話說上次睇完細B介紹”MEL MU-OFC 高純銅特別版 – 英式電源線“既POST, 小瑟又心痕痕想借來試試, 睇下效果如何, 呢日終於到手, 一於囉佢來試下比我部 ONKYO PR-SC5509先得!!!!
埋身睇條MEL MU既身型, 的確唔係幼野來!!!
同得大家介紹, 又點可以唔開一開個MK頭比大家睇下呀??? MU-OFC因為係用上三條4mm 多結晶銅芯, 所以其實要”質”入去一個MK頭上, 都咪話唔難呀!!! 但拆開之後可見, MU-OFC銅芯依然有序, 冇斷線或者係傷到線芯, 可見其手功都十分精細呢!!!
全線長2米, 足夠哂一般師兄接駁器材之用啦, 而電源線又需要有足夠長度比電性遊走先可發揮到應有既效能, 所以其實最短都唔好短過 1.5M啦!!!
講多無謂, 實試最實際, 今次小瑟就將佢換左比ONKYO PR-SC5509, 試下由牆直出, 之前小瑟用緊既係 Viablue X60美式經拖板走, 之前其實一路就覺得中高音同畫面都收哂貨架勒, 只係低頻既厚度差小小, 今次就囉佢來換走條 X60試試先!!
小小地就搵左港版復仇者聯盟作測試, 首先講講畫質, 因為小瑟想試效果, 所以今次測試唔會由 OPPO BDP-105D直上TV的, 而係經 5509上TV, 講返整體感覺先, 呢條 MEL MU-OFC高純銅對於畫面既反應都幾敏感, 雖然畫面出來既銳利度同細緻度同X60都不相伯仲, 但係顏色既處理上就感覺比X60偏暖, 以面色最為明顯, 另外唔知係咪因為黑位實淨左, 相對立體感都有所提升, 尤其係D散景既距離感最為明顯, 係比較滑小小既. 而音效方面, 埋身感同厚度同X60完全二個世界, 整體包圍感好豐富, 而層次感亦都明顯好多, 例如IRONMEN追逐果PART就可以聽到整個環境既氣氛同爆炸時既逐步埋身感, 感覺好充實呀.
之後小瑟就用左呢條 MEL MU-OFC玩左一個星期左右, 都有聽下歌仔啦, 睇下演唱會, 同睇左幾套新片, 好似新鐵甲威龍, 驚天諜變●魅影特攻, 救火英雄咁, 基本上呢條 MU-OFC比我既感覺, 就同上次玩單晶銅既感覺一樣, 屋企整個環繞聲既音場都好似”打開”左咁, 高音通透明確, 細緻度豐富度都因為低頻既幫助, 細膩同質感都實在左好多, 而換線同調校聲音最唔同既地方, 就係換線材既提升唔會有”催谷”既感覺, 依家既低音干淨得來有力爽快, 但依然係雄渾有勁, 絕不混濁, 不過以佢身價來講, 要成 HKD$2,280呢點, 的確有一點另人需要多番考慮, 如果可以平返小小, 咁就真係 VERY GOOD勒. 尤其係插左一星期之後, 小瑟已經決定條 X60打入泠宮, 睇下會唔會整返個頭比部 Plasma用啦, 老實講, 插過呢條 MU-OFC, 如果同身價既線材來比較, 又真係好難返轉頭呢……..~_~
另外小瑟家中基本上已經專玩美式拖板, 今次試呢條英式我都需要係牆身飛走一件電器先可以插到, 同埋依家咁樣又試唔到係 JohnBlue PCS-6拖板上既威力, 小瑟相信, 呢條 MU-OFC係PCS-6上, 應該一定會有提升, 所以…………..小瑟決定要問問可唔可以將呢條線轉頭行美式同埋會唔會有咩靚價先得!!!!
>
有你既支持，就係我地最好既推動力，齊齊參與
「有玩、有FUN … Post76.com」
<
歡迎進入我地論壇對>>本文章<<發表您的回覆啦^^”
>
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
