今年AV界應該都會有一番新景象，事關今年4K TV來勢兇兇，仲有世界杯炸機效應，好多朋友可能手上既AV AMP可能都已經玩左幾年，係時候身痕想換機，而更加有不少76師兄已經換左4KTV，但就心大心細部AV Amp 仲未支援到4K，去到今年4K當道，而今日同大家做評測呢部NR636又支援最高規格的 4K/60Hz 制式，此機定價雖為入門價，但功能與用料絕不入門，而且功能多多，支緩 4K 之餘，更可玩到FLAC和WAV 的 24/192播放功能、對應4K/60Hz及HDCP 2.2，仲有 Phase Matching Bass等技術可選，以五千鬆D 可入手呢個價錢來講，仲有咩好投訴呀？？
上個星期，小瑟就係佢地未出街前，殺左上去Onkyo Show Room為呢部 Onkyo系中非常重要的一員，作出一個小小既測試，睇下去到呢代，NR636究竟又有咩新功能及影音上既基本功力又會係咩一回事呢？？冇上來一排，原來佢地已經轉哂用JBL 9.1的系統呢！
作為4K 擴音機，TX-NR636 在連結介面上絕對無偷雞。7入2出的HDMI中，就有4個 HDMI 端子均支援4K/60Hz等多種接駁模式，完全對應未來最新HDMI 2.0的 4K/60Hz，咁年尾4K光碟正式推出時，就算係4K 3D電影，都可以使用到主動式來欣賞3D畫面呢。
我地先睇睇TX-NR636 背面先。而在「力水」上，TX-NR636由高電流大型變壓器及「分離式」低失真放大器組成。所以能在輸出 175 W/ Ch 的同時，也能保持低雜訊、配搭 Onkyo 自家 WRAT (寬頻放大技術)及H.C.P.S. (大電流供電) ，力水方面，以入門機來講可算算交足功課呢。
而且， Onkyo TX-NR636 的一大賣點，就是視頻晶片亦都係採用業界推崇的Qdeo晶片技術，可將多種視頻增線為高清質素，更能將部分視頻「升 Lev」至 Ultra HD 超高清，功能算是相當全面。
此外，此機也內置有 WiFi 和藍芽等無線傳輸功能，使用者只需完成簡單的 WiFi 設置，再裝好Onkyo Remote App。你手上的就會搖身一變成為一部「全攻型」遙控及音樂串流播放。而功能表上的 Clear Information 就是特意為避免 「Jam 藍芽訊號」而設。使用者只要藍牙設備與 TX-NR636配對，在家庭影院 「串流播放」 High-Resolution 高清音樂功能以後就可以「一Click 搞掂」。想補充一點的是，喜愛用 Onkyo Remote App 作操作的用家可留意下其「專輯清單」功能。此功能可以「一 Take 過」整理全個「播放清單」，「就手」得來十分好用。
親身實試：
好勒，制式數字大家都知道勒，小瑟呢日就同記者仔”小Hu”去到尖沙咀安橋專業影音房作測試，而當日部636只係岩岩開箱，所以小瑟當然一黎就來個Auto Setup先，而TX-NR636系之後，就已經正式轉用 Onkyo自家專利技術 AccuEQ 技術及其 「AccuEQ Mic」作基本 Set Up。
以下就係NR636 Auto Setup時的畫面，去到呢代NR636的介面已經非常靚仔的呢。
而今日同大家實測的以《虎膽龍威5》、《復仇者聯盟》及《Hitman: David Foster & Friends》等幾隻藍光碟做了幾個小測試。
《虎膽龍威5》麥尊父子被俄國賊匪盤問及掃射一段，由TX-NR636的QED晶片輸出之下，以Epson EH-TW8200投出100吋畫面上，光位及仔細度都交代清楚，雖獨雜訊控制應該可以做得更好，但整體算是交到功課啦。而聲音方面，人聲對白的擴散及分析力上的表現頗夠「肉地」，厚身得黎另人感覺由畫面中傳出之感覺非常好，而值得一提既係，麥尊父子被賊匪盤問中的對白聲，在大廳室內迴盪感充分表現出空間感及環境中的距離感，呢下野非常討好。而當情況推進到正式開火之後，父子們的機關槍掃射時既位置感同定位非常埋身，子彈橫飛感覺唔錯，而最另小瑟估唔到既係NR636係 Onkyo呢個可容納 20人同時欣賞既空間下，其直升機以重火力掃射一幕的力感同埋身沖擊感都做出了，而子彈穿過觀眾的定位感、速度感、力度，及細碎聲，效果十分「埋身」。
另外NR636 有一個名為 Phase Matching Bass 模式，在此片中也著略提升了其低頻對中、高頻之間分離度，音場上也有相對的強化。
之後就測試《復仇者聯盟》，小瑟亦都係選來尾場大混戰一段，由開場HULK重掌之後，其大爆炸之威力都算係埋身感不錯，但爆棚位在大音壓之下，控制力有改善既空間，始終一套入門合併機，要推動7隻JBL喇叭，可以去到呢個效果其實已經收貨有餘，如果可以，試試更換一個12＂的 SUB仔相信效果可以更好呢。之後到Iron Man「幫拖」一段，NR636 就突顯到其「四圍飛」的定位速度感，當中尤其以從鏡頭後方的快速飛過時最為明顯。
最後，我們亦找來HIT MAN藍光音樂會來作聽歌測試，基本設定下，NR636的效果算是過得去啦，效果絕對比睇戲沒有那麼來得另人驚艷，但當小瑟試下用上其他效果時，對音場的優化有著不錯的效果，大家不妨試下聽 Live 演唱會時。試試以 「Listening」 設定中的 「Orchestra」 Mode 作聆聽，因為小瑟試用此 Mode 之後，在音場延伸及音樂會現場感方面，都有頗為突出的環境感，及聽落感覺相對自然，平時小瑟都好小用DSP MODE來作聆聽，但今次用上 「Orchestra」 Mode之後，感覺又算係幾耐聽及討好呢。
試後感：
小瑟一向對ONKYO的入門機都有一份親切感，事關小瑟在高清新世代開始之後，第一部令小瑟對ONKYO改觀的型號就是6系機，而依家去到呢代，音效同力水方面，依然係以＂交足功課＂來形容最為貼切。而TX-NR636 幾個本來只在高階機出現既功能特色，例如 4K/60p，HDCP2.2，NETWORK及藍芽直播功能，以手機APPS存取網絡中的24/192及24/96音樂檔，以及近來最HIT的DSD（5.6MHz ）都一樣可以播放，而HDCP 2.2這個制式亦保障左未來係對應4K藍光影碟機的播放，呢下真係非常照顧家用玩家既需要，以五千多元就可以有齊未來二年都照顧哂既功能，而ONKYO多年來係影音上的功力，效果相信大家都心中有數啦，雖然依家AV AMP品牌都係一年出一代，好似轉得好快咁，不過諗深一層，其實玩手機都係一樣啦，好多朋友都係二年換一部機的情況，相信如果你部AV AMP已經買左二年左右既情況下，呢代既ONKYO可能有機會可以激起你換機既欲念，而岩岩進入影音世界既你，又會唔會好似當年小瑟咁，將你既影音處子之身，交比ONKYO呢？？XDDDDDDD
>
有你既支持，就係我地最好既推動力，齊齊參與
「有玩、有FUN … Post76.com」
<
歡迎進入我地論壇對>>本文章<<發表您的回覆啦^^”
>
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
