以下翻譯自電影《鐵甲威龍》(1987)的原始劇本最後一幕:
572 老人，眼前閃出一道耀眼光輝
老人: 哥仔，好鎗法喎。你叫咩名啊。
573 機械人，回頭望著老人
機械人: 梅菲。
幼稚園時代唔記得咗喺國際台定明珠台第一次目睹鐵甲威龍嘅風采，之後正貨又好﹑山寨又好，一大批鐵甲威龍的玩具隨之攻陷咗幼稚園每個角落。當中最深得民心嘅係一款可以發聲嘅6寸玩偶，為此@肥狗仔@亦纏著家人多日，最終迫使父母到百貨公司將哩位”超級英雄”迎接回家。但美中不足係哩款玩具與朋友手中嘅有若干唔同，最明顯分別在於佢唔識發聲，頭盔就可以除落黎。所以當本人帶著玩具返校便迅間引發眾人嘅質疑，唔少人更擺出非我族類之勢，場面可謂尷尬至極。20年後嘅今日，對於哩部翻拍自保羅韋浩雲1987年同名作品嘅《鐵甲威龍》(RoboCop)，@肥狗仔@亦曾經糾結咗一段時間。所斟酌嘅地方並唔係被受爭議嘅新戰衣，而喺究竟哩一部《鐵甲威龍》仲算唔算係鐵甲威龍，又還是只係一齣借題發揮嘅新一代超級英雄電影呢..
近年荷李活牽起一股劇本荒，片商紛紛翻炒舊片，原因有二: 首先其故事基本架構已經扎實完善，只要少修少補已經可以拍板開機; 另外被翻拍嘅作品即使唔係殿堂級片種亦擁有一定知名度，風險程度比某類A級原創大製作要低不少。而事實上，哩種舊酒新瓶嘅製作方式對電影製作人黎講，往往局限了一部份的創作空間。對於觀眾而言更加係一場惡夢。特別係鍾情原著的粉絲，佢地須要擁有一個好比如來佛祖嘅廣闊胸襟，先至唔會比人誤認成精神分裂，此因大部份人都係笑著入場喊著離場。至於《鐵甲威龍》亦無可幸免，自早兩年一張片場照被上傳到互聯網後，本片的發行商甚至製作組同樣受到前所未有嘅指責及咀咒。皆因冇一個粉絲接受得到自己童年時嘅偶像變成一個右手唔記戴手套嘅幪面超人。面對各種壓力，如今電影終於喺一片罵聲之中正式上映，可以話《鐵甲威龍》無論喺人物設定或者係故事脈絡上都進行了大刀闊斧的革新，並附以一片帶有強烈社會諷刺味道的糖衣將繼承自原版的核心價值包得密不透風，使人感到驚喜不斷。
《鐵甲威龍》故事發生在2028年的底特律，當地一間從事出口科技的跨國大公司OmniCorp(OCP)多年來將旗下研發的人工智能兵器賣給國家用作軍事用途。在一班講求效率，冷血及服從的機械人助陣下，美國對外的大小戰役勢如破竹，加上出口到外國的軍事產品都受OCP所規管，引至一時間全球的軍備監督權都間接收歸美國，OCP亦順理成章成為國內舉足輕重的一大企業。不過無奈是美國竟然無能迎接哩班鐵甲兵團凱旋回國。由於民眾對機械人仍然抱有不安及抗拒，於事當地通過法案禁止OCP由出口轉內銷。走頭無路嘅OCP惟有採用一套前無古人的”市場策略” — 開發一款結合人類與機械的鐵甲威龍，名義上係除暴安良，實際上係作為親善大使，希望藉著鐵甲威龍的人類身份消除公眾對機械人的歧視，迫使政客就範解除法案。主角梅菲(祖爾堅拿文 飾)係底特律的一名警察，因得悉當地警察勾結犯罪組織的證據而慘遭滅口，搶救後依靠醫療設備苟延殘喘。好快，梅菲的情況被OCP睇中並將佢改裝成底特律新一代犯罪克星。然而OCP開始意識哩位擁有自主意志的機械警察往往為公司帶來極大嘅不便…
從各方面去睇，《鐵甲威龍》嘅野心並唔靜止係一部單純嘅重拍版。事實上電影保留了梅菲被改造成鐵甲威龍嘅主線，並加入大量CG及緊湊而火爆的動作場面試圖讓本片能夠進駐荷李活科幻大片之列，但其餘時間就如怒漢般使出九牛二虎之力將舊版冇提及過的細節逐一發掘並無限放大。本片的巴西籍導演José Padilha嘗試將佢喺《精銳部隊》所反映嘅社會問題注入哩個同樣圍繞”犯罪”﹑”警察”﹑”政治”的反烏托邦城市之中，包括一個不能容許任何反對聲音的管轄區，一班與罪犯同流合污嘅差佬，仲有一個與大財團有著利益輸送嘅節目主持人，而更重要係，電影試圖通過一系列社會現像去探討人類與機械化的矛盾。
