睇究竟係邊個作曲填詞, 不過一聽就感覺到成陣”My Little Airport”味走哂出黎, 雖然小瑟唔知My Little Airport依家係樂壇究竟係紅定唔紅, 不過一定唔會係入哂屋連師奶都知既組合(小瑟個人好LIKE佢地的, 同埋我地行動組亞祺哥都係BIG FANS之一架XD), 但以KAY依家呢個級數都會唱呢類玩野既歌, 真係好開心, 另到聽亞KAY既碟好有驚喜, 係咩都唔知既情況下, 聽一隻碟, 睇一套戲係最好不過既事, 因為難忘同驚喜必定就會係咁既情況下先發生的.
講開唱玩野既歌, 一定一定唔可以唔提既一定係第五首《篋神》呢首歌係香港人一定明佢講咩? 尤其係一直都比各區篋神們車過腳呀, 去DISNEY排隊玩遊戲時, 唔知點解係都要企到貼哂埋身先開心既自由人, 係咁迫迫迫先似去樂園既朋友們, 聽呢首歌一定會覺得好好笑, 好過引, 仲要係會心微笑果隻, 而最正最正既就係最尾玩EFFECT果幾句【篋神 將黃金恭送 請你跪拜 篋神 求神賜我法寶轉運 品神 香油解厄困 只需一片誠心 自然會有運】小瑟第一次聽, 真係要望望部手機睇睇自己係咪聽緊亞KAY, 好野, 真係估佢都會玩呢隻, 過引抵死, 夠POP!!!
《最好的時刻》呢首歌好似聽左好多年咁, 唔知仲以為係舊歌, 因為上網睇返, 原來第一次PLUG已經係2013年4月11日派台, 所以一聽就好似熟口熟面似的, 而呢首歌小瑟就覺得好沉重既感覺, 尤其係依家香港呢個環境下聽, 反而覺得好似冇咩前途咁, 有D灰灰地!!!
話題作一定係《雞蛋與羔羊》, 有留意呢首歌既朋友都知呢首歌早排係網上PLUG出來時攪左不小風雨, 呢度又唔播得, 果度又敢播, 其實睇到呢D情況, 都幾悲, 悲既唔止係香港行返轉頭, 而係大家為左生存, 只可以做一D同良心過唔去既事, 好地地一首歌, 講下現在屋企既情況, 大家擔心個家再係咁下去, 真係唔得喎, 但又可以點呢?? SORRY, 唔得就係唔得, 各個媒體都紛紛摺埋唔播得, 不過, 好彩呢個世界發明左樣野叫INTERNET, 而INTERNET更好彩係早在20幾30年前已經出現, 如果依家先開始有INTERNET的話, 我諗大家都睇小同聽小好多野呢!!!XDDDDDD
其他歌小瑟就唔多詳講勒, 小瑟就係聽左呢隻碟幾首歌覺得好想同大家分享一下, 小瑟未能參透整隻碟想表達既所有玄機, 又或是想表達比特定既人或事, 不過呢隻《KONTINUE》絕對係做比現在我地土生土長香港人聽的廣東碟, 如果你都係同小瑟一樣, 仲希望有廣東歌聽, 有香港歌手可以出到廣果歌, 來來來, 買隻返屋企擺下先啦!!!!!
《Kontinue》
1.C餐
2.雞蛋與羔羊
3.家明
4.勢不兩立
5.篋神
6.頭盔7.獨家村
8.我可以被這個世界淘汰，但不可以被世界擊敗
9.十倍奉還
10.最好的時刻
11.正視.愛
https://youtu.be/fvkANsuknus
https://youtu.be/t_EpAsMox4o
https://youtu.be/gUphj5YeW2Q
https://youtu.be/Lj4Ne3xwRns
>
有你既支持，就係我地最好既推動力，齊齊參與
「有玩、有FUN … Post76.com」
<
歡迎進入我地論壇對>>本文章<<發表您的回覆啦^^”
>
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***＞
