係76玩紅腸既朋友, 相信冇一千都有幾百, 但唔講唔知, 其實小瑟到近來, 先真真正正有機會玩玩呢條腸, 原因係小瑟份人真係好懶, 換電源線真係要好大勇氣同埋需要好大力氣先可以完成到, 事關小瑟屋企地方細, 機櫃又窄, 係咁窄既環境下想插野, 真係小D心力都唔得, 不過呢次真係一定要問Peter哥整條來玩下, 事關有次出席活動, 有版友問小瑟條紅腸究竟咩料子, 版友知道小瑟竟然未玩過, 就話: [下………….條紅腸係76講得最勁, 你反而一次都未插過…..條腸大大話話係76講左幾年架勒喎, 你點都應該要試下, 等我地呢D身痕想跳海既朋友都有個參考丫……]
就係咁………..所以……………搵左LAB記 Peter哥(貪佢會同我整埋深層量子煲線麻XD) 整左條美仔……
紅腸人地話好氣好力, 但又有機會會粗聲左, 就係因為咁, 所以頭尾一定唔可以是旦求其, 小瑟呢條就用上左 Neotech NC-P313美頭 + NC-P303 IEC尾, 呢對野係 UPOCC單晶銅 24K 鍍金頭及經過CRYO泠涷處理, 希望可以係出入二個重要既關口上都可以有優化, 咁就可以真真正正發揮到紅腸既效果呢!!!!
講返呢條JPS In Wall先, 其實JPS In Wall本身係用於發燒友由電箱到牆身既Hi-Fi級入牆線, 但因為好多香港地既朋友係最初建構自己既小天地時, 都好難向”中央”申請到Budget用錢於基建電網上, 所以最後可以由電箱去牆身呢一Part就只係用左著通雞線, 但一眾想玩得好, 但又比”亞爺”多番阻撓既76友們, 又點會甘心就咁死係呢個位上呢?? 係計來計去都攪唔掂係電箱做多條線比AV系統既情況下, 最簡單又見效既方法就係換牆蘇插及換電線啦, 而JPS In Wall之所以好多朋友都用來做電源線既原因, 就係因為貪佢冇添加, 音色自然平均, 背景靜.
用枝唇膏比大家了解一下究竟條紅腸線身大既的粗度。
好勒, 下刪二萬字點樣辛苦換左條線勒, 換完真係太辛苦, 冇咩心機影相勒(………..第日真係睇下會唔會搵個地方專玩機呢!!~_~), 不如就同大家分享一下究竟換左線之後既感覺先.
先試2CH聽歌
今次小瑟先試既係亞銀的青愛SACD版本, 冇得講, 因為呢隻SACD亞銀把聲出得堅正, 樂器感分離度絕對係示範級, 而人聲之表達亦都係近年小見的令人感動, 所以一定囉佢來試. 講返條JPS先, 因為條線係鋪頭Peter哥已經量子煲好左, 所以小瑟只係開機 Play左一個鐘左右, 暖返所有器材, 就已經可以埋位聽聽勒, 首先一定係聽第一首的【傾城】啦, 一開聲, 成個感覺都唔同左, 亞銀人聲焦點好集中, 成個人好似比之前企前左成二步位, 感覺就好似面對面咁係小瑟面前唱歌, 呢點係紅腸比到小瑟最大既感覺, 而音場係比之前廣闊左, 不過音場效果的明顯性就比人聲的分野咁大勒, 另外值得一提既係, 低頻力水扎實左, 一下一下既重低音打出黎既效果快左同短左, 尾韻小左, 呢點未必人人岩聽, 又係果句, 好睇口味!!!
測試戰狼300: 帝國崛起
小瑟始終都係AV迷, 又點可以小得睇戲炸機呢個環節呀, 換左線又點可以唔炸佢一炸呢?? 近呢個月唔多大片出, 呢套【戰狼300: 帝國崛起】竟然成為左近排可試的藍光之一, 咁唯有試下佢啦, 電影開場, 個壞蛋波斯佬一刀劈落上集男主角果幕, 一陣陣只有皮膚先感受到既低頻, 一浸, 一浸咁殺埋小瑟腳邊, 呢陣低頻快速來回營造左電影中緊湊既張力, 相信電影院都未必有咁埋身既感受呀, 而另一個令小瑟感受最大既, 就係中置對白人聲, 食左紅腸之後既 5509+XQ50C, 係發揮對白人聲既時候, 成個中置就好似打比人打通左任督二脈咁, 人聲厚實得來有肉地, 唔知係咪因為咁, 所以整個環繞效果就更加集中, 同埋身好多, 小瑟不嬲都係埋身痴, 好鐘意比音效緊緊咁包團既感覺, 而就係呢段”對白”位上, 因為二個主角企定定咁吹……左一陣水, 就係呢個位上, 小瑟仲發現畫面既銳利度原來都提升都幾明顯, 不過就換來多左小小Nosic, 不過應該係套戲平身既效果來掛!!!!!!XDDDD
原來要影Plasma的確係麻煩小小的………今次只係用DC仔影, 因為太夜了, 各位多多包涵啦~XDDDDD
再試THE KINGDOM
呢套戲相信好多版友應該都一定會KEEP一套, 本片係講中東方面的恐怖主義問題的, 劇情異常緊湊又人性化, 更加唔會係只SELL大美國主義(當然點都一定有小小架勒XD), 要試呢套戲, 一定要睇埋尾的劫人斬頭一段, 因為係開始時佢地係搭緊車回國的, 係一輪傾計對白之中, 突然就黎料玩搶戰, WOW呢段戲緊張到呢, 路面上子彈橫飛, 四方八面既子彈都射埋耳邊, 又係果句, 非常埋身, 真係差小小要避一避添呀, 去到追入市集, 果一輪超過5分鐘既槍戰, 如果鐘意係屋企睇戲炸機的你, 一定會覺得超級正呀, 唔好話小瑟唔提你, 呢段係必睇必試呀!!!! 而緊隨的背景音樂亦跟情節緊扣, 增加欣賞時的投入感, 估唔到條紅腸反而係環繞音效與音樂二者的分工同平衡度上, 可以做得岩岩的好. 真係估佢唔到呢~~~~
總結
一直以來, 76好多師兄都已經過到呢條紅腸無數咁多次, 加屎, 加銅, 直出, 冰鮮, 咩都玩過哂, 去到呢度小瑟先學人走去玩腸, 其實的確都幾背, 不過的而且確, 呢條紅腸係一條愛恨分明, 將你家中的電源以最直接同最原汁原味的傳送到你的器材上, 小瑟冇再將紅腸插在其他地方, 因為一經插上, 其實都幾唔願轉位(懶你就懶啦~~@@”), 另外小瑟成日覺得, 一條有質素既線材, 最大反應的就一定係放係前級上, 而紅腸插入之後, 小瑟亦都非常滿意其效果, 雖然講真的, 紅腸絕對未算係大家所說得咁誇張既神線一條, 但以小瑟呢條夾左NEOTECH UPOCC單晶銅 24K 鍍金頭及經過CRYO泠涷處理頭尾的紅腸索價HKD$2540來講, 絕對對得住其身價有餘啦!!!!
>
有你既支持，就係我地最好既推動力，齊齊參與
「有玩、有FUN … Post76.com」
<
歡迎進入我地論壇對>>本文章<<發表您的回覆啦^^”
>
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***＞