喺原版裡面，”地球”被描寫成一個比火星更危險嘅地方，美蘇兩國繼續著”星球大戰”計劃，OCP為重建新市鎮採用殺錯良民嘅機械人，電視公然播放色情節目，小朋友與家人玩世界大戰遊戲，就連警察行咇都要全天侯著住避彈衣，作姦犯科者就不在話下。與之相比，新版的普遍價值觀則回歸正常。社會更寫實穩定，科技亦更為發達。不過與現實一樣，當國家處於高速發展嘅同時，人群中就會逐漸出現一啲要求社會或政府自我檢討的言外之音。就好似究竟國家須唔須要引入機械人維持治安，大部份人都表明抗拒，但另一邊廂佢地又唔反對國家派遣機械人出國打杖。情況有如毒梟販毒寧可毒害他人卻不願自己家人沾染半點毒癮般荒謬。
電影開頭就有幕講述ED209朝一名手持刀仔嘅德黑蘭男童亂槍掃射。老實講打杖嘅野，不論係戰死沙場，還是死於非命，民眾最終都會將責任推向某一參戰國，除非軍事法庭介入，否則士兵殺人通常唔洗負上刑責。就算換著係機械人亦都一樣，反正大家都了解到打杖就會死人。但若果換著係機械人為本土提供服務則又作別論。因為喺有關情況下”安全”已經凌駕於”道德”或者”法律責任”之上。引入機械人就好比購買一台LED電視，你知道電視遲早會壞，壞電視最多冇得睇，但機械人發生故障，最嚴重係搞出人命。而關鍵係機械人並非血肉之驅，社會所給予嘅一切道德規範對機械人起唔到任何作用，民眾嘅性命自然得唔到保障。
上述背景設計為主角梅菲的不幸經歷奠定了穩固基礎，且絕非偶然。表面上”鐵甲威龍”計劃係OCP給予民眾的一個帶有誤導成份的試用期，所謂誤導即是鐵甲威龍並非100%的機械人，正確黎講係將機械義肢駁上人類身體運作的Cyborg。而實情電影係希望通過有關橋段與背景作一個呼應，並向觀眾揭示機械人融入人類生活後的未來。記得梅菲在中國試驗場進行實戰演練之前，諾頓博士曾經修改了戰衣設計，好讓梅菲帶上頭盔後能夠被軟件支配行動，從而排除了多餘的人腦思考提升戰鬥力。所引伸的問題就是人類永遠追不上電腦的效率，換言之日後民眾要適應機械人的”服務”，至少佢地嘅腦袋亦須要被改造先至能夠安居樂業。@肥狗仔@在此先撇除過中分肢出來的人道立場或其他因素，單單係唸到人類未來可能會好似《攻殼機動隊》咁肆無忌憚地改造自己，已經令人毛骨悚然。始終長遠而言，控制人類思想比起吓吓回收機械人更具成本效益，久而久之人類與機械人的利益關係將會全面對調亦都不出為奇。
如此同時，電影又保留咗梅菲殺上OCP總部報復的經典情節，似乎係想延續固有的因果理論，即機械人係無辜，真正有罪往往係佢地嘅設計者，而有關的萬惡之源最終都會自食其果。尤其是鐵甲威龍作為一個裝備了人類靈魂及感情的機械人，佢嘅存在本身就已經象徵著一種道德指標，沒有半點模糊。站在觀眾立場，安排一個多情善感嘅機械人確實更能讓人分辨是非黑白，哩點算係新版《鐵甲威龍》其中一項正面嘅改良。
人類與機械之間的思考議題替電影塗上一層無形的黑暗，亦為之加入多重延伸。@肥狗仔@特別喜歡本片對OCP內部決策的細膩還原。其精準地說明了一班商人要將新產品推出市面，背後所牽涉的道德淪亡和官商勾結，甚至通過傳媒向公眾展示一副明公正氣的健康形象，經已成為大財團的慣常營銷手段。本片亦反映出功利主義嘅可怕在於佢可以猶如瘟疫般傳播開去，由加利奧文飾演的諾頓博士最初以造福人類為宗旨替OCP開發鐵甲威龍，期後卻為追名逐利將梅菲改造成機械的奴役對像，到醒覺時已騎虎難下，人生最悲傷事莫過於此。一比之下觀眾唔難發現梅菲嘅情況比起博士算係好得多(= =)。身體上下已面目全非，家人依然對其不離不棄，可惜哩份真情去到電影中段開始失去重心，妻兒的心理轉變都被盡可能地忽略，逐漸變成主線故事的裝飾品。
