好多人都話《哈比人》唔好睇，好長，好悶，但小瑟就覺得其實這套《哈比人》絕對是近年難得一見的大片之一，而其故事推進及緊張刺激程度，絕對比其前作《魔戒三部曲》有過之而無不及之能事，當然，大家需要＂捱＂過第一集的頭60分鐘這個故事情節之後，就包你有睇到收唔到制的感覺呢。。。。。覺得小瑟非常之＂誇張＂？對，的確係有一點誇張，不過小瑟當日開場看這個《哈比人:荒谷魔龍 3D》時，就由11:30本來想睇一陣，最後變成睇哂成集睇到2:30，最慘既係，小瑟第日仲要返工的呢。~_~!!!
未睇本片之前，睇到呢幾張圖冇咩特別感覺，睇完之後就好想睇下圖片後既內容，小瑟又一次比彼得拉左入佢既世界呢。＠＠
上集冇入3D，今集一定要睇3D，因為真係好正！！！
小瑟手上的，屬於四碟幻變封面珍藏版，入面分別有四集碟，3D電影內容就需要二隻碟先可以裝得哂，而2D就有一隻碟，另外再加一隻SF，此碟對一眾彼得迷來講，絕對有珍藏價值，而隨碟附送人物造型咭一套六張，上面講左勒，唔再多講。
好勒，既然影得相，不如就囉埋上集二兄弟一齊影返張靚相先啦！！！
好勒，開場！！
《哈比人:荒谷魔龍》雖然係《哈比人歷險記》的「承、轉」一節。但論其文戲，動作，甚至伏線都早佈下了下集「結局篇」的強勁火藥味。而繼上集幾位「經典角色」Frodo ，Elrond，Galadriel，Saruman 的短暫露面後，今集加碼的Legolas (繼續由「型佬」Orlando Bloom 飾演) 同原創人物Tauriel (由 Evangeline Lilly 飾演) 絕對為今集加分不少，有別於上集「佬味」過盛的《不思議之旅》。
故仔講乜？
有別於《魔戒三部曲》，導演 Peter Jackson（我叫佢彼得XD)不再用「一書拍一戲」的鋪陳，而改以「一書開三戲」為《哈》系列作改篇。新的改編方式雖令節奏放慢，動作場面密集度大減，但換來的就是有更多「空間」探索每位「矮人」角色的性格心態，他們的熱血「復國」理念及主角哈比人Bilbo「跟隊」的目的。
在今集中，主角Bilbo (馬田費曼飾)，巫師甘道夫 (伊恩麥基倫飾) 同索林橡木盾 (李察阿米塔吉飾) 帶領的「一打」矮人兵團繼續他們的「復國」之旅。而今集必睇「大型動作場口」一定會係逃離幽暗密林「巨型蜘蛛軍團」追殺一段及「森林精靈」急流大混戰部份。而急流大混，小瑟強力推介作為家庭影院測試對像，小瑟當晚睇細細聲睇完之後，最後都要搵個日頭時間炸佢一炸，當中交差走位及飛來飛去之音效，絕對令人睇得過引，好耐都未有戲可以玩套機玩得咁開心，尤其睇埋3D，簡直係極盡官能刺激之享受呀。
此外，片末戲肉部分 – Bilbo 與「巨龍史矛革」的一段對話，完全比到觀眾果份巨龍既壓迫感，小瑟當晚睇時， Bilbo比條龍＂盤＂既情節，小瑟直頭覺得自己都真係驚埋一份，大佬，佢又聰明又醒，又咩都知哂咁，一個唔該射你一野，真係邊度都唔洗去啦~XDDDDDD。而「孤山」內金銀財寶滿貫的壯觀奇景，絕對算將原著小說「影像化」後的一次視覺震撼既。
值得一提的是，今集的電影原創角色 – 女精靈Tauriel 與Legolas 和矮人Kili 的一段「疑似」三角關係。當中Tauriel因某種問題與Legolas有緣無份，而就在失落的時候，係一次戰鬥中巧遇矮人Kili，發現其勇敢的一面，再慢慢地產生了感情，之後更因為Kili而隻身加入抗戰黑暗力量的一段，都另本片帶來一點點扣人心弦的愛情位，絕對係彼得手上小見的神來之筆，也為女性觀眾帶來一點點的的投入感。
畫質／音效
彼得的電影向來都故事與聲畫並重，而本片在聲音表現上絕對非常之掂。單是一幕蜘蛛激戰就可試出其環繞聲效的定位感和包圍感，而甘道夫「單刀赴會」與「索倫」對戰一幕更加將各位家中SUB仔推向極限，絕對有能力挑戰當年試 「十仔」天碟《魔戒》的「名號」，低頻下潛力及伸廷性足可另不小SUB仔拍邊收場。當然上面介紹過既急流一段亦都係本片測試重點呢。
此外，片中多個場口如「急流逃生」一幕的水花、「蜘蛛洞」的蜘蛛絲等都無浪費到 3D 在展現飄浮物件時的優點，大大提升了前景、背景空間感之餘也強化了3D 的埋身感覺。故此睇呢套戲時，＂識得睇，一定係睇3D咁睇的。XD＂。
總結
經歷過《哈比人》第一集的「彼此認識」階段後，今集《荒谷魔龍》的劇情終於來到「烽煙四起」的部分。即使你對首集的「人物關係篇」興趣不大，身為「最終章」 前編的《荒谷魔龍》也一定會令你提起對彼得電影的興趣。
最後想提下既係， 彼得的FANS記得睇埋「導演彼德積遜帶你經歷拍攝過程」一段花絮先好熄機呀！！
藍光影碟資料：
影碟數目: 4
語言: 英語, 俄語, 泰語, 烏克蘭語, 捷克語, 土耳其語
音效: 英語 DTS-HD Master Audio 7.1;
泰語, 烏克蘭語, 捷克語, 土耳其語, 俄語 Dolby Digital 5.1
字幕: 粵語, 繁體中文, 英文, 泰文, 韓文, 印尼文, 捷克文, 俄文, 土耳其文
特別收錄: 幕後花絮、導演彼德積遜帶你經歷拍攝過程、紐西蘭－中土世界的取景地2
容量: 3xBD50 + 1xBD25
視頻壓縮: AVC
螢幕解析度: 1080p
屏幕比例: 16:9
小瑟入手價：HKD$319
>
有你既支持，就係我地最好既推動力，齊齊參與
「有玩、有FUN … Post76.com」
<
歡迎進入我地論壇對本文章發表您的回覆啦^^”
http://www.post76.com/x2/forum.php?mod=viewthread&tid=187794
<
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