如果話《鐵甲威龍》嘅感情線係一個遺憾，咁本片嘅動作設計就係個徹徹底底嘅失敗。查實@肥狗仔@都唔會奢望一套2014年嘅科幻片會沿用80年代嗰種不合時宜嘅機械步行姿勢，何況新版嘅科技明顯超前舊版不少。(當然，造型都夠哂前衛) 話雖如此，喺普遍人眼中機械人就應該有返屬於機械人嘅行為特徵，而唔係好似本片咁樣一味得個虛有其表，打起上黎與加入防彈功能嘅美國隊長一模一樣，睇就好睇，但倒頭來毫無特色可言。相反本以為係華而不實的CG特效就稱得上大放異彩，由一開始德黑蘭機械兵巡邏情節，到中段的威龍組裝，再到尾段梅菲以一敵百的震撼畫面，俾人一種徘徊於現實及虛幻的獨特感覺。特別是梅菲脫甲一幕更加係空前絕後，足以讓電影在數碼特效領域上名留青史。
挽回動作場面的失利，文戲的精彩必不可少。@肥狗仔@誓估唔到”永遠嘅蝙蝠俠” — 米高基頓扮演一個滿口仁義的虛偽奸商會表現得咁維妙維肖。本人曾幾何時甚至會認為哩個先係米高基頓真實嘅自己，眼見佢每一句說話充斥著花言巧語，每一個眼神滲透著陰謀，每一個舉動都將人類最基本的道德界限推向懸崖。這位OCP老闆在米高基頓的演活之下於電影整體上發揮出極致的重要性和觀賞性。好戲之人仲有綠葉加利奧文。電影安排此一角色或者係考慮到加利奧文過去已經受過正邪角色的洗禮，而佢喺戲中由壯志淩雲的”慈父”慢慢被物欲沖昏頭腦，繼而滿足OCP的各種不人道要求。過中演技有幾精湛本人唔再詳解，總知就係勁 + 省略一萬字…
至於飾演梅菲的祖爾堅拿文，個人入場前就最期待佢嘅表現，因為鐵甲威龍係個非常具挑戰性嘅角色。試唸下單單要做到要被電子控制，又要有自主意識，又要做個稱職嘅住家男人已經叫人唸爆頭。而新版仲要不時以全相示人，難度絕對比舊版有之過而無不及。結果哩位影壇新面孔仍然給予令人滿意的演出，其在兼顧梅菲改造前後的心理狀態上表達到角色應有的迷惘與焦慮。惟獨是若然可以再加多一點爆發性的崩潰情感，相信效果會更具說服力。
“冇任何一部續集能夠理解我地喺當初想要傳達嘅信息。佢地都只係為咗賺錢!” 哩句說話係保羅韋浩雲當年對嗰部臭名遠播嘅《鐵甲威龍 3》所作嘅評價。同一翻說話大概都可以用喺哩部新《鐵甲威龍》上面。但導演好聰明地避免與原版打埋身戰，冇以暴易暴的罪惡都市，亦冇憤世嫉俗嘅主人公。無可否認本片已經脫離原版的枷鎖，透過一堆虛構的社會問題還有一個被改造的機械警察，以諷刺性的觀點來審視一場探討人類與科技關係的社會鬧劇。你可以當佢係部普通嘅超級英雄片，而一旦開始深究電影中的各類蛛絲馬跡，你就會發現佢係眾多重拍電影之中最具深度及質素嘅作品之一。回答返一開始個問題，本片或者已經唔再係我地熟識嘅”RoboCop”，但只要電影嗰種批判性的特質仍然存在，佢嘅靈魂就可以突破時間與媒體嘅界限，就好似1987年原版嘅最後一句對白一樣，佢仍然係梅菲，一個歇斯底里要保著自我嘅鐵甲威龍。
個人評分: 7.5/10
>
有你既支持，就係我地最好既推動力，齊齊參與
「有玩、有FUN … Post76.com」
<
歡迎進入我地論壇對本文章發表您的回覆啦^^”
http://www.post76.com/x2/forum.php?mod=viewthread&tid=181256
*** 溫馨提示：想更緊貼更多影音界的最新資訊，請到以下的 Facebook 專頁按「讚好」及 Google+ 專頁按「加到社交圈」加入我們，每天就會收到全新的中文影音免費資訊呢!! ***
